ବେଙ୍ଗାଲୁରୁ: କର୍ଣ୍ଣାଟକ କଲାବୁରଗି ଅଞ୍ଚଳର ୧୦ ଟଙ୍କିଆ ଡାକ୍ତରଙ୍କ ପ୍ରଶଂସାରେ ପ୍ରଧାନମନ୍ତ୍ରୀ ମୋଦି । ପ୍ରଧାନମନ୍ତ୍ରୀ ଡାକ୍ତର ମାଲ୍ଲାରାଓ ମାଲିଙ୍କ ସେବାକୁ ଭୂୟସୀ ପ୍ରଶଂସା କରିଛନ୍ତି । ଏହି ଡାକ୍ତରଙ୍କୁ ୭୪ ବର୍ଷ ବୟସ ହୋଇଥିବା ବେଳେ ସେ ନିସ୍ବାର୍ଥପର ଭାବେ ଲୋକଙ୍କ ସେବା କରିଆସୁଥିବା ବେଳେ ଏଥିଲାଗି ମାତ୍ର ୧୦ ଟଙ୍କା ନେଉଥିବା ଜଣାପଡ଼ିଛି ।
ସେ ୪୦ ବର୍ଷ ଧରି ଏହି ସେବାରେ ନିୟୋଜିତ ଥିବା ବେଳେ କମ ଅର୍ଥରେ ରୋଗୀଙ୍କ ଚିକିତ୍ସା କରୁଛନ୍ତି । ଏଥିଲାଗି ଜଗତ ସର୍କଲରେ ଥିବା ତାଙ୍କ ହସ୍ପିଟାଲ ଆଗରେ ଲୋକଙ୍କ ଲମ୍ବା ଲାଇନ ଲାଗୁଛି । ସେ କୋଭିଡ଼ ମହାମାରୀ ସମୟରେ ମଧ୍ୟ ସେବା ଯୋଗାଇ ଆସୁଥିଲେ । ଅନେକ ଅଭିଜ୍ଞ ଡାକ୍ତର କୋରୋନା ଭୟରେ ରୋଗୀ ସେବା ବନ୍ଦ କରିଥିବା ବେଳେ ସେ ଏହି ସେବା ଜାରି ରଖିଥିଲେ । ଏହାସହିତ ସେ ପ୍ରାୟ ୨ ଲକ୍ଷ ଲୋକଙ୍କୁ ଟିକା ମଧ୍ୟ ଦେଇଛନ୍ତି ।
ପ୍ରଧାନମନ୍ତ୍ରୀ ମୋଦି ଏହି ଡାକ୍ତରଙ୍କୁ ଚିଠି ଲେଖି ଧନ୍ୟବାଦ ଜଣାଇଛନ୍ତି । ଭାରତ କୋରୋନା ମହାମାରୀ ସମୟରେ ଭୟଭୀତ ଥିବା ବେଳେ ଏଭଳି ଜଣେ ନିର୍ଭୀକ ଡାକ୍ତରଙ୍କ ସେବାକୁ ମୋଦି ପ୍ରଶଂସା କରିଛନ୍ତି । ଏଥିଲାଗି ସେ ଡାକ୍ତରଙ୍କ ପରିବାରକୁ ମଧ୍ୟ ଶୁଭେଚ୍ଛା ଜଣାଇଛନ୍ତି ।
