ନୂଆଦିଲ୍ଲୀ: ଭାରତ ବାୟୋଟେକ ଦ୍ବାରା ଶିଶୁଙ୍କ ପାଇଁ ପ୍ରସ୍ତୁତ ହୋଇଥିବା କୋଭିଡ ଟିକାକୁ ବ୍ୟବହାରିକ ଅନୁମୋଦନ ପାଇଁ ଅଧିକ ପର୍ଯ୍ୟାୟର ପରୀକ୍ଷଣ ଆବଶ୍ୟକ ପଡିପାରେ । ଆଉ କିଛି ପର୍ଯ୍ୟାୟ ପରୀକ୍ଷଣ ପରେ ଏହାକୁ ଶିଶୁଙ୍କ ଠାରେ ବ୍ୟବହାର କରିବା ପାଇଁ ଡ୍ରଗ୍ସ କଣ୍ଟ୍ରୋଲର ଜେନେରାଲ ଅଫ୍ ଇଣ୍ଡିଆ (DCGI) ଅନୁମତି ଦେଇପାରନ୍ତି ବୋଲି ସୂତ୍ରରୁ ସୂଚନା ମିଳିଛି ।
ଶିଶୁଙ୍କ ଠାରେ ଟିକାର ବ୍ୟବାହର ଏକ ସମ୍ବେଦନଶୀଳ ବିଷୟ । ତେଣୁ ଏହା ଅଧିକ ପର୍ଯ୍ୟାୟର ପରୀକ୍ଷଣ ଆବଶ୍ୟକ କରେ । ପରୀକ୍ଷଣ ଜାରି ରହିଛି ଓ ଆଉ କିଛି ପର୍ଯ୍ୟାୟର ପରୀକ୍ଷଣ ପରେ ଏହାକୁ ବ୍ୟବହାରିକ ଅନୁମତି ମିଳିବ । ନିକଟରେ 2-18 ବର୍ଷ ବୟସ୍କଙ୍କ ପାଇଁ ଭାରତ ବାୟୋଟେକକୁ କୋଭାକ୍ସିନ ପ୍ରସ୍ତୁତ କରିବା ପାଇଁ ସୁପାରିଶ କରିଥିଲେ DCGI । ତେବେ ପ୍ରସ୍ତୁତକାରୀ ସଂସ୍ଥା ବର୍ତ୍ତମାନ ଟିକା ପ୍ରସ୍ତୁତ କରିସାରି ଥିବାବେଳେ ତାହା ଚୂଡାନ୍ତ ଅନୁମତି ଅପେକ୍ଷାରେ ରହିଛି ।
ଏହାପୂର୍ବରୁ ଭାରତ ବାୟୋଟେକ ଏକ ସରକାରୀ ବିବୃତ୍ତିରେ, ତ୍ବରିତ ପରୀକ୍ଷଣ ପ୍ରକ୍ରିୟା ପାଇଁ DCGI, ବିଶେଷଜ୍ଞ କମିଟି ଏବଂ CDSCO କୁ ଧନ୍ୟବାଦ ଜଣାଇଛି । ତେବେ ଟିକାର ଉତ୍ପାଦନ ଓ ବଜାର ଉପଲବ୍ଧତା ଆରମ୍ଭ କରିବା ପୂର୍ବରୁ ସଂସ୍ଥା ବର୍ତ୍ତମାନ କେନ୍ଦ୍ରୀୟ ଡ୍ରଗ୍ ମାନକ ନିୟନ୍ତ୍ରଣ ସଂଗଠନ(CDSCO) ରୁ ଚୂଡାନ୍ତ ଅନୁମୋଦନକୁ ଅପେକ୍ଷା କରିଛି ବୋଲି ସ୍ପଷ୍ଟ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
