କୋଲକାତା: ମୁଖ୍ୟ ଶାସନ ସଚିବଙ୍କୁ ମୁକ୍ତ କରିବାକୁ ନାରାଜ୍ ପଶ୍ଚିମବଙ୍ଗ ସରକାର । ଆଜି(ସୋମବାର) ସକାଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛନ୍ତି ମମତା ବାନାର୍ଜୀ । ପଶ୍ଚିମବଙ୍ଗ ସରକାର ଆଳାପନ ବନ୍ଦୋପାଧ୍ୟାୟଙ୍କୁ ରାଜ୍ୟ ଦାୟିତ୍ବରୁ ମୁକ୍ତ କରିବେ ନାହିଁ ବୋଲି ଚିଠିରେ ଜଣାଇଛନ୍ତି ମମତା । ଏହାସହ କେନ୍ଦ୍ରର ନିର୍ଦ୍ଦେଶକୁ ଫେରାଇ ନେବା ପାଇଁ ଚିଠିରେ କୁହାଯାଇଛି ଓ ନିଷ୍ପତ୍ତିକୁ ଆଉ ଥରେ ବିଚାର କରାଯାଉ ବୋଲି ନିବେଦନ କରିଛନ୍ତି ମମତା ବାନାର୍ଜୀ ।
ପ୍ରକାଶଥାଉକି, ମେ 31 ଅର୍ଥାତ ଆଜି ସକାଳେ ଆଳାପନ୍ ବନ୍ଦୋପାଧ୍ୟାୟଙ୍କୁ କାର୍ମିକ ଏବଂ ତାଲିମ ବିଭାଗରେ ଯୋଗ ଦେବାର ଥିଲା । କିଛି ଦିନ ପୂର୍ବରେ କେନ୍ଦ୍ର ସରକାର ତାଙ୍କୁ ରାଜ୍ୟ ଦାୟିତ୍ବରୁ କେନ୍ଦ୍ର ଦାୟିତ୍ବରେ ନିଯୁକ୍ତ କରିଥିଲେ । ତେବେ ଆଜି ବନ୍ଦୋପାଧ୍ୟାୟ ଅବସର ମଧ୍ୟ ନେଇଥାନ୍ତେ ମାତ୍ର ତାଙ୍କର କାର୍ଯ୍ୟକାଳକୁ ଆଉ 3 ମାସ ପାଇଁ ବୃଦ୍ଧି କରାଯାଇଛି ।
ତେବେ ବନ୍ଦୋପାଧ୍ୟାୟ ସେବା ସମ୍ପ୍ରସାରଣ ଗ୍ରହଣ କରିବା ପରିବର୍ତ୍ତେ ଅବସର ନେବାକୁ ବାଛିପାରନ୍ତି, କାରଣ ସେ ମେ 31 ରେ ଅବସର ନେବାର ଥିଲା। ତାଙ୍କୁ ରାଜ୍ୟ ସରକାରଙ୍କ ପରାମର୍ଶଦାତା ଭାବରେ ନିଯୁକ୍ତ କରାଯାଇପାରିବ।
ବ୍ୟୁରୋ ରିପୋର୍ଟ, ଇଟିଭି ଭାରତ
