ମୁମ୍ବାଇ: ୪ଦିନ ପାଇଁ ଇଡି ହାଜତକୁ ଗଲେ ଶିବସେନା ସାଂସଦ ସଞ୍ଜୟ ରାଉତ । ଅଗଷ୍ଟ ୪ ତାରିଖ ପର୍ଯ୍ୟନ୍ତ ତାଙ୍କୁ ED ହାଜତକୁ ପଠାଇଛନ୍ତି PMLA କୋର୍ଟ । ଗିରଫ ହେବାପରେ ଆଜି କୋର୍ଟରେ ସଞ୍ଜୟଙ୍କୁ ହାଜର କରାଇଥିଲା ED ।
ସଞ୍ଜୟ ରାଉତଙ୍କୁ ପଚରାଉଚରା ପାଇଁ ୮ ଦିନ ହାଜତ ପଠାଇବାକୁ ED କୋର୍ଟଙ୍କ ନିକଟରେ ନିବେଦନ କରିଥିଲା । ପାତ୍ର ଚୌଲ ଦୁର୍ନୀତିରେ ସଞ୍ଜୟ ରାଉତ ଓ ବର୍ଷା ରାଉତ ୧.୬ କୋଟି ଟଙ୍କା ପାଇଥିବା ଯୁକ୍ତି ଦର୍ଶାଇଥିଲେ ED ଓକିଲ । ଏହି ଟଙ୍କାରେ ଅଲିବାଗ୍ରେ ଥିବା କିହିମ୍ ବିଚ୍ରେ ଏକ ଜାଗା କିଣିଛନ୍ତି ସଞ୍ଜୟ । ଏହି ଜମି ସ୍ବପ୍ନା ପାଟେକରଙ୍କ ନାମରେ ଅଛି ।
ଏହି ମାମଲାରେ ସଞ୍ଜୟ ରାଉତଙ୍କୁ ୪ ଥର ସମନ କରାଯାଇଥିଲେ ସୁଦ୍ଧା ସେ ମାତ୍ର ଥରେ ED ନିକଟରେ ହାଜର ହୋଇଥିଲେ । ତା ସହିତ ତାଙ୍କ ବିରୁଦ୍ଧରେ ଥିବା ପ୍ରମାଣ ଓ ତଥ୍ୟକୁ ନଷ୍ଟ କରିବାକୁ ଚେଷ୍ଟା କରିଥିବା ଯୁକ୍ତି କରିଥିଲେ EDଙ୍କ ଓକିଲ ।
ଏହାର ଜବାବରେ ସଞ୍ଜୟଙ୍କ ଓକିଲ କହିଥିଲେ ଯେ, "ରାଜନୈତିକ ଆକ୍ରୋଶ ରଖି ସଞ୍ଜୟଙ୍କ ବିରୁଦ୍ଧରେ ମାମଲା କରାଯାଇଛି । ସେ ଜଣେ ହୃଦରୋଗୀ ହୋଇଥିବା ବେଳେ ତାଙ୍କ ସର୍ଜରୀ ହୋଇଛି । ଏହାକୁ ସମସ୍ତ ଦସ୍ତାବିଜ୍ କୋର୍ଟଙ୍କ ନିକଟରେ ଦାଖଲ ହୋଇଛି ।"
କୋର୍ଟଙ୍କ ଦୁଇଜଣଙ୍କ ପକ୍ଷ ଶୁଣିବା ପରେ ସଞ୍ଜୟ ରାଉତଙ୍କୁ ୪ ଦିନ ପାଇଁ ED ହାଜତକୁ ପଠାଇ ଦେଇଛନ୍ତି । ଜମି ଦୁର୍ନୀତି ମାମଲାରେ (Money Laundering Case) ଗତକାଲି ଗିରଫ ହୋଇ ପ୍ରବର୍ତ୍ତନ ନିର୍ଦ୍ଦେଶାଳୟ ହେପାଜତରେ ଥିବା ସଞ୍ଜୟଙ୍କ ବିରୋଧରେ ତାଙ୍କ ଘନିଷ୍ଠଙ୍କ ପତ୍ନୀ ସ୍ବପ୍ନା ପାଟେକର ଅଭିଯୋଗ କରିଥିଲେ । ସଞ୍ଜୟ ତାଙ୍କୁ ଧମକ ଦେଉଥିବା ଅଭିଯୋଗ ହୋଇଥିଲା ।
