ଦୁବାଇ: ଭାରତର ପ୍ରଗତି ପଥରେ ଦୁବାଇ ଏକ୍ସପୋ । ଉଦଘାଟିତ ହୋଇଛି ଦୁବାଇ ଏକ୍ସପୋ 2020(Dubai Expo 2021 ) ଏହା ଜରିଆରେ ଭାରତକୁ ବିକାଶର ଏକ ବଡ କେନ୍ଦ୍ର ଭାବରେ ପ୍ରଦର୍ଶିତ କରାଯାଇଛି । ଏଥିରେ ସମ୍ଭାବନା ଓ ବୃଦ୍ଧିକୁ ବିଶେଷ ସ୍ତମ୍ଭ ଭାବରେ ରଖାଯାଇଛି ।
ଅକ୍ଟୋବର ପହିଲାରୁ 31 ମାର୍ଚ୍ଚ 2022 ଯାଏଁ ଚାଲିବାକୁ ଥିବା ଏହି ମେଗା ଏକ୍ସପୋରେ ସମସ୍ତଙ୍କୁ ଆକର୍ଷିତ କରୁଛି ଭାରତୀୟ ପାଭିଲିଅନ । ଏହି ପାଭିଲିଅନରେ 600 ବ୍ଲକ୍ର ଗଠନ କରାଯାଇଛି । ଏଥିରେ ଭାରତର ଆର୍ଥିକ ପ୍ରଗତିକୁ ପ୍ରଦର୍ଶିତ କରାଯାଇଛି । ଏକ୍ସପୋ ଭାରତର ବର୍ତ୍ତମାନ ପ୍ରଗତି ସହ କିଭଳି ଏହା ବିଶ୍ବ ନେତୃତ୍ବ ହୋଇ ଉଭା ହୋଇଛି, ତାହା ମଧ୍ୟ ଦର୍ଶାଯାଇଛି ।
ଶୁକ୍ରବାର ଦୁବାଇରେ ଭାରତୀୟ ପାଭିଲିଅନର ଉଦଘାଟନ କରିଛନ୍ତି ବାଣିଜ୍ୟ ମନ୍ତ୍ରୀ ପିୟୁଷ ଗୋଏଲ । ଏନେଇ ସେ ଦୁବାଇ ଗସ୍ତରେ ଅଛନ୍ତି ।
ଏକ୍ସପୋର ଥିମ୍
ଜଳବାୟୁ ଏବଂ ଜୈବ ବିବିଧତା, ମହାକାଶ, ସହରାଞ୍ଚଳ ଓ ଗ୍ରାମୀଣ ବିକାଶ, ନିରନ୍ତରତା ଏବଂ ଅଖଣ୍ଡତା, ସୁବର୍ଣ୍ଣ ଜୟନ୍ତୀ, ଜ୍ଞାନ ଏବଂ ଶିକ୍ଷା, ଭ୍ରମଣ ଏବଂ ସଂଯୋଗ, ବିଶ୍ବ ଲକ୍ଷ୍ୟ, ସ୍ବାସ୍ଥ୍ୟ, ଖାଦ୍ୟ-କୃଷି ଏବଂ ଜୀବିକା ସମେତ 11ଟି ମୌଳିକ ବିଷୟବସ୍ତୁ ଉପରେ ଭାରତୀୟ ପାଭିଲିୟନରେ ସ୍ଥାନ ଦିଯାଇଛି ।
ସାଂସ୍କୃତି ଓ ଐତିହ୍ୟ ଉପରେ ଫୋକସ
