ଗାନ୍ଧୀନଗର: ଗୁଜୁରାଟ ମୋର୍ବିରେ ଗତକାଲି ସଂଧ୍ୟାରେ ପୋଲ ଦୁର୍ଘଟଣାରେ ପ୍ରାଣ ହରାଇଛନ୍ତି 134 ଜଣ (Cable bridge collapsed in Gujarat )। ଏପରି ହୃଦୟଥରା ଘଟଣା ସମଗ୍ର ଦେଶକୁ ସ୍ତବ୍ଧ କରିଦେଇଛି । ମରାମତି ପାଇଁ ଗତ କିଛି ମାସ ଧରି ଲୋକଙ୍କ ଯାତାୟତ ପାଇଁ ଏହି ପୋଲଟି ବନ୍ଦ ରଖାଯାଇଥିଲା ବେଳେ ମାତ୍ର 5 ଦିନ ତଳେ ଏହାକୁ ସର୍ବସାଧାରଣଙ୍କ ପାଇଁ ଖୋଲା ଯାଇଥିଲା । ତେବେ ଯେମିତି ଏହି ପୋଲରେ ଦୀର୍ଘ ମାସରୁ ଅପେକ୍ଷା କରି ବସିଥିଲା ମୃତ୍ୟୁ । ନିମିଷକେ ସବୁ ସରିଗଲା । କିଏ ସମ୍ପର୍କୀୟଙ୍କୁ ହରାଇଛି, ତ ଆଉ କିଏ ସମ୍ପୂର୍ଣ୍ଣ ପରିବାରକୁ ହରାଇଛି ।
ଏବେ ସୁଦ୍ଧା ପ୍ରାୟ 134 ଜଣଙ୍କ ମୃତ୍ୟୁ ହୋଇଥିବା କୁହାଯାଉଥିବା ବେଳେ ବହୁ ଆହତ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଏବେ ମଧ୍ୟ କିଛି ନିଖୋଜ ଥିବା ଯୋଗୁ ସେମାନଙ୍କୁ ଠାବ କରିବା ପାଇଁ ସର୍ଚ୍ଚ ଓ ରେସ୍କ୍ୟୁ ଅପରେସନକୁ ଜାରି ରଖାଯାଇଛି । ତେବେ କେଉଁ କାରଣ ପାଇଁ ଏହି ଅଘଟଣ ଘଟିଲା ? ମରାମତି ପାଇଁ ବନ୍ଦ ଥିବା ଏହି ପୋଲରେ ଏତେ ସଂଖ୍ୟକ ଲୋକଙ୍କୁ କିପରି ଚଢିବାକୁ ଦିଆଗଲା ? ପ୍ରଶାସନର ଅବହେଳା ପାଇଁ ଏପରି ସମସ୍ୟା ଉପୁଜି ନାହିଁ ତ ?
ଏମିତି ଅନେକ ଅସମାହିତ ପ୍ରଶ୍ନ ସମସ୍ତଙ୍କୁ ଆନ୍ଦୋଳିତ କରୁଥିବା ବେଳେ ଅଘଟଣ କିନ୍ତୁ ଛାଡି ଯାଇଛି ଯନ୍ତ୍ରଣା ଓ ଦୁର୍ଦଶାର କରୁଣ ଛାପ । ଦେଖନ୍ତୁ ଅଘଟଣ ପରେ କିଛି ସ୍ଥିତି । ଘଟଣାରେ ସାରା ଦେଶରେ ଶୋକ ପ୍ରକାଶ ପାଇବା ସହ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତିବିଶେଷ ଶୋକପ୍ରକାଶ କରିଛନ୍ତି । ରାଷ୍ଟ୍ରୀୟ ଏକତା ଦିବସ ଅବସରେ ଆୟୋଜିତ କାର୍ଯ୍ୟକ୍ରମରେ ନିଜ ଗୃହରାଜ୍ୟ ଗୁଜୁରାଟ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏକାଧିକ କାର୍ଯ୍ୟକ୍ରମ ବାତିଲ କରିଛନ୍ତି ।
ଅନ୍ୟପଟେ ଏପରି ଦୁର୍ଘଟଣା ପରେ ଦେଶର ବିଭିନ୍ନ ସ୍ଥାନରେ ଥିବା ପୁୁରୁଣା ପୋଲ ଓ ଏହାର ସୁରକ୍ଷା ନେଇ ମଧ୍ୟ ତତ୍ପରତା ପ୍ରକାଶ ପାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
