ମୁମ୍ବାଇ: ମହାରାଷ୍ଟ୍ରରେ ରାଜନୈତିକ ହାଇଡ୍ରାମା ଜାରି ରହିଛି । ଶିବସେନାର ୩୭ ବିଦ୍ରୋହୀ ବିଧାୟକଙ୍କୁ ନେଇ ଆସାମ ଗୌହାଟୀରେ ଡେରା ପକାଇଛନ୍ତି ବିଦ୍ରୋହର ମୁଖ୍ୟ ନାୟକ ଏକନାଥ ସିନ୍ଧେ । ଏହାରି ଭିତରେ ଆଜି ସିନ୍ଧେଙ୍କୁ ଗୃହରେ ନିଜର ନେତା ଘୋଷଣା କରିଛନ୍ତି ବିଦ୍ରୋହୀ ବିଧାୟକ । ସେମାନେ ଏ ସଂକ୍ରାନ୍ତୀୟ ଏକ ଚିଠି ଆଜି(ଗୁରୁବାର) ମହାରାଷ୍ଟ୍ର ବିଧାନସଭା ଉପବାଚସ୍ପତି ନରହରି ଜିରୱାଲଙ୍କୁ ପଠାଇଛନ୍ତି । ବିଧାନସଭା ଗୃହରେ ଏକନାଥ ସିନ୍ଧେ ବିଧାୟକ ଦଳର ନେତା ରହିବେ ବୋଲି ଚିଠିରେ କୁହାଯାଇଛି ।
କିନ୍ତୁ ଏହାର ଗୋଟିଏ ଦିନ ପୂର୍ବରୁ ଉପବାଚସ୍ପତି ସିନ୍ଧେଙ୍କ ସ୍ଥାନରେ ଅଜୟ ଚୌଧୁରୀଙ୍କୁ ଗୃହରେ ଶିବସେନାର ବିଧାୟକ ଦଳ ନେତା ରୂପେ ମଞ୍ଜୁରୀ ଦେଇଥିଲେ । ହେଲେ ସିନ୍ଧେଙ୍କୁ ନେତା କରିବା ପାଇଁ ସମସ୍ତ ୩୭ ବିଦ୍ରୋହୀ ବିଧାୟକ ନିଜର ହସ୍ତକ୍ଷର ସମ୍ବଳିତ ଏକ ଚିଠି ଉପବାଚସ୍ପତିଙ୍କୁ ପଠାଇଛନ୍ତି । ଏଥିସହ ସୁନୀଲ ପ୍ରଭୁଙ୍କ ସ୍ଥାନରେ ଶିବସେନା ବିଧାୟକ ଭରତ ଗୋଗାୱଲେଙ୍କୁ ବିଧାୟକ ଦଳର ମୁଖ୍ୟ ସଚେତକ ରୂପେ ନିଯୁକ୍ତି କରାଯାଇଥିବା ଚିଠିରେ ସୂଚିତ କରିଛନ୍ତି ।
ସେହିପରି ସୁନୀଲ ପ୍ରଭୁଙ୍କ ଦ୍ବାରା ଡକାଯାଇଥିବା ବୈଠକରେ ବିଦ୍ରୋହୀ ବିଧାୟକମାନେ ସାମିଲ ନ ହେବା ଯୋଗୁଁ ପ୍ରଭୁ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରିବା ଘଟଣାରେ ପ୍ରତିକ୍ରିୟାଶୀଳ ହୋଇଛନ୍ତି ସିନ୍ଧେ । ''ହ୍ବିପ୍ କେବଳ ବିଧାନସଭା କାର୍ଯ୍ୟ ପାଇଁ ଜାରି ହୋଇଥାଏ । ଆମେ ଆପଣଙ୍କ ଚାଲାଖି ଭଲ ଭାବେ ଜାଣିଛୁ ଏବଂ ଆଇନକୁ ମଧ୍ୟ ବୁଝିଛୁ'' ବୋଲି ସନ୍ଧେ ଟ୍ବିଟ୍ କରିଛନ୍ତି ।
