ନୂଆଦିଲ୍ଲୀ: ପ୍ରକାଶ ପାଇଲା ଜେଇଇ ମେନ ପରୀକ୍ଷା ଫଳ । ସେସନ-1ର ପରୀକ୍ଷା ଫଳ ଏନଟିଏ ସାଇଟରେ ପ୍ରକାଶ ପାଇଛି । NTA JEE ଅଫିସିଆଲ ଓ୍ବେବସାଇଟ jeemain.nta.nic.in ରେ ରେଜଲ୍ଟ ଦେଖିପାରିବେ ପରୀକ୍ଷାର୍ଥୀ । ଏହି ସାଇଟରୁ ନିଜ ମାର୍କସିଟ୍ ମଧ୍ୟ ଡାଉନଲୋଡ କରିପାରିବେ ଛାତ୍ରଛାତ୍ରୀ । ଚଳିତ ବର୍ଷ ଜାନୁଆରୀ 24ରୁ ଫେବୃଆରୀ 1 ଯାଏଁ ପରୀକ୍ଷା ହୋଇଥିଲା । ଯାହାର ଫଳ ଆଜି ପ୍ରକାଶ ପାଇଛି । ସୋମବାର ପରୀକ୍ଷ ଫଳ ପ୍ରକାଶ ପାଇବା ନେଇ କୁହାଯାଉଥିବା ବେଳେ ତାହା ମଙ୍ଗଳବାର ପ୍ରକାଶ ପାଇଛି ।
ପ୍ରଥମେ ଏନଟିଏ ଅଫିସିଆଲ ଓ୍ବେବସାଇଟ jeemain.nta.nic.in କୁ ଯାଆନ୍ତୁ। ଏହାପରେ ଡାହାଣ ପାର୍ଶ୍ବରେ ଥିବା କ୍ୟାଣ୍ଡିଡେଟ ଆକ୍ଟିଭିଟିକୁ କ୍ଲିକ୍ କରନ୍ତୁ । ଏହାପରେ ଦୃଶ୍ୟମାନ ହେଉଥିବା ଜେଇଇ ମେନ 2023 ପେପର 1 ଫଳାଫଳ ପାଇଁ ଲିଙ୍କ 1 କିମ୍ବା 2କୁ କ୍ଲିକ କରନ୍ତୁ । ଏହାପରେ ନିଜର ଆପ୍ଲିକେସନ ନମ୍ବର ଏବଂ ଜନ୍ମତାରିଖକୁ ପାସଓ୍ବାର୍ଡ ଭାବେ ବ୍ୟବହାର କରି ଲଗଇନ୍ କରନ୍ତୁ । ଏହାପରେ ଆପଣ ପରୀକ୍ଷା ଫଳ ଦେଖି ପାରିବେ । ଏହାକୁ ଡାଉନଲୋଡ କରି ପ୍ରିଣ୍ଟାଆଉଟ ମଧ୍ୟ କରିପାରିବେ।
ଚଳିତ ବର୍ଷ 9 ଲକ୍ଷରୁ ଊର୍ଦ୍ଧ୍ବ ପରୀକ୍ଷାର୍ଥୀ ଜେଇଇ ମେନ ସେସନ-1 ପାଇଁ ନାମ ପଞ୍ଜିକୃତ କରିଥିଲେ । ସେଥି ମଧ୍ୟରୁ ପ୍ରାୟ 8.9 ଲକ୍ଷ ପରିକ୍ଷାର୍ଥୀ ପେପର 1(ବିଇ/ବିଟେକ) ପାଇଁ ଏବଂ 0.46 ଲକ୍ଷ ପରୀକ୍ଷାର୍ଥୀ ପେପର 2(ବିଆର୍ଚ/ ବିପ୍ଲାନିଂ) ପାଇଁ ନାମ ପଞ୍ଜିକୃତ କରିଥିଲେ । ଜେଇଇ ମେନ ପରୀକ୍ଷା ପାଇଁ ଜାନୁଆରୀରେ ରେକର୍ଡ ସଂଖ୍ୟକ 95.8 ପ୍ରତିଶତ ପରୀକ୍ଷାର୍ଥୀ ନାମ ପଞ୍ଜିକୃତ କରିଥିଲେ । ଯାହା NTA ପରୀକ୍ଷା ଆୟୋଜନ କରିବା ପରଠୁ ରେକର୍ଡ ସଂଖ୍ୟକ ନାମ ପଞ୍ଜିକୃତ ହୋଇଥିଲା । ଦେଶରେ ବିଭିନ୍ନ ଇଞ୍ଜିନିୟରିଂ କଲେଜ ଯଥା NITs, IITs, ଅନ୍ୟାନ୍ୟ କେନ୍ଦ୍ରୀୟ ଅନୁଦାନ ପ୍ରାପ୍ତ ବୈଷୟିକ ଅନୁଷ୍ଠାନ ଏବଂ ରାଜ୍ୟ ସରକାରଙ୍କ ଦ୍ୱାରା ଅନୁଦାନ ପ୍ରାପ୍ତ ବିଶ୍ୱବିଦ୍ୟାଳୟଗୁଡ଼ିକରେ ଆଡମିଶନ ପାଇଁ ପରୀକ୍ଷା ଦେଇଥିଲେ ପରୀକ୍ଷାର୍ଥୀ । ଯାହାର ଫଳ ନ୍ୟାସନାଲ ଟେଷ୍ଟିଂ ଏଜେନ୍ସିର ଅଫିସିଆଲ୍ ୱେବସାଇଟରେ ଆଜି ଉପଲବ୍ଧ ହୋଇଛି ।
ଚଳିତ ବର୍ଷ ଜେଇଇ ମେନ ପରୀକ୍ଷା ପ୍ରଥମ ଥର ପାଇଁ ଓଡିଆ ଭାଷାରେ ହୋଇଥିଲା। ଇଂରାଜୀ ଓ ହିନ୍ଦୀ ସହିତ ଆସାମୀ, ବଙ୍ଗାଳୀ, ଗୁଜରାଟୀ, କନ୍ନଡ଼, ମାଲାୟଲମ୍, ମରାଠି, ପଞ୍ଜାବୀ, ତାମିଲ, ତେଲୁଗୁ ଓ ଉର୍ଦ୍ଦୁ ଭାଷାରେ ପରୀକ୍ଷା ଦେଇଥିଲେ ଆଶାୟୀ । ନ୍ୟାସନାଲ ଟେଷ୍ଟିଂ ଏଜେନ୍ସି ପକ୍ଷରୁ ଏନେଇ ସୂଚନା ଦିଆଯାଇଥିଲା । ଏକାଡେମିକ ସେସନ 2023-24 ପାଇଁ ଦୁଇଟି ସେସନରେ ଜେଇଇ ମେନ୍ ପରୀକ୍ଷା କରାଯିବାକୁ ନିଷ୍ପତ୍ତି ନିଆଯାଇଥିଲା । ପ୍ରଥମ ସେସନ ରେଜଲ୍ଟ ଆସିଯାଇଥିବା ବେଳେ ଦ୍ବିତୀୟ ସେସନ ଏପ୍ରିଲ ମାସରେ ଅନୁଷ୍ଠିତ ହେବ ।
