ଜୟପୁର: ଚଳିତ ବର୍ଷ ଭାରତର ଅଧ୍ୟକ୍ଷତାରେ ଆୟୋଜିତ ହେବାକୁ ଥିବା G20 ଶିଖର ସମ୍ମିଳନୀ (G 20 Summit in India) ଡିସେମ୍ବର ମାସରେ ରାଜସ୍ଥାନର ଉଦୟପୁର ସହରରେ ହୋଇପାରେ । ତେବେ ଏନେଇ ସରକାରୀ ସ୍ତରରେ ପ୍ରାରମ୍ଭିକ ପ୍ରସ୍ତୁତି ମଧ୍ୟ ଆରମ୍ଭ ହୋଇସାରିଛି । ଜୁଲାଇ 25ରେ ଉଦୟପୁରକୁ କ୍ଷେତ୍ର ପରିଦର୍ଶନ ପାଇଁ ଆସିପାରନ୍ତି କେନ୍ଦ୍ରୀୟ ଟିମ ।
କେନ୍ଦ୍ର ସରକାରଙ୍କ 3 ସଂଯୁକ୍ତ ସଚିବଙ୍କ ସମେତ 5 ବରିଷ୍ଠ ଅଧିକାରୀଙ୍କ ଏକ ଟିମ ଉଦୟପୁର ଗସ୍ତ କରି ସେଠାରେ ଭିତ୍ତିଭୂମିର ସମୀକ୍ଷା କରିପାରନ୍ତି । ଏହି କ୍ଷେତ୍ର ପରିଦର୍ଶନ କାର୍ଯ୍ୟକ୍ରମରେ କେନ୍ଦ୍ରୀୟ ଟିମକୁ ଜିଲ୍ଲା ପ୍ରଶାସନର ଅଧିକାରୀ ସମସ୍ତ ସହଯୋଗ ଯୋଗାଇବେ । ରାଜସ୍ଥାନର ଉଦୟପୁର ସହର ବିଶ୍ବର ଶ୍ରେଷ୍ଠ ୧୦ ସୌନ୍ଦର୍ଯ୍ୟ ଭରା ସ୍ଥାନ ମଧ୍ୟରେ ଅନ୍ୟତମ ଭାବେ ଜଣାଶୁଣା । ପ୍ରତିବର୍ଷ ବିଶ୍ବର କୋଣ ଅନୁକୋଣରୁ ଲକ୍ଷ ଲକ୍ଷ ପର୍ଯ୍ୟଟକ ଏଠାକୁ ପରିଭ୍ରମଣରେ ମଧ୍ୟ ଆସିଥାନ୍ତି ।
ବିଶ୍ବର ଦଶଟି ସୁନ୍ଦର ସହର ମଧ୍ୟରେ ରହିଛି ଉଦୟପୁର:-
ପୁରାତନ ରାଜପ୍ରାସାଦ ସୌନ୍ଦର୍ଯ୍ୟ ଏବଂ ସଂସ୍କୃତିର ସହର ଭାବେ ଉଦୟପୁରର ପ୍ରତିଷ୍ଠା ମଧ୍ୟ ରହିଛି । ପର୍ଯ୍ୟଟନ କ୍ଷେତ୍ରରେ ଉଦୟପୁର ମଧ୍ୟ ଅନେକ ଅନ୍ତର୍ଜାତୀୟ ପୁରସ୍କାର ପାଇଛି । ତେବେ ଚଳିତ ବର୍ଷ ଭାରତ, G20 ସମ୍ମିଳନୀର ଆୟୋଜନ ଭାର ଗ୍ରହଣ କରିଥିବାବେଳେ ଏହିଠାରେ ହିଁ ସମ୍ମିଳନୀ ଆୟୋଜନ କରିବା ପାଇଁ ଯୋଜନା ରଖାଯାଇଥିବା ଚର୍ଚ୍ଚା ହେଉଛି ।