ଦୁବାଇ ଏକ୍ସପୋ ମାଧ୍ୟମରେ ଭାରତର କେବଳ ଅର୍ଥନୈତିକ କାର୍ଯ୍ୟକଳାପ ଉପରେ ନୁହେଁ ବରଂ ବିଶ୍ବକୁ ସଂସ୍କୃତି ଏବଂ ଐତିହ୍ୟ ପ୍ରଦର୍ଶନ ଉପରେ ମଧ୍ୟ ଧ୍ୟାନ ଦିଆଯାଇଛି । ତେଣୁ ଚାରି ମହଲା ବିଶିଷ୍ଟ ଭାରତୀୟ ପାଭିଲିଅନର ପ୍ରଥମ ମହଲାରେ ସାଂସ୍କୃତିକ ଐତିହ୍ୟ ପ୍ରଦର୍ଶିତ ହୋଇଛି |
190 ଦେଶ ଅଂଶଗ୍ରହଣ କରିଛନ୍ତି
ଏହି ପ୍ରଦର୍ଶନୀରେ ବିଶ୍ବର 190ଟି ଦେଶ ଅଂଶଗ୍ରହଣ କରିଛନ୍ତି । ଏହି ଦୃଷ୍ଟିରୁ ଭାରତୀୟ ଶିଳ୍ପ ପାଇଁ ଏହାର ଦକ୍ଷତା ପ୍ରଦର୍ଶନ ଏବଂ ପୁଞ୍ଜି ବିନିଯୋଗ ଆକର୍ଷିତ କରିବା ନେଇ ଏହା ଏକ ଉତ୍ତମ ସୁଯୋଗ ପାଲଟିଛି ।
ଅନେକ ମନ୍ତ୍ରଣାଳୟ ଅଂଶଗ୍ରହଣ କରିଛନ୍ତି
ଫାର୍ମା, ନବୀକରଣ ଯୋଗ୍ୟ ଶକ୍ତି, ସ୍ବାସ୍ଥ୍ୟ, ଆୟୁଷ, ବୟନ, ପେଟ୍ରୋଲିୟମ, ପରିବେଶ ଇତ୍ୟାଦି ମନ୍ତ୍ରଣାଳୟ ଏହି ପ୍ରଦର୍ଶନୀରେ ଅଂଶଗ୍ରହଣ କରିଛନ୍ତି ।
15ଟି ରାଜ୍ୟ ଦୁବାଇ ଏକ୍ସପୋରେ ସାମିଲ
ଭାରତର 15 ଟି ରାଜ୍ୟରୁ ଏଠାରେ ପଣ୍ଡାଲ ମଧ୍ୟ ସ୍ଥାପନ କରାଯାଇଛି। ଏଥି ମଧ୍ୟରେ ଉତ୍ତରପ୍ରଦେଶ, କର୍ଣ୍ଣାଟକ, ଗୁଜୁରାଟ ଆଦି ରାଜ୍ୟ ଅନ୍ତର୍ଭୁକ୍ତ | ଆଗାମୀ 6 ମାସ ମଧ୍ୟରେ ଏହି ରାଜ୍ୟଗୁଡ଼ିକର ମୁଖ୍ୟମନ୍ତ୍ରୀ କିମ୍ବା ମନ୍ତ୍ରୀ ମଧ୍ୟ ଏଥିରେ ଅଂଶଗ୍ରହଣ କରିପାରିବେ ।
ଅଂଶଗ୍ରହଣ କରୁଥିବା ପ୍ରତିଷ୍ଠିତ କମ୍ପାନୀ
ସମସ୍ତ ପ୍ରମୁଖ ଭାରତୀୟ କମ୍ପାନୀ ମଧ୍ୟ ଏହି ଏକ୍ସପୋରେ ଭାଗ ନେଇଛନ୍ତି | ଏଥିରେ ଆଇଟିସି, ପତଞ୍ଜଳି, ରିଲାଏନ୍ସ, ଆଦାନୀ ଗ୍ରୁପ୍ ଅନ୍ତର୍ଭୁକ୍ତ |
2020ରେ ହେବାକୁ ଥିଲା ଦୁବାଇ ଏକ୍ସପୋ । ହେଲେ ମହାମାରୀ କୋରୋନା କାରଣରୁ ଏହାକୁ ଆୟୋଜନ କରାଯାଇପାରିନଥିଲା ।
