ଜୟପୁର: ନ୍ୟାୟ ମାଗୁଛନ୍ତି ନ୍ୟାୟଦାତା । ନିର୍ଯାତନାରୁ ମଧ୍ୟ ମୁକ୍ତ ନୁହନ୍ତି ବିଚାରପତି । ସେ ବି ପୁଣି କୌଣସି ଦୁର୍ବୃତ୍ତ କିମ୍ବା ଅସାମାଜିକଙ୍କ ଠାରୁ ନୁହେଁ ବରଂ ଆଇନଜୀବୀ ଓ ପୋଲିସର ନିର୍ଯାତନାର ଶିକାର ହୋଇଛନ୍ତି । ଏପରି ଏକ ଅଭାବନୀୟ ଅଭିଯୋଗ ରାଜସ୍ଥାନରୁ ଆସିଛି । ରାଜସ୍ଥାନର ନାଗୌର କୋର୍ଟର ପୂର୍ବତନ ମହିଳା ବିଚାରପତି ସୁପ୍ରିମକୋର୍ଟର ପ୍ରଧାନ ବିଚାରପତିଙ୍କୁ ଚିଠି ଲେଖି ଆଇନଜୀବୀ, ପୋଲିସ ଏବଂ ନ୍ୟାୟିକ ଅଧିକାରୀଙ୍କ ବିରୋଧରେ ନିର୍ଯାତନାର ଅଭିଯୋଗ ଆଣିଛନ୍ତି ।
ପୂର୍ବତନ ମହିଳା ବିଚାରପତି ଅଭିଯୋଗ କରିଛନ୍ତି ଯେ ତାଙ୍କୁ ଓକିଲମାନେ ଧମକ ଦେଇଥିଲେ ଓ ଦୁର୍ବ୍ୟବହାର କରିଥିଲେ । ପୋଲିସ ମଧ୍ୟ ଏଥିରେ ସମ୍ପୃକ୍ତ । ତାଙ୍କୁ ବାରମ୍ବାର ଏମାନେ ଧମକ ସହ ନିର୍ଯାତନା ଦେଉଛନ୍ତି । ତେବେ ଅନ୍ୟପଟେ ଓକିଲଙ୍କ ପକ୍ଷରୁ ମଧ୍ୟ ପାଲଟା ଅଭିଯୋଗ ଆସିଛି । ମହିଳା ବିଚାରପତିଙ୍କ ଆଚରଣ ଠିକ୍ ନୁହେଁ । ଅନେକ ଥର ବରିଷ୍ଠ ବିଚାରପତିମାନେ ପୂର୍ବତନ ମହିଳା ବିଚାରପତିଙ୍କୁ ସାନ୍ତ୍ୱନା ଦେଇଛନ୍ତି । ତଥାପି ସେ ପ୍ରତିଦିନ ଓକିଲମାନଙ୍କ ସହିତ ବିବାଦ କରୁଥିଲେ ବୋଲି ଓକିଲଙ୍କ ପକ୍ଷରୁ ଅଭିଯୋଗ ହୋଇଛି । ଏହି କାରଣ ପାଇଁ ହାଇକୋର୍ଟରେ ମଧ୍ୟ ମାମଲା ଦାଏର ହୋଇଥିଲା । ହାଇକୋର୍ଟ ଓକିଲଙ୍କ ଅଭିଯୋଗରେ ସତ୍ୟତା ପାଇବା ପରେ ମହିଳା ବିଚାରପତିଙ୍କୁ ସେବାରୁ ବାଧ୍ୟତାମୂଳକ ଅବସର ପ୍ରଦାନ କରିଛନ୍ତି । ଏହା ପରେ ସମ୍ପୃକ୍ତ ମହିଳା ସମଗ୍ର ଅଭିଯୋଗକୁ ଖଣ୍ଡନ କରିବା ସହ ସିଧା ପ୍ରଧାନ ବିଚାରପତିଙ୍କୁ ଚିଠି ଲେଖି ସେ ନିର୍ଯାତନାର ଶିକାର ହୋଇଥିବା ଅଭିଯୋଗ କରିଛନ୍ତି ।
ଅଭିଯୋଗ କଣ :-
ଡିସେମ୍ବର 15 ତାରିଖରେ CJI କୁ ଲେଖାଯାଇଥିବା ଚିଠିରେ ପୂର୍ବତନ ମହିଳା ବିଚାରପତି ଅଭିଯୋଗ କରିଛନ୍ତି ଯେ, ସେପ୍ଟେମ୍ବର 16, 2023 ରେ ତାଙ୍କୁ ନାଗୌରର ଅତିରିକ୍ତ ସିଭିଲ ଜଜ ଏବଂ ଜୁଡିସିଆଲ ମାଜିଷ୍ଟ୍ରେଟ ଭାବେ ନିଯୁକ୍ତି ମିଳିଥିଲା । ସେ କାର୍ଯ୍ୟରତ ଥିବା ବେଳେ ଦୁଇ ଓକିଲ ତାଙ୍କୁ ଆକ୍ରମଣ କରିବା ସହ ଦୁର୍ବ୍ୟବହାର କରିଥିଲେ । ଧମକ ମଧ୍ୟ ଦେଇଥିଲେ । ଏହି ଘଟଣା ପରେ ସେ ନାଗୌର କୋଟୱାଲୀ ପୋଲିସ ଷ୍ଟେସନର SHO କୁ ସୂଚନା ଦେଇଥିଲେ ଏବଂ ମୌଖିକ ଅଭିଯୋଗ ଗ୍ରହଣ କରି ତଦନ୍ତ ଆରମ୍ଭ କରିବାକୁ ନିର୍ଦ୍ଦେଶ ଦେଇଥିଲେ । ହେଲେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲା । ଏହା ପରେ ସେ ସମସ୍ତଙ୍କ ବିରୋଧରେ ଅଦାଲତ ଅବମାନନା ମାମଲା ରୁଜୁ କରାଇଥିଲେ । ଏହି କାରଣରୁ 2023 ସେପ୍ଟେମ୍ବର 19 ତାରିଖରେ ନୂତନ ପୋଷ୍ଟିଂ ଦେବାର ବାହାନା କରି ତାଙ୍କୁ ଯୋଧପୁର ଜିଲ୍ଲା କୋର୍ଟରେ ରିପୋର୍ଟ କରିବାକୁ କୁହାଯାଇଥିଲା । ସେ 6 ଅକ୍ଟୋବର 2023 ରେ ସେଠାକୁ ଯିବାପରେ ସେଠାରୁ ସେ ସେବାରୁ ରିଲିଭ ଲେଟର ପାଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
