ନବରଙ୍ଗପୁର: ଆରମ୍ଭ ହେଲା କୋରୋନା ଟୀକାକରଣ । ପ୍ରଧାନମନ୍ତ୍ରୀ କାର୍ଯ୍ୟକ୍ରମକୁ ଉଦଘାଟନ କରିବା ପରେ ଏହି ଟୀକାକରଣ କାର୍ଯ୍ୟକ୍ରମ ଆରମ୍ଭ ହୋଇଛି । ସମ୍ପୂର୍ଣ୍ଣ ନିର୍ବାଚନ ବୁଥ୍ ଢାଞ୍ଚାରେ ଏହି ଟୀକାକରଣ କରାଯାଉଛି । ସମ୍ଭାବ୍ୟ ପାର୍ଶ୍ଵ ପ୍ରତିକ୍ରିୟା ପାଇଁ ଟିକା ନେଉଥିବା ବ୍ୟକ୍ତିକୁ 30 ମିନିଟ୍ ପର୍ଯ୍ୟନ୍ତ ଡାକ୍ତରଙ୍କ ନିରୀକ୍ଷଣରେ ଏକ ସ୍ବତନ୍ତ୍ର କୋଠରୀରେ ରଖାଯାଉଛି । ସମ୍ଭାବ୍ୟ ପାର୍ଶ୍ବ ପ୍ରତିକ୍ରିୟା ପାଇଁ ସ୍ବତନ୍ତ୍ର ଭାବରେ ଗାଡିର ବ୍ୟବସ୍ଥା କରାଯାଇଛି ।
ଜିଲ୍ଲାରେ ପ୍ରଥମ ପର୍ଯ୍ୟାୟରେ ମିଳିଥିବା ଟିକା ଅନୁସାରେ ୭ ହଜାର ସ୍ବାସ୍ଥ୍ୟକର୍ମୀଙ୍କୁ ଦିଆଯାଇପାରିବ ଟିକା । ଜିଲ୍ଲାରେ ୯୩୪୫ ସ୍ବାସ୍ଥ୍ୟକର୍ମୀ ନିଜ ନାମ ପଞ୍ଜିକୃତ କରିଛନ୍ତି । ଟୀକାକରଣ ପାଇଁ ଜିଲ୍ଲାର ୪ଟି କେନ୍ଦ୍ରରେ ଟୀକାକରଣ ପାଇଁ ବ୍ୟବସ୍ଥା କରାଯାଇଛି । ଜିଲ୍ଲା ମୁଖ୍ୟ ଚିକିତ୍ସାଳୟ, ନନ୍ଦାହାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ପାପଡାହାଣ୍ଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଓ ଉମରକୋଟ ଉପଖଣ୍ଡିୟ ମେଡିକାଲରେ ଟୀକାକରଣ ପାଇଁ ବ୍ୟବସ୍ଥା କରାଯାଇଥିଲା ।
ଟୀକାକରଣ ପୂର୍ବଦିନ ନନ୍ଦାହାଣ୍ଡି, ପାପଡାହାଣ୍ଡି ଓ ଉମରକୋଟ କେନ୍ଦ୍ରକୁ ଟିକା ଗୁଡିକୁ ପଠା ଯାଇଥିଲା । ପ୍ରଥମ ଦିନରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ନନ୍ଦାହାଣ୍ଡି, ପାପଡାହାଣ୍ଡି ଗୋଷ୍ଠୀ କେନ୍ଦ୍ର ଓ ଉମରକୋଟ ଉପଖଣ୍ଡ ମେଡିକାଲରେ ପ୍ରଥମ ଦିବସରେ ୧୦୦ ଜଣ ଲେଖାଏଁ ସ୍ଵାସ୍ଥ୍ୟକର୍ମୀଙ୍କୁ ଟିକା ପ୍ରଦାନ କରାଯିବାକୁ ବ୍ୟବସ୍ଥା କରାଯାଇଥିଲା । ରେଜିଷ୍ଟ୍ରେସନ କରିଥିବା ସମସ୍ତଙ୍କୁ ଫୋନ କିମ୍ବା ମେସେଜ ମାଧ୍ୟମରେ ସୂଚନା ଦିଆଯାଇଥିଲା ।
ପ୍ରଥମେ ସଫେଇ କର୍ମଚାରୀ, ଅଙ୍ଗନବାଡି କର୍ମୀ, ଆଶା, ଏଏନଏମମାନଙ୍କୁ ଟୀକାକରଣ କରାଯିବ ଏବଂ ଶେଷରେ ମେଡିକାଲ ଅଫିସରଙ୍କୁ ପ୍ରଦାନ କରାଯିବ ବ୍ୟବସ୍ଥା ରହିଛି । ଟୀକାକରଣ ସମୟରେ ଟୀକାକରଣ କେନ୍ଦ୍ର ମଧ୍ୟକୁ କେବଳ ଟୀକା ନେଉଥିବା ବ୍ୟକ୍ତିକୁ ହିଁ ଯିବାକୁ ଅନୁମତି ଦିଆଯାଇଛି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
