ଚଣ୍ଡିଗଡ: ପଞ୍ଜାବରେ ଗୁଳିମାଡରେ ଯୁବକ ମୃତ । CCTV ରେ କଏଦ ହେଲା ଦୃଶ୍ୟ । ପଞ୍ଜାବ ଜଳନ୍ଧରରେ ସାମାନ୍ୟ ବଚସାରୁ ଗୁଲିମାଡରେ ଜଣେ ଯୁବକର ମୃତ୍ୟୁ ହୋଇଛି । ଗୁଳିମାଡ ସମୟର ଭିଡିଓ ନିକଟରେ ଲାଗିଥିବା ସିସିଟିଭିରେ କଏଦ ହୋଇଛି । ପ୍ରାଣ ହରାଇଥିବା ଯୁବକର ନାମ ରବୀନ୍ଦ୍ର ଓ ସେ ଗିରଫ ଗ୍ୟାଙ୍ଗଷ୍ଟାର ଲରେନ୍ସ ବିଷ୍ଣୋଇର ସହଯୋଗୀ ବୋଲି ଜଣାପଡିଛି । ସେହିପରି ଘଟଣାରେ ଅନ୍ୟ ଜଣେ କୁଲଜିତ କୌର ନାମ୍ନୀ ମହିଳା ମଧ୍ୟ ଆହତ ହୋଇଛନ୍ତି ।
ଘଟଣା ପରେ ପୋଲିସ ପହଞ୍ଚି ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଛି । ସ୍ଥାନୀୟ ଏସିପି ନିର୍ମଳ ସିଂଙ୍କ ସୂଚନା ଅନୁସାରେ, ଗତକାଲି ରାତି ପ୍ରାୟ 9ଟା ବେଳେ ସହରର ଗୁରୁ ନାନକ ଏରିଆରେ ଏହି ଘଟଣା ଘଟିଛି । ସ୍ଥାନୀୟ ଅଟୋ ଚାଳକ ସଂଘର କାର୍ଯ୍ୟକର୍ତ୍ତା କୁଲଦ୍ବୀପ ସିଂଙ୍କ ସହ କିଛି ଯୁବକଙ୍କ ବଚସା ହୋଇଥିଲା । ଏଥିରେ ନିକଟରେ ଥିବା ଗୁରମିତ ନାମକ ବ୍ୟକ୍ତି ଉତ୍ତ୍ୟକ୍ତ ହୋଇ ନିଜ ଲାଇସେନ୍ସ ପ୍ରାପ୍ତ ବନ୍ଧୁକରୁ ରବିନ୍ଦ୍ର ନାମକ ଜଣେ ଯୁବକ ଉପରେ ଗୁଳି ଚଳାଇଥିଲା । ପରେ ଆହତ ଯୁବକକୁ ହସ୍ପିଟାଲରେ ଭର୍ତ୍ତି କରାଯାଇଥିଲେ ସୁଦ୍ଧା ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୋଲିସ ନିକଟରେ ଲାଗିଥିବା ସିସିଟିଭି ଫୁଟେଜ ଆଧାରରେ ତଦନ୍ତ ଜାରି ରଖିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
