ହାଇଦ୍ରାବାଦ: ଓଡ଼ିଶାରେ ଆୟୋଜିତ ହେବାକୁ ଯାଉଥିବା FIH ପୁରୁଷ ହକି ବିଶ୍ବକପରେ ସାମିଲ ହେବାକୁ ସମସ୍ତ ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ କରିବା ପାଇଁ ନିଷ୍ପତ୍ତି ନେଇଛନ୍ତି ଓଡିଶା ସରକାର । ଏଥିପାଇଁ ନବୀନ ସରକାରର ମନ୍ତ୍ରୀମାନେ ବିଭିନ୍ନ ରାଜ୍ୟ ଗସ୍ତ କରି ମୁଖ୍ୟମନ୍ତ୍ରୀମାନଙ୍କୁ ନିମନ୍ତ୍ରଣ କରିବା ଜାରି ରଖିଛନ୍ତି । ଏହି କ୍ରମରେ ଆଜି(ଗୁରୁବାର) ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ ହିମାଚଳ ପ୍ରଦେଶ ଗସ୍ତ କରି ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁଙ୍କୁ ହକି ବିଶ୍ବକପରେ ସାମିଲ ହେବା ପାଇଁ ନିମନ୍ତ୍ରଣ କରିଛନ୍ତି (Minister Sameer Das invite Himachal cm)।
ଆସନ୍ତାବର୍ଷ (2023) ଜାନୁଆରୀ 13ରୁ 29 ତାରିଖ ପର୍ଯ୍ୟନ୍ତ ଓଡ଼ିଶାର ଭୁବନେଶ୍ବର ସ୍ଥିତ କଳିଙ୍ଗ ଷ୍ଟାଡିୟମ ଏବଂ ରାଉରକେଲାରେ ନବନିର୍ମିତ ବିର୍ସା ମୁଣ୍ଡା ହକି ଷ୍ଟାଡିୟମରେ ଏହି ପୁରୁଷ ହକି ବିଶ୍ୱକପ (Hockey World Cup) ଅନୁଷ୍ଠିତ ହେବାକୁ ଯାଉଛି । ଜାନୁଆରୀ 13ରେ ରାଉରକେଲାସ୍ଥିତ ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମରେ ସ୍ପେନ୍ ବିପକ୍ଷରେ ଭାରତୀୟ ହକି ଦଳ ଉଦଘାଟନୀ ମ୍ୟାଚ ଖେଳିବା ସହ ଟୁର୍ଣ୍ଣାମେଣ୍ଟ ଆରମ୍ଭ ହେବ । ଲଗାତାର ଦ୍ୱିତୀୟ ଥର ପାଇଁ ଓଡିଶା ହକି ବିଶ୍ୱକପ ଆୟୋଜନ କରୁଛି । ଏଥିପାଇଁ ରାଜ୍ୟରେ ମଧ୍ୟ ବେଶ ଉତ୍ସାହ ଦେଖିବାକୁ ମିଳିଲାଣି । ବିଶ୍ବକପର ଟ୍ରଫି ମଧ୍ୟ ରାଜ୍ୟରେ ପହଞ୍ଚି ସାରିଲାଣି । ଯାହାକୁ ବିଭିନ୍ନ ସ୍ଥାନରେ ବିଭିନ୍ନ ବର୍ଗ ପକ୍ଷରୁ ସ୍ବାଗତ ମଧ୍ୟ କରାଯାଉଛି ।
ଶେଷଥର ମଧ୍ୟ ଅନ୍ତର୍ଜାତୀୟ ହକି ଫେଡେରେସନ ଦ୍ୱାରା ଭୁବନେଶ୍ବରର କଳିଙ୍ଗ ଷ୍ଟାଡିୟମରେ ପୁରୁଷ ହକି ବିଶ୍ବକପ ଆୟୋଜନ ହୋଇଥିଲା । ଗୋଟିଏ ଷ୍ଟାଡିୟମରେ ବିଶ୍ବକପର ସମସ୍ତ ମ୍ଯାଚ ଖେଳାଯାଇଥିଲା । କିନ୍ତୁ ଏଥର ରାଉରକେଲାରେ ନବନିର୍ମିତ ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମ ଟୁର୍ଣ୍ଣାମେଣ୍ଟ ପାଇଁ ଦ୍ୱିତୀୟ ଗ୍ରାଉଣ୍ଡ ଭାବରେ ବ୍ୟବହୃତ ହେବ । ଚଳିତ ବିଶ୍ବକପ (2023)ରେ ମୋଟ 44 ମ୍ୟାଚ ମଧ୍ୟରୁ ରାଉରକେଲା 20ଟି ଓ ଭୁବନେଶ୍ୱରରେ ଫାଇନାଲ ସମେତ ଅବଶିଷ୍ଟ 24ଟି ମ୍ୟାଚ ଖେଳାଯିବାକୁ ସ୍ଥିର କରାଯାଇଛି । ରାଉରକେଲାରେ ନବନିର୍ମିତ ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମରେ 20,000ରୁ ଅଧିକ ଦର୍ଶକଙ୍କ ବସିବାର କ୍ଷମତା ରହିଛି ଓ ଏହା ଦେଶର ସବୁଠୁ ବଡ ହକି ଷ୍ଟାଡିୟମ ଭାବେ ମଧ୍ୟ ମାନ୍ୟତା ପାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
