ଲକ୍ଷ୍ନୌ: ଦିଲ୍ଲୀ ମୁଖ୍ୟମନ୍ତ୍ରୀ ବା ଆପ୍ ମୁଖ୍ୟ ଅରବିନ୍ଦ କେଜ୍ରିୱାଲ୍ଙ୍କୁ ନେଇ ବିବାଦୀୟ ବୟାନ ଦେଇଛନ୍ତି ଜଣେ ବିଜେପି ବିଧାୟକ । ଉତ୍ତର ପ୍ରଦେଶର ଲୋନି ବିଜେପି ବିଧାୟକ ନନ୍ଦକିଶୋର ଗୁର୍ଜର କେଜ୍ରିୱାଲ୍ଙ୍କ ଉଦ୍ଦେଶ୍ୟରେ ଏହା କହିଛନ୍ତି । ରବିବାର ଲୋନିରେ ହିନ୍ଦୁ ଯୁବ ବାହିନୀ ପକ୍ଷରୁ ଆୟୋଜିତ ୫୧ତମ କୁଣ୍ଡୀୟ ମାନବ କଲ୍ୟାଣ ବିଶ୍ବ ଶାନ୍ତି ମହାଯଜ୍ଞରେ ଯୋଗ ଦେଇଥିଲେ ବିଧାୟକ ନନ୍ଦକିଶୋର ଗୁର୍ଜର ।
ଏହି ଅବସରରେ ସେ ଏକ ପ୍ରଶ୍ନର ଉତ୍ତର ଦେଇ ଅରବିନ୍ଦ କେଜ୍ରିୱାଲଙ୍କୁ ଆଇଏସ୍ଆଇର ଏଜେଣ୍ଟ ବୋଲି ବୟାନ ଦେଇଛନ୍ତି । ଖାଲି ସେତିକି ନୁହେଁ, ତାଙ୍କ କଥାରେ ସତ୍ୟତା ରହିଛି ଯାଞ୍ଚ ହେଲେ ଜଣା ପଡ଼ିବ ବୋଲି ବିଜେପି ବିଧାୟକ କହିଛନ୍ତି । ଏଥିସହ କେଜ୍ରିୱାଲ ଲୋକଙ୍କୁ ଭ୍ରମିତ କରୁଥିବା ସେ ଅଭିଯୋଗ କରିଛନ୍ତି ।
ନିର୍ବାଚନ ସମୟରେ କେଜ୍ରିୱାଲ ହନୁମାନ ମୁର୍ତ୍ତି ଧରି ଭୋଟ ମାଗୁଛନ୍ତି, କିନ୍ତୁ ଥରେ ନିର୍ବାଚନ ଶେଷ ହେବାପରେ ସେ ଦେଶ ବିରୋଧୀ କାମ କରୁଛନ୍ତି ବୋଲି କହିଛନ୍ତି ଲୋନି ବିଜେପି ବିଧାୟକ ନନ୍ଦକିଶୋର ଗୁର୍ଜର । ପେଟ୍ରୋଲ ଡିଜେଲ ଦରବୃଦ୍ଧିକୁ ନେଇ ବିଧାୟକ କହିଛନ୍ତି ଯେ, ଏହା ଅନ୍ତର୍ଜାତୀୟ ବଜାରର ପ୍ରଭାବ । ଅନ୍ତର୍ଜାତୀୟ ବଜାରରେ ତୈଳ ଦର କମିଲେ ଦେଶରେ ମଧ୍ୟ ଦରଦାମ କମିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
