ନୂଆଦିଲ୍ଲୀ: ଶିଳ୍ପପତି ଗୌତମ ଆଦାନୀଙ୍କୁ ବଡ ଝଟକା । ଟପ୍ ୧୦ କୋଟିପତି ଲିଷ୍ଟିରୁ ବାଦ ପଡିଲେ ଆଦାନୀ । ଆଦାନୀ ବର୍ତ୍ତମାନ ବ୍ଲୁମବର୍ଗ ବିଲିୟନେୟାର ଇଣ୍ଡେକ୍ସରେ ୧୧ ନମ୍ବରକୁ ଖସି ଆସିଛନ୍ତି। ଆମେରିକୀୟ ରିସର୍ଚ୍ଚ ଫର୍ମ ହିଣ୍ଡନବର୍ଗ ରିପୋର୍ଟ ଅନୁଯାୟୀ, ଏସିଆର ଅନ୍ୟତମ ଧନୀ ବ୍ୟକ୍ତି ଗୌତମ ଆଦାନୀ କିଛି ଦିନ ମଧ୍ୟରେ ବହୁ କ୍ଷତି ସହିଛନ୍ତି । ଆଦାନୀ ଗ୍ରୁପ କମ୍ପାନୀଗୁଡିକ ତିନି ଦିନ ମଧ୍ୟରେ ୩୬.୧ ବିଲିୟନ ଡଲାରର କ୍ଷତି କରିଛନ୍ତି। କେବଳ ଏତିକି ନୁହେଁ, କମ୍ପାନୀଗୁଡିକର ସେୟାରରେ ବିପୁଳ ହ୍ରାସ ହେତୁ ଆଦାନୀ ଗ୍ରୁପ୍ ପ୍ରାୟ ୬୫ ବିଲିୟନ ଡଲାରର କ୍ଷତି ସହିଛି। ଯାହା ଫଳରେ ବ୍ଲୁମବର୍ଗ ବିଲିୟନେୟାର ଇଣ୍ଡେକ୍ସରେ ଗୌତମ ଆଦାନୀ ଶ୍ରେଷ୍ଠ ଦଶ ଧନୀ ତାଲିକାରୁ ବାଦ ପଡିଛନ୍ତି । ଆଦାନୀ ଗ୍ରୁପା ହିଣ୍ଡନବର୍ଗ ରିପୋର୍ଟକୁ ଅସ୍ୱୀକାର କରିଛି । ରିପୋର୍ଟକୁ ଅସ୍ୱୀକାର କରିବା ସହ ୪୧୩ ପୃଷ୍ଠାର ବିଶିଷ୍ଠ ଏକ ଉତ୍ତର ପ୍ରକାଶ କରିଛି ।
ହିଣ୍ଡନବର୍ଗ ରିପୋର୍ଟ ପରେ ଆଦାନୀ ଗ୍ରୁପ୍ର ସେୟାର ତଳକୁ ଖସିବାରେ ଲାଗିଛି । ଆଦାନୀ କମ୍ପାନୀର ସେୟାର ଖସିବା କାରଣରୁ ବ୍ଲୁମବର୍ଗ ବିଲିୟନେୟାର ଇଣ୍ଡେକ୍ସରେ ୪ର୍ଥ ସ୍ଥାନରୁ ଏକାଦଶ ସ୍ଥାନକୁ ଖସି ଆସିଛନ୍ତି ଗୌତମ ଆଦାନୀ । ତାଙ୍କ ଗ୍ରୁପ କମ୍ପାନୀଗୁଡିକର ଅଂଶଧନ ହ୍ରାସ ପାଇବାରେ ଲାଗିଛି। ଅନୁମାନ କରାଯାଉଛି ଯେ ଶୀଘ୍ର ଗୌତମ ଆଦାନୀ ମଧ୍ୟ ଏସିଆର ସବୁଠାରୁ ଧନୀ ବ୍ୟକ୍ତିଙ୍କ ମାନ୍ୟତା ମଧ୍ୟ ହରାଇ ପାରନ୍ତି। ଆଦାନୀଙ୍କ ନିଟ ସମ୍ପତ୍ତି ମୂଲ୍ୟ ୮୪.୪ ବିଲିୟନ ଡ଼ଲାରକୁ ଖସି ଆସିଛି। ସେ ବର୍ତ୍ତମାନ ରିଲାଏନ୍ସ ମାଲିକ ମୁକେଶ ଅମ୍ବାନୀଙ୍କଠାରୁ ମାତ୍ର ଗୋଟିଏ ସ୍ଥାନ ଉପରକୁ ଉଠିଛନ୍ତି। ଅମ୍ବାନୀଙ୍କ ମୋଟ ସମ୍ପତ୍ତି ମୂଲ୍ୟ ହେଉଛି ୮୨.୨ ବିଲିୟନ ଡଲାର ରହିଛି ।
