ରାୟପୁର: ଛତିଶଗଡ ବିଳାସପୁରରେ ଦିଲ୍ଲୀ କାଞ୍ଝଓ୍ବାଲ କାର ଟ୍ରାଜେଡିର ପୁନରାବୃତ୍ତି । ବାଇକ ଆରୋହୀ ଯୁବକଙ୍କୁ ଧକ୍କା ଦେବା ପରେ ପ୍ରାୟ 20 ମିଟର ଘୋଷାଡି ନେଲା କାର । କାରରେ ଜଣେ ଯୁବକ ଓ ଯୁବତୀ ନିଶାସକ୍ତ ଅବସ୍ଥାରେ ଥିବା ସ୍ଥାନୀୟ ପ୍ରତ୍ୟେକ୍ଷଦର୍ଶୀ କହିଛନ୍ତି । ଯୁବକଙ୍କୁ ପ୍ରାୟ 20 ମିଟର ଘୋଷାଡି ନେବା ପରେ କାର ଏକ ଖମ୍ବରେ ପିଟି ହୋଇ ଅଟକି ରହିଥିଲା । ଫଳରେ କାରରେ ଲାଖି ରହିଥିବା ଯୁବକଜଣଙ୍କ ଖସିପଡି ଅଳ୍ପକେ ମୃତ୍ୟୁମୁଖରୁ ବର୍ତ୍ତିଯାଇଛନ୍ତି ।
ବିଳାସପୁର ପୁରୁଣା ବସ ଷ୍ଟାଣ୍ଡ ନିକଟରେ ଏହି କାରଟି ଯୁବକଙ୍କ ବାଇକକୁ ଧକ୍କା ଦେଇଥିଲେ । ହେଲେ ଦୁର୍ଘଟଣା ପରେ ମଧ୍ୟ କାର ଡ୍ରାଇଭର କାର ରୋକି ନଥିଲେ । କାରରେ ବାଇକ ଆରୋହୀଜଣଙ୍କ ଲାଖି ରହିଥିଲେ । ସ୍ଥାନୀୟ ଲୋକେ ଚିତ୍କାର କରି କାରକୁ ରୋକିବା ପାଇଁ ଉଦ୍ୟମ କରିଥିଲେ ସୁଦ୍ଧା କାରଟି ଅଟକି ନଥିଲା । କିଛି ଦୂର ଯିବା ପରେ କାରଟି ଏକ ଖମ୍ବରେ ଧକ୍କା ଖାଇ ଅଟକି ଯାଇଥିଲା । ଯୁବକଙ୍କୁ କାରରୁ ଉଦ୍ଧାର କରାଯାଇଛି । ତାଙ୍କ ଶରୀର ଏକାଧିକ ସ୍ଥାନରେ ଆଘାତ ଲାଗିଛି ।
ସ୍ଥାନୀୟ ଲୋକେ କାରକୁ ଘେରିଯାଇଥିଲେ । ସେଥିରେ ଥିବା ଯୁବକ ଓ ଯୁବତୀ ମଦ୍ୟପାନ କରି ନିଶାସକ୍ତ ଅବସ୍ଥାରେ ଥିବା ଜଣାପଡିବା ପରେ ଉତ୍ତେଜନା ପ୍ରକାଶ ପାଇଥିଲା । ଲୋକେ କାର ଚଳାଉଥିବା ଯୁବକକୁ ନିର୍ଧୁମ ମାଡ ମାରିଥିଲେ । ପରେ ସ୍ଥାନୀୟ ପୋଲିସ ସୂଚନା ପାଇ ଘଟଣାସ୍ଥଳରେ ପହଞ୍ଚିବା ପରେ ସ୍ଥିତି ଆୟତକୁ ଆସିଥିଲା । ପୋଲିସ କାରକୁ ଜବତ କରିବା ସହ ଉଭୟ ଯୁବକ ଓ ଯୁବତୀଙ୍କୁ ଥାନାକୁ ନେଇଥିଲା ।
2022 ଡିସେମ୍ବର 31 ରେ ଦିଲ୍ଲୀର କାଞ୍ଝାଓ୍ବାଲରେ ଘଟିଥିବା କାର ଟ୍ରାଜେଡି ସାରା ଦେଶରେ ଚହଳ ପକାଇଥିଲା । ଏକ ସୁଜୁକି ବାଲେନୋ ଧକ୍କା ଦେବା ପରେ ସ୍କୁଟି ଆରୋହୀ ଯୁବତୀଙ୍କୁ ପ୍ରାୟ 12 କି.ମି ପର୍ଯ୍ୟନ୍ତ ଘୋଷାଡି ନେଇଥିଲା । ଏଥିରେ ଯୁବତୀଙ୍କର ଶୋଚନୀୟ ମୃତ୍ୟୁ ହୋଇଥିଲା । ଘଟଣା ସମ୍ପର୍କରେ ଜଣାପଡିବା ପରେ ଦିଲ୍ଲୀ ମହିଳା ଆୟୋଗ ଦିଲ୍ଲୀ ପୋଲିସକୁ ସମନ ଜାରି କରିଥିଲା । ଏହି ଘଟଣାରେ କାରରେ ଥିବା ସମସ୍ତ 5 ଯୁବକଙ୍କ ସମେତ ମୋଟ 7 ଜଣଙ୍କୁ ଗିରଫ କରାଯାଇଥିଲା । କେନ୍ଦ୍ର ଗୃହ ମନ୍ତ୍ରଣାଳୟ କାର୍ଯ୍ୟରେ ଅବହେଳା ପାଇଁ ଦିଲ୍ଲୀ ପୋଲିସର 11 ଅଧିକାରୀ ଓ କର୍ମଚାରୀଙ୍କୁ ଚାକିରିରୁ ନିଲମ୍ବିତ ମଧ୍ୟ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
