Independence Day: 954 ପୋଲିସ ପାଇବେ ମେଡାଲ, ଓଡିଶାରୁ 17

ଆସନ୍ତାକାଲି 77ତମ ସ୍ବାଧୀନତା ଦିବସ ପାଳିବ ଦେଶ । ଏ ନେଇ ପୋଲିସ ପଦକ ଘୋଷଣା କରିଛନ୍ତି କେନ୍ଦ୍ର ଗୃହ ମନ୍ତ୍ରଣାଳୟ । ଅଧିକ ପଢ଼ନ୍ତୁ

ନୂଆଦିଲ୍ଲୀ: ସେବା, ଦକ୍ଷତା ଓ ପରିଶ୍ରମକୁ ସମ୍ମାନ । ଆସନ୍ତାକାଲି 77ତମ ସ୍ବାଧୀନତା ଦିବସ ପାଳିବ ଦେଶ । ଏନେଇ ପୋଲିସ ପଦକ ଘୋଷଣା କରିଛନ୍ତି କେନ୍ଦ୍ର ଗୃହ ମନ୍ତ୍ରଣାଳୟ । ସାହାସିକତା ଓ ବିଶିଷ୍ଟ ସେବା ପାଇଁ ମୋଟ 954ଜଣଙ୍କୁ ପୋଲିସ ମେଡାଲ ପ୍ରଦାନ କରାଯିବ । ଓଡ଼ିଶାରୁ ମୋଟ 17 ଜଣ ପୋଲିସ ଅଧିକାରୀ ଏହି ପଦକ ପାଇବେ ।

ମୋଟ 954ଜଣଙ୍କୁ ପୋଲିସ ମେଡାଲ ପ୍ରଦାନ କରାଯିବ । ସେଥିରୁ 229 ପୋଲିସ ଅଧିକାରୀଙ୍କୁ ପୋଲିସ ମେଡାଲ ଫର ଗ୍ୟାଲେଣ୍ଟ୍ରୀ ପ୍ରଦାନ କରାଯିବ । 82 ଜଣଙ୍କୁ ପ୍ରେସିଡେଣ୍ଟ ପୋଲିସ ପଦକ ଓ 642 ଜଣଙ୍କୁ ପୋଲିସ ପଦକ ପ୍ରଦାନ କରାଯିବ । ପ୍ରେସିଡେଣ୍ଟ୍‌ ପୋଲିସ ମେଡାଲ (PPMG) ସିଆରପିଏଫଏ କମାଣ୍ଡାଣ୍ଟ ଲୋଉରାକପାମ ଇବୋମଚା ସିଂହଙ୍କୁ ପ୍ରଦାନ କରାଯିବା ନେଇ ଗୃହ ମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି । 125 ପୋଲିସ ଅଧିକାରୀ ବାମପନ୍ଥୀ ଉଗ୍ରବାଦୀ ପ୍ରଭାବିତ ଅଞ୍ଚଳ, ଜାମୁକାଶ୍ମୀରରୁ 71 ପୋଲିସ ଅଧିକାରୀ ଏବଂ ଉତ୍ତରପୂର୍ବରୁ 11 ପୋଲିସ ଅଧିକାରୀ ଏହି ସମ୍ମାନରେ ସମ୍ମାନିତ ହେବେ ।

ଓଡିଶାରୁ ପାଇବେ 17 ପୋଲିସ: ଓଡିଶାରୁ ମୋଟ 17 ପୋଲିସ ଅଧିକାରୀ ପୋଲିସ ମେଡାଲ ପାଇବେ । ସାହସିକତା ପାଇଁ 4 ପୋଲିସ କର୍ମଚାରୀ ପଦକ ପାଇବେ । ସେହିପରି ବିଶିଷ୍ଟ ସେବା ପାଇଁ 2 ଓ ଉଲ୍ଲେଖ୍ୟନୀୟ ସେବା ପାଇଁ 11ଜଣଙ୍କୁ ପୋଲିସ ପଦକରେ ସମ୍ମାନିତ କରାଯିବ । ସୁବେଦାର ପ୍ରହଲ୍ଲାଦ ହିମିରିକା ଓ ଏସଆଇ ସିନ୍ତୋଷ ଗୁରୁଙ୍କୁ ସାହସିକାତା ପଦକ, କମାଣ୍ଡୋ ସୁନୀଲ ବରିହା ଓ କନଷ୍ଟେବଳ ସୁଜିତ ରଣାଙ୍କୁ ସାହସିକତା ପଦକ ପ୍ରଦାନ କରାଯିବ ।

ଗ୍ୟାଲେଣ୍ଟ୍ରୀ ପ୍ରେସିଡେଣ୍ଟ୍‌ ପୋଲିସ ମେଡାଲ (PPMG) ଏବଂ ପୋଲିସ ମେଡାଲ ଫର ଗ୍ୟାଲେଣ୍ଟ୍ରୀ (PPG) ଜୀବନ ଓ ସମ୍ପତ୍ତି ରକ୍ଷା ଦିଗରେ ପୋଲିସ ଅଧିକାରୀଙ୍କ ଉଲ୍ଲେଖ୍ୟନୀୟ ଅବଦାନ ପାଇଁ ପ୍ରଦାନ କରାଯାଇଥାଏ । ବିଶିଷ୍ଟ ସେବା ପାଇଁ ପ୍ରେସିଡେଣ୍ଟ୍‌ ପୋଲିସ ମେଡାଲ ପ୍ରଦାନ କରାଯାଏ । କର୍ତ୍ତବ୍ୟ ସୂଚାରୁ ରୂପେ ତୁଲାଇବା ସହ ମୂଲ୍ୟବାନ ସେବା ପ୍ରଦାନ ନେଇ ପୋଲିସ ମେଡାଲ ପ୍ରଦାନ କରାଯାଇଥାଏ । ପ୍ରତିବର୍ଷ ସ୍ବାଧୀନତା ଦିବସରେ ସାହାସିକତା ଓ ବିଶିଷ୍ଟ ସେବା ପାଇଁ ପୋଲିସ ଅଧିକାରୀଙ୍କୁ ଏହି ମେଡାଲ ପ୍ରଦାନ କରାଯାଇଥାଏ । ଆଗାମୀ ଦିନରେ କିଭଳି ଲୋକଙ୍କୁ ତ୍ବରିତ ନ୍ୟାୟ ପ୍ରଦାନ ସହ ଉତ୍କୃଷ୍ଠ ସେବା ପ୍ରଦାନ କରାଯିବ ସେନେଇ ପ୍ରେରଣା ଦେବ ।