ମୁମ୍ବାଇ: ମହାରାଷ୍ଟ୍ରର ଭିୱାଣ୍ଡିରେ ଭୟାବହ ଅଗ୍ନିକାଣ୍ଡ । ଭିୱାଣ୍ଡିରେ ମହାଲକ୍ଷ୍ମୀ ନାମକ ଏକ ଫନିଚର ଗୋଦାମରେ ଏକ ବଡ ଧରଣର ଅଗ୍ନିକାଣ୍ଡ ଘଟିଛି । ଏନେଇ ଖବର ପାଇ ଘଟଣାସ୍ଥଳରେ ୪ରୁ ୫ଟି ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ । ତେବେ ଏହି ଘଟଣାରେ ଲକ୍ଷାଧିକ ଟଙ୍କାର ଆସବାପତ୍ର ପୋଡି ପାଉଁଶ ହୋଇଯାଇଥିବା ବେଳେ କେହି ମୃତହାତ ହୋଇନଥିବା ସୂଚନା ମିଳିଛି ।
ମିଳିଥିବା ସୂଚନା ଅନୁଯାୟୀ ଗତକାଲି ରାତିରେ କୌଣସି କାରଣବଶତଃ ମହାଲକ୍ଷ୍ମୀ ଫନିଚର ଗୋଦାମରେ ନିଆଁ ଲାଗିଯାଇଥିଲା । ଗୋଦାମରେ କାଠରେ ତିଆରି ଆସବାପତ୍ର ଅଧିକ ଥିବାରୁ ନିଆଁ ଶୀଘ୍ର ପୁରା ଗୋଦାମରେ ବ୍ୟାପିବା ସହ ଆଖପାଖ କିଛି ଦୋକାନକୁ ମଧ୍ୟ ବ୍ୟାପିଥିଲା । ଫଳରେ ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲା । ତେବେ କେଉଁ କାରଣରୁ ଅଗ୍ନିକାଣ୍ଡ ଘଟିଲା ସେନେଇ କିଛି ସୂଚନା ମିଳିପାରି ନାହିଁ । ଅଗ୍ନିକାଣ୍ଡ ଖବର ପାଇ ସ୍ଥାନୀୟ ନାରପୋଲି ପୋଲିସର ଏକ ଟିମ୍ ଘଟଣାସ୍ଥଳରେ ପହଞ୍ଚି ଉକ୍ତ ଅଞ୍ଚଳରେ ବିଦ୍ୟୁତ୍ ଯୋଗାଣ ବନ୍ଦ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
