ହାଇଦ୍ରାବାଦ: ବିଜେପି ସାଂସଦଙ୍କୁ ଚପଲରେ ମାଡ ମାରିବାକୁ ଧମକ ଦେଲେ ମୁଖ୍ୟମନ୍ତ୍ରୀ କେସିଆରଙ୍କ ଝିଅ ତଥା ତେଲେଙ୍ଗାନା ବିଧାନ ପରିଷଦ ସଦସ୍ୟା କବିତା(MLC Kavitha threatens to slap BJP MP with slipper) । ତାଙ୍କ ବିରୁଦ୍ଧରେ ଆପତ୍ତିଜନକ ମନ୍ତବ୍ୟ ଦେବାକୁ ନେଇ କବିତା ନିଜାମବାଦ ବିଜେପି ସାଂସଦ ଅରବିନ୍ଦ ଧର୍ମପୁରୀଙ୍କୁ ରାସ୍ତା ଉପରେ ଚପଲରେ ପିଟିବାକୁ ଧମକାଇଛନ୍ତି । ମୁଖ୍ୟମନ୍ତ୍ରୀ କେସିଆର ଏବଂ ତାଙ୍କ ପୁଅ କେଟିଆର ଓ ଝିଅ କବିତା ଅତ୍ୟନ୍ତ ଅହଙ୍କାରୀ ବୋଲି ଅରବିନ୍ଦ କହିଥିଲେ । ଏହାକୁ କେନ୍ଦ୍ରକରି ଟିଆରଏସ(TRS) ନେତ୍ରୀ ତାଙ୍କୁ ମାଡ ମାରିବାକୁ ଧମକ ଦେଇଛନ୍ତି ।
ସୂଚନା ମୁତାବକ, ତେଲେଙ୍ଗାନା ବିଧାନ ପରିଷଦ ସଦସ୍ୟା(MLC) କବିତା କଂଗ୍ରେସ ସହ ଯୋଗଯୋଗରେ ଥିବା କିଛି ଦିନ ତଳେ ସାଂସଦ ଅରବିନ୍ଦ ଧର୍ମପୁରୀ ବୟାନ ଦେଇଥିଲେ । ଏହାର ପ୍ରତିବାଦରେ ଭାରତ ରାଷ୍ଟ୍ରୀୟ ସମିତି(BRS) କର୍ମକର୍ତ୍ତା ସାଂସଦଙ୍କ ହାଇଦ୍ରାବାଦ ସ୍ଥିତ ବାସଭବନରେ ପ୍ରବଳ ଭଙ୍ଗାରୁଜା କରିବା ସହ ତାଙ୍କର କୁଶ ପୁତ୍ତଳିକା ଦାହ କରିଥିଲେ । ଘର ଉପରେ ଆକ୍ରମଣ ଘଟଣାରେ ବିଆରଏସକୁ କଡା ସମାଲୋଚନା କରିଥିଲେ ଅରବିନ୍ଦ ଧର୍ମପୁରୀ । ସେ କହିଥିଲେ ଯେ, ଯଦି କେହି କିଛି ମନ୍ତବ୍ୟ ଦେଉଛି ତାହାହେଲେ ସେମାନେ କ'ଣ ସିଧାସଳଖ ଆକ୍ରମଣ କରିବେ ? ବିଆରଏସ ମୋ ଘରେ ଯେପରି ଭଙ୍ଗାରୁଜା କରିଛି ସେମିତି ମୁଖ୍ୟମନ୍ତ୍ରୀଙ୍କ ବାସଭବନରେ କରିପାରିବେ କି ? ମୁଖ୍ୟମନ୍ତ୍ରୀ କେସିଆର, କେଟିଆର ଓ କବିତା ଖୁବ୍ ଗର୍ବୀ ଓ ଅହଙ୍କାରୀ ଅଟନ୍ତି ।''
ଏଥିରେ ଉତ୍କ୍ଷିପ୍ତ ହୋଇ କବିତା କହିଥିଲେ, ଯଦି ତୁମେ ମୋ ବିରୁଦ୍ଧରେ ଆଗକୁ ଏହିଭଳି କଥା କୁହ ତାହାହେଲେ ନିଜାମବାଦ ରାସ୍ତାର ଉପରେ ତୁମକୁ ଚପଲରେ ମାଡ ମାରିବାକୁ ମୁଁ ପଛାଇବି ନାହିଁ । ଟିଆରଏସ ନେତ୍ରୀ ସାଂସଦଙ୍କ ମନ୍ତବ୍ୟକୁ ଶସ୍ତା କହିବା ସହ ତାଙ୍କୁ ଉଚିତ୍ ବ୍ୟବହାର ଜଣାନାହିଁ । ରାଜନୀତି କର, ହେଲେ ଖରାପ ବ୍ୟବହାର ନୁହେଁ ବୋଲି କହିଥିଲେ ।
