ଜୟପୁର: ଦିନକୁ ଦିନ ଜୟପୁର ଅନ୍ତର୍ଜାତୀୟ ବିମାନବନ୍ଦରରେ ସୁନା ଚୋରା ଚାଲାଣ ମାମଲା ବୃଦ୍ଧି ପାଇବାରେ ଲାଗିଛି । ଗତ ୧ବର୍ଷ ମଧ୍ୟରେ ସୁନା ଚୋରା ଚାଲାଣର ଭିନ୍ନ ଭିନ୍ନ ତରିକା ସାମ୍ନାକୁ ଆସିଛି । ଜୟପୁର ଅନ୍ତର୍ଜାତୀୟ ବିମାନବନ୍ଦରରୁ କଷ୍ଟମ ଅଧିକାରୀଙ୍କ ଦ୍ବାରା 369.900 ଗ୍ରାମ ସୁନା ଜବତ ହୋଇଛି । ଯାହାର ଆନୁମାନିକ ମୂଲ୍ୟ 19.45 ଲକ୍ଷ ହେବ ବୋଲି ଅନୁମାନ କରାଯାଇଛି ।
ଯାତ୍ରୀ ଜଣକ ଜୋତାରେ ସୁନା ଧରି ଦୁବାଇରୁ ଏକ ସ୍ପାଇସଜେଟ୍ ବିମାନରେ ଜୟପୁରରେ ପହଞ୍ଚିଥିଲେ । ବିମାନ ବନ୍ଦରରୁ ବାହାରିବା ସମୟରେ କଷ୍ଟମ ଅଧିକାରୀମାନେ ଧରିଥିଲେ । କଷ୍ଟମ ବିଭାଗର ଦଳ ଉଭୟ ସୁନା ନେଉଥିବା ଏବଂ ସୁନା ଦେଉଥିବା ଉଭୟ ବ୍ୟକ୍ତିଙ୍କୁ ଧରିବାରେ ସଫଳ ହୋଇଛି । ଯାତ୍ରୀ ଜଣକ ଜୋତାରେ ତରଳ ଅବସ୍ଥାରେ ରଖିଥିଲେ । କଷ୍ଟମ କମିଶନର ରାହୁଲ ନାଙ୍ଗ୍ରେଙ୍କ ନିର୍ଦ୍ଦେଶରେ ଆସିଷ୍ଟାଣ୍ଟ କମିଶନର ବିବି ଅଟଲ ଅଭିଯୁକ୍ତକୁ ଧରିବାରେ ସଫଳ ହୋଇଛନ୍ତି ।
କଷ୍ଟମ ଅଧିକାରୀଙ୍କ କହିବା ଅନୁଯାୟୀ, ଯାତ୍ରୀ ଜଣକ ଗୁରୁବାର ଦିନ ସ୍ପାଇସଜେଟର ବିମାନ ନମ୍ବର SG-713 ରେ ଜୟପୁର ବିମାନବନ୍ଦରରେ ପହଞ୍ଚିଥିଲେ। ତେବେ ଉକ୍ତ ଯାତ୍ରୀର ଗତିବିଧି ସନ୍ଦେହଜନକ ହେବା ପରେ କଷ୍ଟମ ବିଭାଗ ପିଛା କରିଥିଲା । ଯାତ୍ରୀଙ୍କ ବ୍ୟାଗ ସଂଗ୍ରହ କରିବାକୁ ଆଉ ଜଣେ ବ୍ୟକ୍ତି ବିମାନବନ୍ଦର ବାହାରେ ଆସିଥିଲେ। ବିମାନ ବନ୍ଦର ବାହାରେ କଷ୍ଟମ ବିଭାଗ ପଚରାଉଚରା ଆରମ୍ଭ କରିବା ମାତ୍ରେ ଯାତ୍ରୀ ଜଣକ ବିଚଳିତ ହୋଇଯାଇଥିଲେ ଏବଂ ସନ୍ତୋଷଜନକ ଉତ୍ତର ଦେଇପାରିନଥିଲେ । ସନ୍ଦେହରେ କଷ୍ଟମ ବିଭାଗ ଯାତ୍ରୀଙ୍କ ଜିନିଷପତ୍ର ଖୋଜାଖୋଜି କରିଥିଲେ ।
ଏହି ସମୟରେ ଯାତ୍ରୀଙ୍କ ଜୋତା ଭିତରୁ କାଗଜରେ ଗୁଡ଼ାଯାଇଥିବା ଦୁଇଟି ପଲିଥିନ କ୍ୟାପସୁଲ ମିଳିଥିଲା, ଯେଉଁଥିରେ ସୁନା ହଳଦିଆ ଗ୍ରାନୁଲାର ପେଷ୍ଟ ଆକାରରେ ଲୁଚି ରହିଥିଲା ।ଏହା ପରେ ଯାତ୍ରୀ ସ୍ୱୀକାର କରିଛନ୍ତି ଯେ ଯେଉଁ ବ୍ୟକ୍ତିଙ୍କୁ ସେ ସାମଗ୍ରୀ ହସ୍ତାନ୍ତର କରୁଥିଲେ ସେହି ସୁନା ସଂଗ୍ରହ କରିବାକୁ ଆସିଥିଲେ । କଷ୍ଟମ ଆକ୍ଟ 1962ର ଧାରା ଅନୁଯାୟୀ କଷ୍ଟମ ବିଭାଗ ଏହି ସୁନାକୁ ଜବତ କରିବା ସହ ଉଭୟ ଅଭିଯୁକ୍ତଙ୍କୁ ପଚରାଉଚରା ଜାରି ରଖିଛି ।
