ନୂଆଦିଲ୍ଲୀ: ଛାତ୍ର ରାଜନୀତିର ପେଣ୍ଠସ୍ଥଳୀ କୁହାଯାଉଥିବା ରାଜଧାନୀ ଦିଲ୍ଲୀର ପ୍ରତିଷ୍ଠିତ ଜବାହାରଲାଲ ନେହେରୁ ବିଶ୍ବବିଦ୍ୟାଳୟ (JNU)ରେ ଛାତ୍ରଛାତ୍ରୀଙ୍କ କାର୍ଯ୍ୟକଳାପ ଉପରେ ଲାଗିବ ରୋକ । କ୍ୟାମ୍ପସରେ କୌଣସି ପ୍ରସଙ୍ଗରେ ପ୍ରତିବାଦ ସଭାସମତି, ଧାରଣା, ଆନ୍ଦେଳନ ପାଇଁ ନିର୍ଦ୍ଦେଶାବଳି ଜାରି କରିଛି ବିଶ୍ବବିଦ୍ୟାଳୟ କର୍ତ୍ତୃପକ୍ଷ । କ୍ୟାମ୍ପସରେ ଧାରଣା ଦେଲେ 20 ହଜାର ଓ ଜାତୀୟତା ବିରୋଧୀ ମନ୍ତବ୍ୟ ପାଇଁ 10 ହଜାର ଜରିମାନା କାର୍ଯ୍ୟକାରୀ କରାଯାଇଛି । କୌଣସି ଛାତ୍ର ସଂଗଠନ କିମ୍ବା ଛାତ୍ରଛାତ୍ରୀ ଏହାକୁ ଉଲ୍ଲଙ୍ଘନ କଲେ କାର୍ଯ୍ୟାନୁଷ୍ଠାନ ପରିଧିକୁ ଆସିବା ନେଇ କ୍ୟାମ୍ପସ କର୍ତ୍ତୃପକ୍ଷ ବିଜ୍ଞପ୍ତିରେ ସ୍ପଷ୍ଟ କରିଛନ୍ତି ।
ନଭେମ୍ବର 24 ରେ କ୍ୟାମ୍ପସ ଶୃଙ୍ଖଳା କମିଟି ସୁପାରିଶ କରିଥିବା ପ୍ରସ୍ତାବ ଆଧାରରେ ଏହି ନିୟମାବଳି ପ୍ରସ୍ତୁତ କରାଯାଇଛି । କେବଳ ଧାରଣା କିମ୍ବା ପ୍ରତିବାଦ ସଭା ନୁହେଁ ବରଂ 28 ପ୍ରକାର କାର୍ଯ୍ୟକଳାପକୁ ଏହି ନିୟମାବଳିରେ ନିଷେଧ ଶ୍ରେଣୀଭୁକ୍ତ ଘୋଷଣା କରାଯାଇଛି । କ୍ୟାମ୍ପସରେ ଶୃଙ୍ଖଳା ନଷ୍ଟ ହେବା ପରି କାର୍ଯ୍ୟକଳାପକୁ ବ୍ୟାନ କରାଯାଇଛି । କ୍ୟାମ୍ପସରେ ଜୁଆ କିମ୍ବା ବେଟିଂ ଖେଳିବା, ପ୍ରବେଶ ପଥ କିମ୍ବା କୌଣସି ବ୍ଲକ ଓ ବିଭାଗକୁ ଅବରୋଧ କରିବା, ହଷ୍ଟେଲ ରୁମକୁ ଅନଧିକୃତ ଦଖଲ କରିବା, ପ୍ରତିବାଦ କିମ୍ବା ଆମରଣ ଅନଶନ ଆଦି କାର୍ଯ୍ୟକଳାପକୁ ନିଷେଧ ଶ୍ରେଣୀଭୁକ୍ତ କରାଯାଇଛି । କେହି ଛାତ୍ରଛାତ୍ରୀ ଏହି ନିୟମାବଳିକୁ ଇଲ୍ଲଙ୍ଘନ କରି 5 ଥର କାର୍ଯ୍ୟାନୁଷ୍ଠାନ ଶିକାର ହେଲେ ତାଙ୍କ କ୍ୟାମ୍ପସରୁ ବରଖାସ୍ତ ମଧ୍ୟ କରାଯାଇପାରେ ବୋଲି ବିଜ୍ଞପ୍ତିରେ ସ୍ପଷ୍ଟ କରିଛନ୍ତି କର୍ତ୍ତୃପକ୍ଷ ।
ଏହା ମଧ୍ୟ ପଢନ୍ତୁ :- ଇସ୍ତଫା ଦେଲେ ଶିବରାଜ, ରାଜ୍ୟପାଳଙ୍କୁ ଭେଟିଲେ ମୋହନ: ଖୁବଶିଘ୍ର ଶପଥ ଗ୍ରହଣ କାର୍ଯ୍ୟସୂଚୀ
2019 ନିର୍ବାଚନ ପୂର୍ବରୁ ଦେଶ ଓ ବିଦେଶରେ ବେଶ ଚର୍ଚ୍ଚାକୁ ଆସିଥିଲା ଜେଏନୟୁ । ଏପରିକି ଏହି କ୍ୟାମ୍ପସରେ ସେତେବେଳେ ଛାତ୍ର ସଂସଦ ବାମପନ୍ଥୀ ଛାତ୍ର ସଂଗଠନର ଦଖଲରେ ଥିଲା । ତତ୍କାଳୀନ ଛାତ୍ର ସଂସଦ ଅଧ୍ୟକ୍ଷ କହ୍ନେୟା କୁମାରଙ୍କ ଦ୍ବାରା ଆୟୋଜିତ ସଭାରେ ରାଷ୍ଟ୍ର ବିରୋଧୀ ମନ୍ତବ୍ୟ ଦିଆଯାଇଥିବା ଅଭିଯୋଗ ହୋଇଥିଲା । ଏହି ଘଟଣା ସେତେବେଳେ ଜାତୀୟ ରାଜନୀତିକୁ ପ୍ରଭାବିତ କରିବା ସହ ଗଣମାଧ୍ୟମରେ ମଧ୍ଯ ଚର୍ଚ୍ଚାର କେନ୍ଦ୍ରରେ ରହିଥିଲା । କହ୍ନେୟା କୁମାରଙ୍କ ସମେତ ଅନ୍ୟ କିଛି ଛାତ୍ର ନେତାଙ୍କ ବିରୋଧରେ ଦେଶଦ୍ରୋହ ମାମଲା ମଧ୍ୟ ରୁଜୁ କରିବା ସହ ଗିରଫ କରିଥିଲା ଦିଲ୍ଲୀ ପୋଲିସ । ତେବେ ଏହା ପରବର୍ତ୍ତୀ ସମୟରେ ନିର୍ବାଚନ ହେଉ କି ଛାତ୍ର ଆନ୍ଦୋଳନ ସବୁବେଳେ ଚର୍ଚ୍ଚାରେ ରହିଆସିଛି ଦେଶର ଏହି ପ୍ରତିଷ୍ଠିତ ଶିକ୍ଷାନୁଷ୍ଠାନ । ଆଜି କ୍ୟାମ୍ପସରେ ଶୃଙ୍ଖଳା ଆଣିବା ପାଇଁ କର୍ତ୍ତୃପକ୍ଷ ଏକାଧିକ ସର୍ତ୍ତାବଳି ସହ ‘ଷ୍ଟୁଡେଣ୍ଟ କଣ୍ଡକ୍ଟ’ ଜାରି କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
