ନୂଆଦିଲ୍ଲୀ: ସର୍ବନିମ୍ନ ସହାୟକ ମୂଲ୍ୟ ବ୍ୟବସ୍ଥା(MSP)କୁ ସୁଦୃଢ କରିବା ପାଇଁ ସୋମବାର କେନ୍ଦ୍ର ସରକାର ଏକ କମିଟି ଗଠନ କରିଛନ୍ତି(Govt Setsup committee to Strengthen MSP System) । ଗତବର୍ଷ ନଭେମ୍ବରରେ ତିନି କୃଷି ଆଇନ ଉଚ୍ଛେଦ ଘୋଷଣା କରିବା ସମୟରେ ଏମଏସପି ପାଇଁ ଏକ କମିଟି ଗଠନ କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରତିଶ୍ରୁତି ଦେଇଥିଲେ । ଏହାର ୮ ମାସ ପରେ ଏମଏସପି କମିଟି ଗଠନ ହୋଇଛି । କେନ୍ଦ୍ର ସରକାର, ରାଜ୍ୟ ସରକାର, କୃଷକ, କୃଷି ବିଜ୍ଞାନୀ ଓ କୃଷି ଅର୍ଥନୀତିଜ୍ଞମାନଙ୍କୁ ନେଇ ଏହି କମିଟି ଗଠନ କରାଯାଇଛି ।
ଏମଏସପି କମିଟି ଗଠନ ପାଇଁ ଗତ ୧୨ ତାରିଖରେ କୃଷକ କଲ୍ୟାଣ ମନ୍ତ୍ରଣାଳୟ ପକ୍ଷରୁ ବିଜ୍ଞପ୍ତି ଜାରି ହୋଇଥିଲା । ପୂର୍ବତନ କୃଷି ସଚିବ ସଞ୍ଜୟ ଅଗ୍ରୱାଲ(Former Agriculture Secretary Sanjay Agrawal) ଏହି ଏମଏସପି କମିଟିର ଅଧ୍ୟକ୍ଷ ରହିବେ । ସେହିପରି ସଂଯୁକ୍ତ କିଷାନ ମୋର୍ଚ୍ଚାରୁ(SKM) ମଧ୍ୟ ଏଥିରେ ୩ ଜଣ ସଦସ୍ୟ ରହିବେ । କେନ୍ଦ୍ର ପାଖକୁ ୩ଟି ନାମ ପଠାଇବା ପାଇଁ ଏସକେଏମକୁ କୁହାଯାଇଥିଲା । କିନ୍ତୁ ଏହି କୃଷକ ସଙ୍ଗଠନ ପକ୍ଷରୁ କେନ୍ଦ୍ର ସରକାରଙ୍କୁ ଏ ଯାଏଁ କୌଣସି ନାମ ଦିଆଯାଇନାହିଁ । ଏହାସହିତ ନୀତି ଆୟୋଗ ସଦସ୍ୟ ରମେଶ ଚାନ୍ଦ, କୃଷି ଅର୍ଥନୀତିଜ୍ଞ ସିଏସସି ଶେଖର, ସୁଖପାଲ ସିଂହ ଓ ଜାତୀୟ ପୁରସ୍କାର ପ୍ରାପ୍ତ କୃଷକ ଭାରତ ଭୁଷଣ ତ୍ୟାଗି ଏହି କମିଟିରେ ରହିବେ ।
