ନୂଆଦିଲ୍ଲୀ: ସାବଧାନ ! ଯଦି ଆପଣ ସାଇବର ଠକେଇ କିମ୍ବା ଝିଅମାନଙ୍କୁ ହଇରାଣ କରିବାକୁ ଯୋଜନା କରୁଛନ୍ତି ସାବଧାନ ହୋଇଯାଆନ୍ତୁ । କାରଣ ଏବେ ଏପରି ଅପରାଧୀଙ୍କୁ ସାବାଡ୍ କରିବା ପାଇଁ ଆଗେଇ ଆସିଛନ୍ତି ଗାଜିଆବାଦର ଝିଅ କାମାକ୍ଷୀ ଶର୍ମା । ସ୍ୱର୍ଗ, ମର୍ତ୍ତ୍ୟ, ପାତାଳରେ ରହିଲେବି ଅପରାଧୀକୁ ଖୋଜି ଜେଲର 4 କାନ୍ଥକୁ ପଠାଇ ପାରନ୍ତି କାମାକ୍ଷୀ ।
ଏଥିପାଇଁ ତାଙ୍କ ନାମ ଗିନିଜ ୱାର୍ଲ୍ଡ ରେକର୍ଡରେ ସ୍ଥାନ ପାଇଛି । ସାଇବର କ୍ରାଇମକୁ ରୋକିବା ଏବଂ 50 ହଜାର ପୋଲିସଙ୍କୁ ତାଲିମ ଦେବା କ୍ଷେତ୍ରରେ ତାଙ୍କ ନାମ 'ୱାର୍ଲ୍ଡ ବୁକ୍ ଅଫ୍ ରେକର୍ଡ'ରେ ପଞ୍ଜିକୃତ ହୋଇଛି । କାମାକ୍ଷୀ ତାଙ୍କ କଲେଜ ସମୟରେ ବନ୍ଧୁମାନଙ୍କ ID ହ୍ୟାକିଂ କରୁଥିଲେ । ଏବେ ଏହାକୁ ସେ ବୃତ୍ତିରେ ପରିଣତ କରିଛନ୍ତି । ବର୍ତ୍ତମାନ ସେ ସାଇବର କ୍ରାଇମକୁ ରୋକିବା ପାଇଁ ଲୋକଙ୍କୁ ତାଲିମ ଦେଉଛନ୍ତି |
କୋରୋନା ମହାମାରୀ ସମୟରେ ଅଧିକାଂଶ ଲୋକ ନିଜ ଘରୁ କାମ କରୁଛନ୍ତି ଅଥବା ୱାର୍କ ଫ୍ରମ୍ ହୋମରେ ଅଛନ୍ତି । ଏଭଳି ପରିସ୍ଥିତିରେ ସାଇବର ଠକେଇ ଦ୍ରୁତ ଗତିରେ ବୃଦ୍ଧି ପାଉଛି । ଝିଅମାନଙ୍କ ପ୍ରତି ଦୁର୍ବ୍ୟବହାର ମଧ୍ୟ ବଢିବା ସହ ସାଇବର ଠକେଇ ମାଧ୍ୟମରେ ଲକ୍ଷ ଲକ୍ଷ ଟଙ୍କା ଲୁଟ୍ ହେଉଛି । ଏନେଇ କାମାକ୍ଷୀ 2019 ରେ ଜାମ୍ମୁ ରୁ କନ୍ୟାକୁମାରୀ ପର୍ଯ୍ୟନ୍ତ ଏକ 35 ଦିନିଆ ମିଶନ ଆରମ୍ଭ କରିଥିଲେ, ଯେଉଁଥିରେ ସାଇବର ଅପରାଧର ମୁକାବିଲା ପାଇଁ ପୋଲିସ କର୍ମଚାରୀଙ୍କୁ ପରୀକ୍ଷା କରାଯାଇଥିଲା । ଏହି ପରୀକ୍ଷଣରେ ଆଇପିଏସ୍ ଅଧିକାରୀମାନେ ମଧ୍ୟ ଭାଗ ନେଇଥିଲେ । ବର୍ତ୍ତମାନ କାମାକ୍ଷୀଙ୍କ ନାମ 'ୱାର୍ଲ୍ଡ ବୁକ୍ ଅଫ୍ ରେକର୍ଡ'ରେ ସ୍ଥାନ ପାଇବା ପରେ ତାଙ୍କୁ ନେଇ ବିଶ୍ୱବ୍ୟାପୀ ବେଶ୍ ଚର୍ଚ୍ଚା ହେଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
