ପାଟନା: ବିହାରରେ ୭ ବର୍ଷୀୟା ନାବାଳିକାକୁ ଦୁଷ୍କର୍ମ । ସାଙ୍ଗ ସହ ସ୍କୁଲକୁ ଦୋଳି ଖେଳିବାକୁ ଯାଇଥିବାବେଳେ ନାବାଳିକା ସହ ଦୁଷ୍କର୍ମ କଲା ନିଶାସକ୍ତ ଯୁବକ । ଚାରିଆଡେ ହୋଲି ସେଲିବ୍ରେସନରେ ସମସ୍ତେ ମସଗୁଲ ଥିବା ସମୟରେ ବିହାରର ବେଗୁସରାଇରେ ଏଭଳି ଲଜ୍ଜାଜନକ ଘଟଣା ଘଟିଛି । ପୀଡିତା ନାବାଳିକା ନିଜର ସାଙ୍ଗ ସହ ଗାଁ ସ୍କୁଲ ନିକଟରେ ଖେଳୁଥିଲା । ଏହି ସମୟରେ ନିଶାରେ ଚୂର ଗାଁର ଜଣେ ଯୁବକ ଦୁଇ ନାବାଳିକାଙ୍କୁ ଅସଦାଚରଣ କରିଥିଲା । ଉଭୟ ଡରି ଯାଇ ସ୍କୁଲରେ ଥିବା ଶୌଚାଳୟରେ ଲୁଚି ଥିବାବେଳେ ଅଭିଯୁକ୍ତ ସେଠାରେ ଜଣଙ୍କୁ ଦୁଷ୍କର୍ମ କରିବା ସହ ଅନ୍ୟ ନାବାଳିକାର ଗାଲକୁ ଦାନ୍ତରେ କାମୁଡି ଛିଣ୍ଡାଇଥିବା ଅଭିଯୋଗ ହୋଇଛି ।
ଅଭିଯୋଗ ମୁତାବକ, ବେଗୁସରାଇ ସାହେବପୁର ଥାନା ଅଞ୍ଚଳରେ ଏହି ପାଶବିକ କାଣ୍ଡ ଘଟିଛି । ଗତକାଲି ହୋଲି ଉତ୍ସବ ପାଇଁ ସମସ୍ତେ ରଙ୍ଗ ଖେଳରେ ମସଗୁଲ ଥିଲେ । ଏହି ସମୟରେ ସ୍ଥାନୀୟ ଅଞ୍ଚଳର ଦୁଇ ନାବାଳିକା ଖେଳିବା ପାଇଁ ଗାଁ ସ୍କୁଲ ନିକଟକୁ ଯାଇଥିଲେ । ଦୁହେଁ ଖେଳୁଥିବା ବେଳେ ଛୋଟୁ ନାମକ ଯୁବକ ନିଶାସକ୍ତ ଅବସ୍ଥାରେ ସେଠାରେ ପହଞ୍ଚି ଥିଲା । ଅଭିଯୁକ୍ତ ଦୁଇ ନାବାଳିକାଙ୍କ ସହ ଅସଦାଚରଣ କରିଥିଲା । ଏଥିରେ ଉଭୟ ଭୟଭୀତ ହୋଇ ଦୌଡି ଯାଇ ଶୌଚାଳୟ ଭିତରେ ବନ୍ଦ ହୋଇଯାଇଥିଲେ । ଏହାପରେ ଛୋଟୁ କୌଣସିମତେ ଭିତରେ ପ୍ରବେଶ କରିଥିଲା ।
ଶୌଚାଳୟ ଭିତରେ ସେ ଦୁହିଁଙ୍କ ସହ ଦୁଷ୍କର୍ମ କରିବାକୁ ଚେଷ୍ଟା କରିଥିଲା । ନିଶାସକ୍ତ ଯୁବକ ୭ ବର୍ଷୀୟା ନାବାଳିକା ସହ ଦୁଷ୍କର୍ମ କରିଥିବା ବେଳେ ତା'ର ୯ ବର୍ଷୀୟା ନାବାଳିକା ସାଙ୍ଗର ଗାଲକୁ ଦାନ୍ତରେ କାମୁଡି ଖଣ୍ଡିଆ କରିଦେଇଥିଲା । ତେବେ ୯ ବର୍ଷୀୟା ଝିଅଟି କୌଣସିମତେ ସେଠାରୁ ଖସି ପଳାଇ ଆସି ପରିବାର ଲୋକଙ୍କୁ ସବୁକଥା ଜଣାଇଥିଲା । ଏହାପରେ ପରିବାର ଲୋକେ ଏବଂ ଗ୍ରାମବାସୀ ମିଶି ସ୍କୁଲରେ ପହଞ୍ଚିଥିଲେ । ଏହି ସମୟରେ ଶୌଚାଳୟ ଭିତରେ ପୀଡିତା ପଡିଥିବା ଦେଖିବାକୁ ପାଇଥିଲେ । ସଙ୍ଗେସଙ୍ଗେ ନାବାଳିକାକୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେହିପରି ଅନ୍ୟ ନାବାଳିକାର ମଧ୍ୟ ଚିକିତ୍ସା କରାଯାଇଥିଲା ।
ଏନେଇ ଥାନାରେ ଅଭିଯୋଗ ପରେ ପୋଲିସ ଅଭିଯୁକ୍ତ ଯୁବକକୁ ଗିରଫ କରିଛି । ଦୁଇ ନାବାଳିକା ସ୍କୁଲ କ୍ୟାମ୍ପସରେ ଲାଗିଥିବା ଦୋଳି ଖେଳିବାକୁ ଯାଇଥିବା ବେଳେ ଦୁଷ୍କର୍ମର ଶିକାର ହୋଇଥିବା ପୀଡିତାଙ୍କ ପରିବାର ଲୋକ କହିଛନ୍ତି । ଏହି ଦୁଷ୍କର୍ମ ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଛି । ତେବେ ଗିରଫ ଅଭିଯୁକ୍ତ ଯୁବକ ବିବାହିତ ଓ ତା'ର ତିନୋଟି ସନ୍ତାନ ଥିବା ସୂଚନା ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
