ଇମ୍ଫାଲ: ମଣିପୁରରେ ବିଜେପି ବହୁମତ ପାଇବା ପରେ ମୁଖ୍ୟମନ୍ତ୍ରୀ ପଦ ନେଇ ଲାଗିରହିଥିବା ଅନିଶ୍ଚିତତାର ଅନ୍ତ ଘଟିଛି । ବୀରେନ ସିଂ ମୁଖ୍ୟମନ୍ତ୍ରୀ ହେବା ନେଇ ସ୍ପଷ୍ଟ କରିଛି ଦଳ । ପୂର୍ବରୁୁ ବୀରେନଙ୍କ ସମେତ ଅନ୍ୟ ଦୁଇ ବରିଷ୍ଠ ବିଜେପି ନେତା ବିଶ୍ବଜିତ ସିଂ ଓ ୟୁମନମ ଖେମଚାନ୍ଦ ମଧ୍ୟ ମୁଖ୍ୟମନ୍ତ୍ରୀ ଦୌଡରେ ଥିଲେ । ତେବେ ନିର୍ବାଚନ ଫଳଫଳ ଆସିବାର ୧୦ ଦିନ ପରେ ଆଜି ବୀରେନ ସିଂଙ୍କ ନାମରେ ଚୂଡାନ୍ତ ମୋହର ମାରିଛି ଦଳ । ଇମ୍ଫାଲ ଗସ୍ତରେ ଥିବା କେନ୍ଦ୍ରମନ୍ତ୍ରୀ ନିର୍ମଳା ସିତାରମଣ ଓ କିରଣ ରିଜ୍ଜୁ ଆଜି ଆନୁଷ୍ଠାନିକ ଭାବେ ଏନେଇ ଘୋଷଣା କରିଛନ୍ତି ।
ଦୌଡରେ ଥିବା ଏହି ୩ ନେତା ଗତକାଲି ଦିଲ୍ଲୀ ଗସ୍ତ କରି ଦଳର କେନ୍ଦ୍ରୀୟ ନେତୃତ୍ବଙ୍କୁ ଭେଟିଥିଲେ । ପରବର୍ତ୍ତୀ ମୁଖ୍ୟମନ୍ତ୍ରୀ ନେଇ କେଇ ଘଣ୍ଟା ଆଲୋଚନା ପରେ ଆଜି ସ୍ପଷ୍ଟ ଚିତ୍ର ଆସିବା ନେଇ ଅନୁମାନ କରାଯାଉଥିଲା । ଆଜି ଅପରାହ୍ନରେ ଏନେଇ ଦଳ ପକ୍ଷରୁ ଘୋଷଣା କରାଯାଇଛି । ଗତଥର ମୁଖ୍ୟମନ୍ତ୍ରୀ ଭାବେ ଦାୟିତ୍ବ ସମ୍ଭାଳି ଥିବା ବୀରେନଙ୍କ କାନ୍ଧରେ ପୁଣି ମୁଖ୍ୟମନ୍ତ୍ରୀ ଦାୟିତ୍ବ ଦେଇଛି ଦଳ ।
ଆଜି ମୁଖ୍ୟମନ୍ତ୍ରୀ ପ୍ରାର୍ଥୀ ଚୂଡାନ୍ତ ଘୋଷଣା କରିବା ପାଇଁ କେନ୍ଦ୍ରମନ୍ତ୍ରୀ ନିର୍ମଳା ସୀତାରମଣ, ପ୍ରଦେଶ ପର୍ଯ୍ୟବେକ୍ଷକ ଥିବା କେନ୍ଦ୍ରମନ୍ତ୍ରୀ କିରଣ ରିଜୁଜୁ ଇମ୍ଫାଲରେ ପହଞ୍ଚିଥିଲେ । ତେବେ ଲାଗି ରହିଥିବା ଚର୍ଚ୍ଚାରେ ପୂର୍ଣ୍ଣଚ୍ଛେଦ ପକାଇ ବୀରେନଙ୍କୁ ମୁଖ୍ୟମନ୍ତ୍ରୀ ଭାବେ ଦଳ ଦାୟିତ୍ବ ଦେବ । ପ୍ରଥମେ ଜଣେ ଫୁଟବଲର ଓ ପରେ ସାମ୍ବାଦିକତାରେ କ୍ୟାରିୟର ଆରମ୍ଭ କରିଥିବା ୬୧ ବର୍ଷୀୟ ବୀରେନ ପରବର୍ତ୍ତୀ ସମୟରେ ରାଜନୀତିକୁ ଆସିଥିଲେ । ଚଳିତଥର ମଧ୍ୟ ତାଙ୍କ ନେତୃତ୍ବରେ ନିର୍ବାଚନ ଲଢିଥିଲା ମଣିପୁର ବିଜେପି ।
ବ୍ୟୁରୋ ରିପୋର୍ଟ, ଇଟିଭି ଭାରତ
