ନୂଆଦିଲ୍ଲୀ: ମେକ୍ସିକୋ ବୈଦେଶିକ ମନ୍ତ୍ରୀ ମାର୍ସେଲୋ ଏବ୍ରାର୍ଡ କାସାବୋନ(Marcelo Ebrard Casaubon) ଦୁଇ ଦିନିଆ ଭାରତ ଗସ୍ତରେ ଆସିଛନ୍ତି । ସେ ଆଜି(ବୁଧବାର) ସକାଳେ ଦିଲ୍ଲୀରେ ପହଞ୍ଚିଛନ୍ତି । ମେକ୍ସିକୋର ବୈଦେଶିକ ମନ୍ତ୍ରୀ ଭାବେ ମାର୍ସେଲୋ ଏବ୍ରାର୍ଡଙ୍କ ଏହା ପ୍ରଥମ ଭାରତ ଯାତ୍ରା ଅଟେ । ଭାରତରେ ତାଙ୍କୁ ସ୍ବାଗତ କରି ବୈଦେଶିକ ମନ୍ତ୍ରଣାଳୟ ମୁଖପାତ୍ର ଅରିନ୍ଦମ ବାଗଚୀ ଟ୍ବିଟ୍ କରିଛନ୍ତି ଯେ, ମେକ୍ସିକୋ ବୈଦେଶିକ ମନ୍ତ୍ରୀଙ୍କ ଏହି ଗସ୍ତ ଅବସରରେ ଭାରତ ଓ ମେକ୍ସିକୋ ମଧ୍ୟରେ ଚାଲିଥିବା ସହଯୋଗ ଏବଂ ଭାଗିଦାରୀକୁ ଆହୁରି ମଜବୁତ କରିବା ଉପରେ ଚର୍ଚ୍ଚା ହେବ ।
ମନ୍ତ୍ରଣାଳୟ କହିଛି, ମେକ୍ସିକୋ ବୈଦେଶିକ ମନ୍ତ୍ରୀଙ୍କ ଦୁଇ ଦିନିଆ ଗସ୍ତ ଅବସରରେ ସେ ଏବଂ ଭାରତ ବିଦେଶ ମନ୍ତ୍ରୀ ଏସ ଜୟଶଙ୍କର ଦ୍ବିପାକ୍ଷିକ ସମ୍ପର୍କର ବିସ୍ତୃତ ସମୀକ୍ଷା କରିବେ ଏବଂ ଦୁଇ ରାଷ୍ଟ୍ରର ହିତ ସମ୍ବନ୍ଧୀୟ ମୁଦ୍ଦା ଉପରେ ଆଲୋଚନା କରିବେ । ବର୍ତ୍ତମାନ ଲାଟିନ ଆମେରିକାରେ ମେକ୍ସିକୋ ଭାରତର ଦ୍ବିତୀୟ ସର୍ବବୃହତ ବାଣିଜ୍ୟିକ ଭାଗିଦାରୀ(trade partner) ଅଟେ ଏବଂ ୨୦୨୧-୨୨ ବର୍ଷ ପାଇଁ ଭାରତ ସହ ଜାତିସଂଘ ସୁରକ୍ଷା ପରିଷଦର ସଦସ୍ୟ ମଧ୍ୟ ଅଟେ । ଗତବର୍ଷ ସେପ୍ଟେମ୍ବରରେ ଜୟଶଙ୍କର ମେକ୍ସିକୋ ସିଟି ଯାତ୍ରା କରିଥିଲେ । ଭାରତ ବୈଦେଶିକ ମନ୍ତ୍ରୀଙ୍କ ଗସ୍ତ ପରେ ମେକ୍ସିକୋ ବୈଦେଶିକ ମନ୍ତ୍ରୀ ଏହି ଗସ୍ତ କରିଛନ୍ତି । ଏହି ଯିବାଆସିବା ଦୁଇ ରାଷ୍ଟ୍ର ମଧ୍ୟରେ ଭାଗିଦାରୀକୁ ଆହୁରି ସୁଦୃଢ କରିବ ବୋଲି କୁହାଯାଇଛି ।
@ANI
