ଡେଙ୍ଗୁ ରୋଗୀଙ୍କୁ ପ୍ଲାଜମା ବଦଳରେ ଜୁସ୍‌ ଦେଲେ ଡାକ୍ତର, ଚାଲିଗଲା ଜୀବନ

ମେଡିକାଲରେ ଡେଙ୍ଗୁ ରୋଗୀଙ୍କୁ ପ୍ଲାଜମା ବଦଳରେ ଫଳରସ ଦେଇ ଦେଲେ ଡାକ୍ତର । ଚିକିତ୍ସାଧୀନ ଅବସ୍ଥାରେ ଚାଲିଗଲା ଜୀବନ । ଅଧିକ ପଢନ୍ତୁ

ଲକ୍ଷ୍ନୌ: ଉତ୍ତରପ୍ରଦେଶ ପ୍ରୟାଗରାଜରୁ ହୋସ୍ ଉଡାଇବା ଭଳି ଏକ ଘଟଣା ସାମ୍ନାକୁ ଆସିଛି । ଏଠାରେ ଗୋଟିଏ ଘରୋଇ ମେଡିକାଲରେ ଡେଙ୍ଗୁ ରୋଗୀଙ୍କୁ ବ୍ଲଡ ପ୍ଲାଜମା ବଦଳରେ ସାଲାଇନ ଆକାରରେ ଫଳରସ ଦିଆଯାଇଛି । ଫଳରେ ମେଡିକାଲ ବେଡ୍‌ରେ ରୋଗୀଙ୍କ ମୃତ୍ୟୁ ଘଟିଛି(patient dies after given mosambi juice instead of plasma) । ମୃତକଙ୍କ ପରିବାର ଲୋକେ ଏ ସମ୍ପର୍କରେ ସ୍ବାସ୍ଥ୍ୟ ବିଭାଗ ଅଧିକାରୀଙ୍କ ନିକଟରେ ଅଭିଯୋଗ କରିବା ପରେ ସମ୍ପୃକ୍ତ ହସ୍ପିଟାଲକୁ ସିଲ୍ କରାଯାଇଛି । ଏହାସହିତ ରୋଗୀଙ୍କୁ ଦିଆଯାଇଥିବା ନକଲି ପ୍ଲାଜମାର ଯାଞ୍ଚ ପାଇଁ ପଠାଯାଇଛି ।

ସୂଚନା ମୁତାବକ, ମୃତ ରୋଗୀଙ୍କ ନାମ ପ୍ରଦୀପ ପାଣ୍ଡେ । ଡେଙ୍ଗୁ ଆକ୍ରାନ୍ତ ପ୍ରଦୀପ ଗତ ୧୭ ତାରିଖ ଦିନ ପ୍ରୟାଗରାଜ ସ୍ଥିତ ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲା । ଏହାର ଦୁଇ ଦିନ ପରେ ତାଙ୍କୁ ସାଲାଇନ ଆକାରରେ ବ୍ଲଡ ପ୍ଲାଜମା ବଦଳରେ ଫଳରସ ଦିଆଯାଇଥିବା ପରିବାର ଲୋକେ ଅଭିଯୋଗ ଆଣିଥିଲେ । ରୋଗୀଙ୍କ ସ୍ବାସ୍ଥ୍ୟବସ୍ଥା ବିଗିଡି ଯିବାରୁ ସେଠାରୁ ତାଙ୍କୁ ଅନ୍ୟ ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିଲା । ମାତ୍ର ଚିକିତ୍ସାଧୀନ ଅବସ୍ଥାରେ ପ୍ରଦୀପ ଆଖି ବୁଜିଥିଲେ ।

ହସ୍ପିଟାଲରେ ଭୁଲବଶତଃ ଫଳରସ ଦିଆଯିବା କାରଣରୁ ତାଙ୍କ ମୃତ୍ୟୁ ହୋଇଥିବା ଅଭିଯୋଗ ପରେ ମୁଖ୍ୟ ଚିକିତ୍ସାଧିକାରୀ ଡକ୍ଟର ନାନକ ସରନ ମାମଲାର ତଦନ୍ତ ପାଇଁ ଏକ ତିନି ଜଣିଆ ଟିମ୍ ସେହି ହସ୍ପିଟାଲକୁ ପଠାଇଥିଲେ । ହସ୍ପିଟାଲରେ ଅନିୟମିତତା ସମ୍ପର୍କରେ ଟିମ୍ ଅନୁଧ୍ୟାନ କରିବା ପରେ ଏହାର ଲାଇସେନ୍ସ ରଦ୍ଦ କରାଯାଇଛି । ଏନେଇ ଉତ୍ତରପ୍ରଦେଶ ଉପମୁଖ୍ୟମନ୍ତ୍ରୀ ବ୍ରଜେଶ ପାଠକ କହିଛନ୍ତି, ‘‘ମୁଖ୍ୟ ଚିକିତ୍ସାଧିକାରଙ୍କ ସମେତ ଏକ ଟିମ୍ ଘଟଣାସ୍ଥଳକୁ ଯାଇ ତଦନ୍ତ କରିଛନ୍ତି । ସେ ଏହି ଘଟଣା ସମ୍ପର୍କରେ ଜିଲ୍ଲାପାଳଙ୍କ ମଧ୍ୟ କଥା ହୋଇଛି । ଖୁବଶୀଘ୍ର ତଦନ୍ତ ରିପୋର୍ଟ ଆସିଯିବ । ଏହି ମାମଲା ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତିବିଶେଷଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ନିଆଯିବ ।’’