ଶ୍ରୀନଗର: ଉତ୍ତର କାଶ୍ମୀରର ସୋପରର ଦଙ୍ଗୱାଚି ଅଞ୍ଚଳରେ ସୁରକ୍ଷାବଳକୁ ବଡ ସଫଳତା । AI-Badr ର ତିନି ଆତଙ୍କବାଦୀ ଓ ୪ ସହଯୋଗୀଙ୍କୁ ମିଶାଇ ମୋଟ ୭ ଜଣଙ୍କୁ ଗିରଫ କରିଛି ସୁରକ୍ଷା ବାହିନୀ । ସେମାନଙ୍କ ନିକଟରୁ ବିପୁଳ ପରିମାଣର ବିସ୍ଫୋରକ ସାମଗ୍ରୀ ଓ ମାରଣାସ୍ତ୍ର ଜବତ ହୋଇଥିବା ସ୍ଥାନୀୟ ପୋଲିସ ପକ୍ଷରୁ ସୂଚନା ମିଳିଛି ।
ସୋପୋର ଅଞ୍ଚଳରେ ଆତଙ୍କୀ ଗତିବିଧି ନେଇ ସୂଚନା ମିଳିବା ପରେ ସ୍ଥାନୀୟ ପୋଲିସ ଓ ସୁରକ୍ଷା ବଳ ପକ୍ଷରୁ ମିଳିତ ଅପରେସନ ଆରମ୍ଭ କରାଯାଇଥିଲା । ଚଢ଼ାଉ ବେଳେ AI-Badr ପୋଷାକର ତିନିଜଣ ସକ୍ରିୟ ଆତଙ୍କବାଦୀଙ୍କ ସମେତ ଅନ୍ୟ ୪ ସହଯୋଗୀଙ୍କୁ ଗିରଫ କରାଯାଇଥିଲା । ଗିରଫ ଆତଙ୍କବାଦୀମାନେ ରାୱୋଚା ରାଫିଆବାଦର ୱାରିସ୍ ତନ୍ତ୍ରା, ନୋପୋରା ସୋପୋରର ଆମୀର ସୁଲତାନ ୱାନି ଏବଂ ଚଣ୍ଟିପୋରା ହ୍ୟାଣ୍ଡୱାରାର ତାରିକ ଅହମ୍ମଦ ଭଟ୍ଟ ବୋଲି ପ୍ରାଥମିକ ଭାବେ ପୋଲିସ ଜାଣିବାକୁ ପାଇଛି ।
ସେମାନଙ୍କ ନିକଟରୁ ବିପୁଳ ଅସ୍ତ୍ରଶସ୍ତ୍ର ସହ ଗୁଳି ଜବତ କରାଯାଇଛି । ଏହି ଘଟଣାରେ ପୋଲିସ ପକ୍ଷରୁ ଏକ ମାମଲା ରୁଜୁ କରାଯାଇଛି ତଦନ୍ତ ଆରମ୍ଭ କରାଯାଇଛି । ପଚରାଉଚରା ବେଳେ ସେମାନଙ୍କ ନିକଟରୁ ଅନେକ ଗୁରୁତ୍ବପୂର୍ଣ୍ଣ ତଥ୍ୟ ମିଳିପାରିବା ନେଇ ପୋଲିସ ଆଶା ରଖିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
