ଜୟପୁର: ଏକତରଫା ପ୍ରେମରୁ ଫିଲ୍ମ ଷ୍ଟାଇଲରେ ଦବଙ୍ଗଗିରି । ବିବାହ ପୂର୍ବରୁ ଯୁବତୀଙ୍କୁ ଅପହରଣ । ମଝି ମରୁଭୂମିରେ ନିଆଁ ଜାଳି ଯୁବତୀଙ୍କୁ ବଳପୂର୍ବକ ଧରି ସାତ ଘେରା ବୁଲିଲା ଦୁର୍ବୃତ୍ତ । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି । ଏପରି ଏକ ଅଭାବନୀୟ ଘଟଣା ରାଜସ୍ଥାନର ସୀମାନ୍ତ ଜିଲ୍ଲା ଜୈସଲମେରରେ ଦେଖିବାକୁ ମିଳିଛି । ଭିଡିଓ ଭାଇରାଲ ହେବା ପରେ ବିରୋଧୀ ବିଜେପି ସରକାରକୁ ଟାର୍ଗେଟ କରିଛି । ସ୍ଥାନୀୟ ପୋଲିସ ଏକ ମାମଲା ରୁଜୁ କରି ଅଭିଯୁକ୍ତକୁ ଚିହ୍ନଟ କରାଯିବା ସହ ଗିରଫ କରାଯାଇଥିବା ସୂଚନା ଦେଇଛି । ସେହିପରି ଭାଇରାଲ ଭିଡିଓ ପଛରେ ଥିବା ଅନ୍ୟ ଅଭିଯୁକ୍ତମାନେ ଫେରାର ହୋଇଯାଇଛନ୍ତି । ସେମାନଙ୍କୁ ଗିରଫ କରିବା ପାଇଁ ପୋଲିସ କାର୍ଯ୍ୟରେ ଲାଗିଥିବା ସୂଚନା ମିଳିଛି ।
ସୂଚନା ଅନୁସାରେ, ରାଜସ୍ଥାନ ଜୈସଲମେର ଜିଲ୍ଲା ମୋହନଗଡ ଥାନା ଏରିଆରେ ଏହି ଘଟଣା ଘଟିଛି । ସ୍ଥାନୀୟ ସଂଖଲା ଗ୍ରାମରେ ଜଣେ ଯୁବତୀଙ୍କ ବିବାହ ତାରିଖ ସ୍ଥିର ହେବା ପରେ ସ୍ଥାନୀୟ ଅଞ୍ଚଳର କିଛି ଅସମାଜିକ ଯୁବକ ଯୁବତୀଙ୍କୁ ପରିବାର ସଦସ୍ୟଙ୍କ ସାମ୍ନାରେ ମାରଣାସ୍ତ୍ର ଦେଖାଇ ଉଠାଇ ନେଇଥିଲେ । ନିକଟସ୍ଥ ମରୁଭୂମିରେ ନିଆଁ ଜାଳି ଅଭିଯୁକ୍ତ ଯୁବତୀଙ୍କୁ ଧରି ସାତ ଘେରା ବୁଲିଥିଲା । ପରେ ସେମାନେ ଯୁବତୀଙ୍କୁ ଧରି ଫେରାର ହୋଇଯାଇଥିଲେ । ଏନେଇ ଏକ ଭିଡିଓ ମଧ୍ୟ ଭାଇରାଲ ହୋଇଥିଲା । ଭାଇରାଲ ଭିଡିଓରେ ଏକାଧିକ ଯୁବକ ଓ ଜଣେ ମହିଳା ଥିବା ଦେଖିବକୁ ମିଳିଥିଲା ।
ଏହି ଭିଡିଓ ଭାଇରାଲ ହେବା ପରେ ବିରୋଧୀ ବିଜେପି ଅଶୋକ ଗେହେଲୋଟ ସରକାରଙ୍କୁ ଟାର୍ଗେଟ କରିଛି । କେନ୍ଦ୍ରମନ୍ତ୍ରୀ ଅର୍ଜୁନ ରାମ ମେଘଓ୍ବାଲ ମଧ୍ୟ ଏହି ଭାଇରାଲ ଭିଡିଓ ଟ୍ବିଟ କରି ରାଜ୍ୟରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ଅଭିଯୋଗ କରିଛନ୍ତି । ଭାଇରାଲ ଭିଡିଓ ଆଧାରରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ମୁଖ୍ୟ ଅଭିଯୁକ୍ତକୁ ଗିରଫ କରିଥିବା ବେଳେ ଅନ୍ୟ ସହଯୋଗୀ ମାନେ ଫେରାର ହୋଇଯିବାରେ ସଫଳ ହୋଇଛନ୍ତି । ସେମାନଙ୍କୁ ଗିରଫ କରିବା ପାଇଁ ପୋଲିସ ଟିମ ବିଭିନ୍ନ ସ୍ଥାନରେ ଚଢାଉ ମଧ୍ୟ ଜାରି ରଖିଥିବା ସୂଚନା ଦେଇଛି ।
ପ୍ରାଥମିକ ତଦନ୍ତ ପରେ ଏହା ଏକ ଏକତରଫା ପ୍ରେମ ସମ୍ପର୍କିତ ମାମଲା ବୋଲି ପୋଲିସ ଜାଣିବାକୁ ପାଇଛି । ସମ୍ପୃକ୍ତ ଅଭିଯୁକ୍ତ ଯୁବତୀଙ୍କୁ ଏକତରଫା ପ୍ରେମ କୁରଥିଲା । ହେଲେ ଏହାକୁ ଯୁବତୀଙ୍କୁ ପରିବାର ପକ୍ଷରୁ ବିରୋଧ କରାଯାଉଥିଲା । ଜୁନ 12 ତାରିଖରେ ସମ୍ପୃକ୍ତ ଯୁବତୀଙ୍କର ବିବାହ ସ୍ଥିର କରାଯାଇଛି । ଏହି ଖବର ପାଇ ସମ୍ପୃକ୍ତ ଅଭିଯୁକ୍ତ ନିଜର କିଛି ସହଯୋଗୀଙ୍କୁ ଧରି ଯୁବତୀଙ୍କୁ ମାରଣାସ୍ତ୍ର ଦେଖାଇ ଉଠାଇ ଆଣିଥିଲା । ବଳପୂର୍ବକ ବିବାହ କରିବାକୁ ଉଦ୍ୟମ କରି ଏପରି କରିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
