ଲକ୍ଷ୍ନୌ: ପରିଚୟ ଲୁଚାଇ ନିଜକୁ ହିନ୍ଦୁ ବୋଲି କହି ହିନ୍ଦୁ ଯୁବତୀଙ୍କୁ ବିବାହ କରିଥିଲା ମୁସଲିମ ଯୁବକ । ଏକଥା ଜଣାପଡିବା ପରେ ସମ୍ପୃକ୍ତ ପୀଡିତା ଏବେ ଥାନାରେ ଦ୍ବାରସ୍ଥ ହୋଇଛି । ଉତ୍ତର ପ୍ରଦେଶ ବାନ୍ଦା ଜିଲ୍ଲାରେ ଏପରି ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ପୀଡିତା ସ୍ଥାନୀୟ ଥାନାରେ ଏତଲା ଦେବା ପରେ ସମ୍ପୃକ୍ତ ଯୁବକ ଫେରାର ହୋଇଯାଇଛି । ହେଲେ ମାମଲା ଥାନାରେ ପହଞ୍ଚିବା ପରେ ଅଭିଯୋଗକାରୀ ଯୁବତୀଙ୍କ ସମ୍ପର୍କରେ ଯେଉଁ ତଥ୍ୟ ସାମ୍ନାକୁ ଆସିଛି, ତାହା ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଦେଇଛି ।
ତେବେ ମହିଳାଙ୍କ ଅଭିଯୋଗ ଆଧାରରେ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ହେଲେ ତଦନ୍ତରୁ ଯାହା ସାମ୍ନାକୁ ଆସିଲା, ତାହା ପ୍ରଥମ ଅଭିଯୋଗଠାରୁ ଆହୁରି ଆଶ୍ଚର୍ଯ୍ୟଜନକ ଥିଲା । ପ୍ରତାଡନାର ଶିକାର ହୋଇଥିବା ଅଭିଯୋଗ କରିଥିବା ଯୁବତୀ ନିଜେ ଜଣେ ଅଭ୍ୟାସଗତ ଲୁଟେରା । ବିଭିନ୍ନ ଯୁବକଙ୍କୁ ପ୍ରେମ କରି ବିବାହ କରିବା ପରେ ମାତ୍ର କିଛି ଦିନ ମଧ୍ୟରେ ସେମାନଙ୍କଠାରୁ ଲୁଟ କରି ଫେରାର ହୋଇଯାଉଥିଲା ଏହି ଯୁବତୀ । ଏସମ୍ପର୍କିତ ଗୋଟିଏ କି ଦୁଇଟି ନୁହେଁ ପଡୋଶୀ ମଧ୍ୟ ପ୍ରଦେଶର ବିଭିନ୍ନ ଥାନାରେ 22ଟି ମାମଲା ରହିଥିବା ବାନ୍ଦା ପୋଲିସ ଜାଣିବାକୁ ପାଇଛି । ହେଲେ ଏପରି ଅଭ୍ୟାସଗତ ଭାବେ ଯୁବକଙ୍କୁ ଠକୁଥିବା ଯୁବତୀ ଏଥର ଜଣେ ମୁସଲିମ ଯୁବକର ନିଜେ ପ୍ରତାଡନାର ଶିକାର ହୋଇଛି ।
ପୋଲିସ ସୂଚନା ଅନୁସାରେ, ଯୁବତୀ ମଧ୍ୟ ପ୍ରଦେଶର ପନ୍ନା ଜିଲ୍ଲାର ପୱାଇ ପୋଲିସ ଷ୍ଟେସନ ଅଞ୍ଚଳର ବାସିନ୍ଦା । 2019 ମସିହା ଫେବୃଆରୀ 2 ରେ ତାରିଖରେ ଚିତ୍ରକୁଟର କାମନାଥ ମନ୍ଦିରକୁ ଯାଇଥିଲେ । ସେଠାରେ ଜିତେନ୍ଦ୍ର ନାମକ ଜଣେ ଛଦ୍ମନାମଧାରୀ ଯୁବକଙ୍କ ସହ ତାଙ୍କର ପରିଚୟ ଓ ପରେ ବନ୍ଧୁତା ହୋଇଥିଲା । ଉଭୟଙ୍କ ମଧ୍ୟରେ ସମୟ କ୍ରମେ ପ୍ରେମ ସମ୍ପର୍କ ଗଢିଉଠିବା ସହ ସେମାନେ ବିବାହ ମଧ୍ୟ କରିଥିଲେ । ହେଲେ କିଛି ମାସ ପରେ ଜିତେନ୍ଦ୍ର ଜଣେ ମୁସଲିମ ଯୁବକ ବୋଲି ଜାଣିବାକୁ ପାଇଥିଲା ଯୁବତୀ । ଏନେଇ ସେ ପୋଲିସରେ ଅଭିଯୋଗ କରିବା ପାଇଁ ଥାନାରେ ପହଞ୍ଚିଥିଲା । ପୋଲିସ ମଧ୍ୟ ଅଭିଯୋଗ ଗ୍ରହଣ କରି ମାମଲା ରୁଜୁ କରିଥିଲା । ହେଲେ ପ୍ରାଥମିକ ତଦନ୍ତ ପରେ ଅଭିଯୋଗକାରିଣୀ ମହିଳା ବିରୋଧରେ ପୂର୍ବରୁ 22ଟି ବିବାହ ଓ ଲୁଟ ମାମଲା ରହିଛି ।
ଏପରି ସୂଚନା ମିଳିବା ପରେ ପୋଲିସର କାର୍ଯ୍ୟାନୁଷ୍ଠାନ ଦିଗ ମଧ୍ୟ ବଦଳିଛି । ଉଭୟଙ୍କ ବିରୋଧରେ ମାମଲା ରୁଜୁ କରି ପୋଲିସ ଫେରାର ଯୁବକଙ୍କୁ ଗିରଫ କରିବା ପାଇଁ ପ୍ରୟାସ କରୁଛି । ମହିଳାଙ୍କ ପୂର୍ବ ମାମଲାର ରେକର୍ଡ ମଧ୍ୟ ଯାଞ୍ଚ କରିବା ପାଇଁ ମଧ୍ୟ ପ୍ରଦେଶ ପୋଲିସ ସହଯୋଗ ନେଇପାରେ ଉତ୍ତର ପ୍ରଦେଶ ପୋଲିସ ।
ବ୍ୟୁରୋ ରିପୋର୍ଟ, ଇଟିଭି ଭାରତ
