ନୂଆଦିଲ୍ଲୀ: ହନିଟ୍ରାପରେ ଫସିଲେ ଭାରତୀୟ ଯବାନ । ମହିଳାଙ୍କ ମାୟାଜାଲରେ ଫଶି ବିଦେଶକୁ ପ୍ରତିରକ୍ଷା ପ୍ରତିଷ୍ଠାନ ଗୁଡିକ(Defence Installations) ଜଡିତ ଗୁରୁତ୍ବପୂର୍ଣ୍ଣ ତଥ୍ୟ ଦେଉଥିଲେ ବାୟୁସେନା ଅଧିକାରୀ । ଏଭଳି ଘଟଣା ସାମ୍ନାକୁ ଆସିବା ପରେ ବାୟୁସେନା ଅଧିକାରୀ ଜଣଙ୍କୁ ଦିଲ୍ଲୀ କ୍ରାଇମବ୍ରାଞ୍ଜ ଗିରଫ କରିଛି । ଗିରଫ ଯବାନ ହେଉଛନ୍ତି ଦେବେନ୍ଦ୍ର ଶର୍ମା ।
ଯବାନ ଜଣଙ୍କ ଜଣେ ମହିଳାଙ୍କ ସହ କଥା ହୋଇ ପ୍ରତିରକ୍ଷା ବିଭାଗର ସମ୍ବେଦନଶୀଳ ସୂଚନା ଦେଇଥିବା ପୋଲିସ ପକ୍ଷରୁ କୁହାଯାଇଛି । ଗିରଫ ଯବାନଙ୍କ ଘର କାନପୁରରେ, ସେ ଦିଲ୍ଲୀର ସୁବୋରୋଟୋ ପାର୍କରେ ବାୟୁସେନା ରେକର୍ଡ କାର୍ଯ୍ୟାଳୟରେ ଜିଡି ଭାବରେ କାର୍ଯ୍ୟ କରୁଥିଲେ । ଏନେଇ ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, "ମେ' ୬ ତାରିଖରେ ପୋଲିସ୍ ଅଭିଯୁକ୍ତ ଦେବେନ୍ଦ୍ର ଶର୍ମାଙ୍କୁ ଗୁଇନ୍ଦା ଏଜେନ୍ସିର ଇନ୍ପୁଟ୍କୁ ଆଧାର କରି ଦିଲ୍ଲୀ ପୋଲିସ ଅଫିସିଆଲ ସିକ୍ରେଟ ଆକ୍ଟ(OSA)ରେ ଗିରଫ କରିଥିଲା । ତେବେ ଏହି ଘଟଣାରେ ପାକିସ୍ତାନର ଗୁପ୍ତଚର ଏଜେନ୍ସି ଆଇଏସଆଇର ହାତଥିବା ପୋଲିସ ସନ୍ଦେହ କରିଛି ।
ତେବେ ଗିରଫ ହେବାପରେ ପ୍ରତିରକ୍ଷା ବିଭାଗର କିଛି ଗୁରୁତ୍ବପୂର୍ଣ୍ଣ ତଥ୍ୟ ଦେଇ ଏହା ବଦଳରେ ଟଙ୍କା ମଧ୍ୟ ପାଉଥିଲା ଅଭିଯୁକ୍ତ । ଅଭିଯୁକ୍ତଙ୍କ ପତ୍ନୀଙ୍କ ବ୍ୟାଙ୍କ ଆକାଉଣ୍ଟକୁ ଟଙ୍କା ଆସିଥିବା ମଧ୍ୟ ପୋଲିସ ସନ୍ଧେହ କରୁଛି । ଏହି ଘଟଣାରେ ଯବାନଙ୍କ ସହ ଯୋଗାଯୋଗ କରୁଥିବା ମହିଳାଙ୍କୁ ଟ୍ରାକ କରିବା ଆରମ୍ଭ କରିଛି ପୋଲିସ । ଯେଉଁ ନମ୍ୱରରୁ ମହିଳା ଦେବେନ୍ଦ୍ରଙ୍କ ସହ କଥା ହେଉଥିଲେ ତାହା ଭାରତୀୟ ସର୍ଭିସ୍ ପ୍ରୋଭାଇଡ଼ରଙ୍କ ନମ୍ୱର ହୋଇଥିବା ଜଣାପଡିଛି ।
