ହାଇଦ୍ରାବାଦ: ଚଳିତମାସ (ଜାନୁଆରୀ) 31ରୁ ଆରମ୍ଭ ହେବାକୁ ଯାଉଛି ସଂସଦର ବଜେଟ୍ ଅଧିବେଶନ । ଏହା ପୂର୍ବରୁ ସରକାର ପାରମ୍ପରିକ ଭାବେ ସର୍ବଦଳୀୟ ବୈଠକ ଡାକିଛନ୍ତି । ଜାନୁଆରୀ 30 ତାରିଖ ଅପରାହ୍ନରେ ଏହି ସର୍ବଦଳୀୟ ବୈଠକ ଅନୁଷ୍ଠିତ ହେବ । ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀଙ୍କ ଦ୍ୱାରା ପାରମ୍ପରିକ ଭାବେ ଏହି ବୈଠକ ଆହୁତ କରାଯାଇଛି । ଏଥିରେ ସଂସଦରେ ପ୍ରତିନିଧିତ୍ବ ଥିବା ପ୍ରାୟ ସମସ୍ତ ରାଜନୈତିକ ଦଳର ପ୍ରତିନିଧି ସାମିଲ ରହିବେ ।
ଏହି ବୈଠକରେ ବିରୋଧୀ ଦଳ ଚଳିତ ଅଧିବେଶନରେରେ ସେମାନଙ୍କ ଦ୍ବାରା ଉଠାଯିବାକୁ ଥିବା ପ୍ରସଙ୍ଗରେ ଆଲୋଚନା କରିବାକୁ ଅନୁମତି ଦାବି କରିବେ । ସେହିପରି ଅଧିବେଶନର ଫଳପ୍ରଦତା ଓ ଶୃଙ୍ଖଳିତ ଗୃହ ପରିଚାଳନା ପାଇଁ ସରକାର ବିରୋଧୀ ଦଳଙ୍କ ସହଯୋଗ ଆଶା କରିବେ । ଜାନୁଆରୀ 30 ଅପରାହ୍ନରେ ଏନଡିଏ ଫ୍ଲୋର ଲିଡରଙ୍କର ଏକ ବୈଠକ ମଧ୍ୟ ରଖାଯାଇଛି । ଚଳିତ ସଂସଦ ବଜେଟ ଅଧିବେଶନ ଦୁଇଟି ପର୍ଯ୍ୟାୟରେ ଶେଷ ହେବ ।
ଏହା ମଧ୍ୟ ପଢନ୍ତୁ :-ବଜେଟ ଅଧିବେଶନ ପୂର୍ବରୁ ମନ୍ତ୍ରୀ ମଣ୍ଡଳ ସହ ବୈଠକ କରିବେ ପ୍ରଧାନମନ୍ତ୍ରୀ
ସଂସଦର ବଜେଟ ଅଧିବେଶନ ଚଳିତମାସ 31ରୁ ଆରମ୍ଭ ହେବାକୁ ଯାଉଛି । ନରେନ୍ଦ୍ର ମୋଦି ନେତୃତ୍ବାଧୀନ ଦ୍ବିତୀୟ ପାଳି ସରକାର ଶେଷ ପୂର୍ଣ୍ଣାଙ୍ଗ ବଜେଟ ଏହି ଅଧିବେଶନରେ ଉପସ୍ଥାପିତ ହେବାକୁ ଯାଉଛି । ବର୍ଷ 2023ର ପ୍ରଥମ ସଂସଦ ଅଧିବେଶନ ହୋଇଥିବା କାରଣରୁ ପ୍ରଥମ ଦିବସରେ ରାଷ୍ଟ୍ରପତି ଉଭୟ ଗୃହକୁ ସମ୍ବୋଧିତ କରିବେ । ରାଷ୍ଟ୍ରପତିଙ୍କ ଅଭିଭାଷଣ ପରେ ଦ୍ବିତୀୟ ଦିବସ ତଥା ଫେବୃଆରୀ ପହିଲାରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ପୂର୍ଣ୍ଣାଙ୍ଗ ବଜେଟ ଉପସ୍ଥାପନ କରିବେ । 2024 ରେ ସାଧାରଣ ନିର୍ବାଚନ ହେବାକୁ ଥିବା ବେଳେ ଏହି ବଜେଟ ମୋଦି ସରକାରଙ୍କ ଦ୍ବିତୀୟ ପାଳିର ଅନ୍ତିମ ପୂର୍ଣ୍ଣାଙ୍ଗ ବଜେଟ ହେବାକୁ ଯାଉଛି । ଶେଷ ବଜେଟର ରୂପ ରେଖକୁ ନେଇ ସମସ୍ତଙ୍କ ଅପେକ୍ଷା ରହିଛି ।
ଅଧିବେଶନର ପ୍ରଥମ ଭାଗ ଜାନୁଆରୀ 31 ରୁ ଆରମ୍ଭ ହୋଇ ଫେବୃଆରୀ 13 ପର୍ଯ୍ୟନ୍ତ ଚାଲିବ । ସେହିପରି ଦ୍ୱିତୀୟ ଭାଗ ମାର୍ଚ୍ଚ 13 ରେ ଆରମ୍ଭ ହେବ ଏବଂ ଏପ୍ରିଲ 6 ପର୍ଯ୍ୟନ୍ତ ଚାଲିବ । ମୌସୁମୀ ଅଧିବେଶନରେ ଉଭୟ ଗୃହରେ 9ଟି ବିଲ୍ ପାରିତ ହୋଇଥିଲା । ଚଳିତ ଅଧିବେଶନରେ ମଧ୍ୟ ମୋଦି ସରକାର କିଛି ଗୁରୁତ୍ବପୂର୍ଣ୍ଣ ବିଲ୍ ମଧ୍ୟ ଆଗତ କରିବା ନେଇ ଚର୍ଚ୍ଚା ହେଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
