କଣ୍ଟେନରକୁ ଧକ୍କା ଦେଲା ଟ୍ରକ: ୪ ଜୀବନ୍ତ ଦଗ୍ଧ

ଆନ୍ଧ୍ରପ୍ରଦେଶରେ ଭୟଙ୍କର ସଡକ ଦୁର୍ଘଟଣା । କଣ୍ଟେନର ସହ ଟ୍ରକ ଧକ୍କା ହେବା ଯୋଗୁଁ ୪ ଜଣ ଜୀବନ୍ତ ଦଗ୍ଧ । ଅଧିକ ପଢନ୍ତୁ

ଅମରାବତୀ: କଣ୍ଟେନରକୁ ଧକ୍କା ଦେଲା ଦ୍ରୁତଗାମୀ ଟ୍ରକ । ଟ୍ରକ ଡ୍ରାଇଭରଙ୍କ ସହ ୪ ଜଣ ଜୀବନ୍ତ ଦଗ୍ଧ(Four charred to death in accident) । ଆନ୍ଧ୍ରପ୍ରଦେଶ ଧର୍ମାଭରମ ନିକଟସ୍ଥ ଜାତୀୟ ରାଜପଥରେ ଏହି ଭୟଙ୍କର ସଡକ ଦୁର୍ଘଟଣା ଘଟିଛି । ଦୁର୍ଘଟଣା ଏତେ ଭୟଙ୍କର ଥିଲା ଯେ ସାଙ୍ଗେ ସାଙ୍ଗେ ଦୁଇଟି ଯାକ ଗାଡି ହୁତୁହୁତୁ ହୋଇ ଜଳିବାକୁ ଆରମ୍ଭ କରିଥିଲା । ଯେଉଁ କାରଣକୁ ଦୁଇ ଗାଡିର ଡ୍ରାଇଭରଙ୍କ ସହ ଆଉ ଦୁଇ ଜଣ ନିଆଁରେ ଜଳି ଯାଇଥିଲେ ।

ସୂଚନା ମୁତାବକ, ଗୁରୁବାର ବିଳମ୍ବିତ ରାତିରେ ଏକ ବାଲି ବୋଝେଇ ଟ୍ରକ ରାଜାମହେନ୍ଦ୍ରଭରମରୁ ବିଶାଖାପାଟନମ୍ ଅଭିମୁଖେ ଯାଉଥିଲା । ଧର୍ମାଭରମ ଜାତୀୟ ରାଜପଥ ନିକଟରେ ଏହି ଟ୍ରକ ଏକ ଡିଭାଇଡର ପିଟି ହୋଇ ସେଠାରେ ଯାଉଥିବା ଏକ କଣ୍ଟେନରକୁ ଧକ୍କା ଦେଇଥିଲା । ଟ୍ରକଟି ସିଧାସଳଖ କଣ୍ଟେନରର ଡିଜେଲ ଟାଙ୍କିରେ ମାଡ ହୋଇଥିଲା । ଯାହାଫଳରେ ଗାଡିରେ ନିଆଁ ଲାଗିଯାଇଥିଲା ।

ଏଥିରେ କଣ୍ଟେନର ଡ୍ରାଇଭର ବିନୋଦ କୁମାର ରାଧେଶ୍ୟାମ, ସୁପରଭାଇଜର କାଲି ପେଡ୍ଡିରାଜୁ, ଟ୍ରକ ଡ୍ରାଇଭର ଜାନୁ ଶ୍ରୀନୁ ଏବଂ ଅନ୍ୟ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି । ପୋଲିସ ମୃତଦେହ ଗୁଡିକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ।