ଚଣ୍ଡିଗଡ: ବୁଲା କୁକୁରଙ୍କୁ ଖାଇବାକୁ ଦେଉଥିବା ବେଳେ ଯୁବତୀଙ୍କ ଉପରେ ମାଡିଗଲା କାର୍ । ଦିଲ୍ଲୀର ଅଞ୍ଜଳି ସିଂହଙ୍କୁ କାର୍ ୧୨ କିଲୋମିଟର ପର୍ଯ୍ୟନ୍ତ ଘୋଷାଡି ନେବା ଭଳି ଲୋମହର୍ଷଣକାରୀ କାଣ୍ଡ ମନରୁ ଲିଭି ନଥିବା ବେଳେ ଚଣ୍ଡୀଗଡରୁ ଏଭଳି ପୁଣି ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ସେକ୍ଟର ୫୩ର ତେଜସ୍ବିତା ନାମକ ଜଣେ ଯୁବତୀ ରାତିରେ ନିଜ ଘର ପାଖ ରାସ୍ତାରେ କୁକୁରଙ୍କୁ ଖାଇବାକୁ ଦେଉଥିଲେ । ଏତିକି ବେଳେ ଦ୍ରୁତଗତିରେ ଆସୁଥିବା ଗୋଟିଏ SUV ତାଙ୍କୁ ଧକ୍କା ଦେଇ ପଳାଇ ଯାଇଥିଲା । ଏହି ସମୟର ଦୃଶ୍ୟ ସେଠାରେ ଲାଗିଥିବା ସିସିଟିଭିରେ କଏଦ ହୋଇଛି ।
ତେବେ ଯାହା ସୂଚନା ମିଳିଛି, ଦୁର୍ଘଟଣାର ଶିକାର ଯୁବତୀଙ୍କ ଜୀବନ ବଞ୍ଚିଯାଇଛି । ମାତ୍ର ସେ ଗୁରୁତର ଆହତ ହୋଇଛନ୍ତି । ତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ବେଳେ ହସ୍ପିଟାଲରେ ଭର୍ତ୍ତି କରାଯାଇଛି । ବର୍ତ୍ତମାନ ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଥିବା ପରିବାର ପକ୍ଷରୁ ସୂଚନା ଦିଆଯାଇଛି । ତେବେ ପରିବାର ଲୋକଙ୍କ କହିବା ଅନୁଯାୟୀ, ତେଜସ୍ବିତା ଜଣେ ଆର୍କିଟେକ୍ ଗ୍ରାଜୁଏଟ । ସେ ଏବଂ ତାଙ୍କ ମାଆ ମଞ୍ଜିନ୍ଦର ପ୍ରତିଦିନ ବୁଲା କୁକୁରଙ୍କ ଖାଇବାକୁ ଦେଇଥାନ୍ତି । ଶନିବାର ରାତିରେ ମଧ୍ୟ ସେମାନେ ରାସ୍ତାରେ କୁକୁରଙ୍କ ଖାଇବାକୁ ଦେବାକୁ ଯାଇଥିଲେ । ତେଜସ୍ବିତା କୁକୁରଙ୍କୁ ଖାଇବାକୁ ଦେଉଥିବା ବେଳେ ହଠାତ୍ ଏକ ଦ୍ରୁତଗାମୀ କାର୍ ତାଙ୍କ ଉପରେ ମାଡି ଯାଇଥିଲା । ଧକ୍କା ଦେବା ପରେ ଗାଡି ଚାଳକ ସେଠାରେ ଅଟକିବା ବଦଳରେ ପଳାଇ ଯାଇଥିଲେ ।
ଝିଅକୁ ରକ୍ତ ଜୁଡୁବୁଡ ଅବସ୍ଥାରେ ଦେଖି ତାଙ୍କ ମାଆ ଖୁବ୍ ଭୟଭୀତ ହୋଇପଡିଥିଲେ । ସେ ସହାୟତା ପାଇଁ ନିବେଦନ କରିଥିଲେ ହେଁ ସେହି ରାସ୍ତା ଦେଇ ଯାଉଥିବା କୌଣସି ଗାଡି ମୋଟର ଅଟକି ନଥିଲେ । ଏହାପରେ ମାଆ ଘର ଲୋକଙ୍କୁ ଫୋନ କରିବା ସହ ପୋଲିସ କଣ୍ଟ୍ରୋଲ ରୁମକୁ ଜଣାଇଥିଲେ । ତେଜସ୍ବିତାଙ୍କୁ ତୁରନ୍ତ ଉଦ୍ଧାର କରାଯାଇ ହସ୍ପିଟାଲକୁ ନିଆଯାଇଥିଲା ।
ପ୍ରକାଶଥାଉ କି, ଚାରି ଦିନ ତଳେ ରାଜଧାନୀ ଦିଲ୍ଲୀରେ ହିଟ୍ ଆଣ୍ଡ ରନର ଆଉ ଏକ ଘଟଣା ଘଟିଥିଲା । ଏଠାରେ ଜଣେ ଯୁବକଙ୍କ କାର୍ ଧକ୍କା ଦେଇ ପାଖାପାଖ ଅଧା କିଲୋମିଟର ପର୍ଯ୍ୟନ୍ତ ଘୋଷାଡି ନେଇଥିଲା । ଏହି ଘଟଣା ସିସିଟିଭିରେ କଏଦ ହୋଇଥିଲା ।
