ନୂଆଦିଲ୍ଲୀ: ଦୁଇଟି ସିଷ୍ଟମରେ (ଦୁଇଟି ବ୍ୟବସ୍ଥା) ଚାଲିପାରିବନାହିଁ ଦେଶର ନ୍ୟାୟପାଳିକା । ଗରିବ ଓ ଧନୀଙ୍କ ପାଇଁ ଲାଗୁ ହୋଇପାରିବନି ଭିନ୍ନଭିନ୍ନ ସିଷ୍ଟମ । ସର୍ବଦା ନ୍ୟାୟପାଳିକା ରାଜନୈତିକ ଚାପରୁ ମୁକ୍ତ ହୋଇ କାର୍ଯ୍ୟ କରିବାର ଆବଶ୍ୟକତା ଥିବା କହିଛନ୍ତି ସୁପ୍ରିମକୋର୍ଟ ।
କଂଗ୍ରେସ ନେତା ଦେବେନ୍ଦ୍ର ଚୌରସିଆ ହତ୍ୟା ଘଟଣା ଉପରେ ଶୁଣାଣି ସମୟରେ ମଧ୍ୟପ୍ରଦେଶ ପୋଲିସକୁ ସମାଲୋଚନା କରି ଏହା କହିଛନ୍ତି ସୁପ୍ରିମକୋର୍ଟ । ହତ୍ୟା ଘଟଣାରେ ସମ୍ପୃକ୍ତ ବହୁଜନ ସମାଜ ପାର୍ଟି ବିଧାୟିକାଙ୍କ ସ୍ବାମୀ ଗୋବିନ୍ଦ ସିଂହଙ୍କୁ ପୋଲିସ ସୁରକ୍ଷା ଯୋଗାଉଥିବା କହି ଭର୍ତ୍ସନା କରିଛନ୍ତି ସର୍ବୋଚ୍ଚ କୋର୍ଟ ।
ମାମଲାର ଶୁଣାଣି କରି ଜଷ୍ଟିସ ଡିୱାଇ ଚନ୍ଦ୍ରଚୂଡଙ୍କ ନେତୃତ୍ବାଧିନ ଖଣ୍ଡପୀଠ କହିଛନ୍ତି, ଦେଶର ନ୍ୟାୟପାଳିକା ସ୍ବତନ୍ତ୍ର । ଏହା ସର୍ବଦା ରାଜନୈତିକ ଚାପରୁ ମୁକ୍ତ ରହି କାର୍ଯ୍ୟ କରିବା ଆବଶ୍ୟକ । ପୋଲିସ ଘଟଣାର ସଠିକ ତଦନ୍ତ କରୁନଥିବାରୁ ଗୋବିନ୍ଦ ସିଂହଙ୍କ ଜାମିନ ଆବେଦନ ଖାରଜ କରିଦେଇଛନ୍ତି ସର୍ବୋଚ୍ଚ ନ୍ୟାୟାଳୟ ।
ପୋଲିସ ଅଭିଯୁକ୍ତକୁ ସୁରକ୍ଷା ଦେଉଥିବାରୁ ନ୍ୟାୟପାଳିକା ଉପରେ ଚାପପଡୁଛି । ଏହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ସୁପ୍ରିମକୋର୍ଟ । କେବଳ ଏତିକି ନୁହେଁ, ଟ୍ରାଏଲ କୋର୍ଟ ବିଚାରପତିଙ୍କ ଉପରେ ଅଭିଯୁକ୍ତକୁ ସୁରକ୍ଷା ଦେବା ପାଇଁ ବିଏସପି ବିଧାୟକ ଚାପ ପକାଉଥିବା ମଧ୍ୟ ଅଭିଯୋଗ କରିଛନ୍ତି ଦିବଙ୍ଗତ କଂଗ୍ରେସ ବିଧାୟକଙ୍କ ପୁଅ ।
