ନୂଆଦିଲ୍ଲୀ: ବେଙ୍ଗାଲୁରୁରେ ବିରୋଧୀ ଯେଉଁ ଦ୍ବିତୀୟ ବୈଠକରେ ଏକାଠି ହେବାକୁ ଯାଉଛନ୍ତି ତାହାର ନେତୃତ୍ବ କଂଗ୍ରେସ ନେବ । ପାଟନରେ ବିରୋଧୀଙ୍କ ପ୍ରଥମ ବୈଠକ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ଅଧ୍ୟକ୍ଷତାରେ ହୋଇଥିବା ବେଳେ ଚଳିତ 17 ଓ 18 ତାରିଖରେ ହେବାକୁ ଯାଉଥିବା ବୈଠକ ପାଇଁ ସମସ୍ତ ବିରୋଧୀ ନେତାଙ୍କୁ ନିମନ୍ତ୍ରଣ କରିଛନ୍ତି କଂଗ୍ରେସ ହାଇକମାଣ୍ଡ ମଲ୍ଲିକାର୍ଜୁନ ଖଡଗେ । ଆଜି କଂଗ୍ରେସ ମୁଖ୍ୟ ଖଡଗେ ସମସ୍ତ ବିରୋଧୀ ଦଳର ନେତାଙ୍କୁ ଚିଠି ଲେଖି ବେଙ୍ଗାଲୁରୁ ବୈଠକରେ ଯୋଗଦାନ କରିବା ପାଇଁ ନିମନ୍ତ୍ରଣ କରିଛନ୍ତି ।
ନିଜ ଚଠିରେ ଖଡଗେ ବିରୋଧୀଙ୍କ ପ୍ରଥମ ବୈଠକ ସମ୍ପର୍କରେ ମଧ୍ୟ ଉଲ୍ଲେଖ କରିଛନ୍ତି । ଜୁନ 23 ତାରିଖରେ ପାଟନାରେ ହୋଇଥିବା ଉକ୍ତ ବୈଠକ ସଫଳ ଥିଲା । ବର୍ତ୍ତମାନ ସମୟରେ ଗଣତାନ୍ତ୍ରିତ ଦଳ ପ୍ରତି ଥିବା ବିପଦ ଓ ଅନ୍ୟାନ୍ୟ ପ୍ରସଙ୍ଗ ସମ୍ପର୍କରେ ଉକ୍ତ ବୈଠକରେ ସଫଳ ଆଲୋଚନା ହୋଇଥିଲା । 2024 ସାଧାରଣ ନିର୍ବାଚନ ଉକ୍ତ ବୈଠକରେ ଅଂଶଗ୍ରହଣ କରିଥିବା ସମସ୍ତ ବିରୋଧୀ ଦଳ ମିଳିତ ଭାବେ ଲଢିବେ ବୋଲି ମତ ପ୍ରକାଶ ପାଇଥିବା ଖଡଗେ ଚିଠିରେ ଉଲ୍ଲେଖ କରିଥିଲେ । ସେହିପରି ସେ ଆହୁରି ମଧ୍ୟ ଲେଖିଛନ୍ତି ଯେ, ଏହି ଆଲୋଚନାର ଧାରା ଜାରି ରହିବା ଉଚିତ । ତେଣୁ 17 ତାରିଖ ସଂଧ୍ୟାରେ ବେଙ୍ଗାଲୁରୁରେ ଆରମ୍ଭ ହେବାକୁ ଥିବା ବୈଠକରେ ସମସ୍ତ ବିରୋଧୀ ରାଜନୈତିକ ଦଳ ଯୋଗାଦନ କରନ୍ତୁ ।
ଏହି ବୈଠକ 17 ତାରିଖ ସଂଧ୍ୟାରେ ଆରମ୍ଭ ହେବାକୁ ଥିବା ବେଳେ ପରଦିନ ଅର୍ଥାତ 18 ତାରିଖ 11 ଟାରୁ ପୁଣି ସଂଧ୍ୟା ପର୍ଯ୍ୟନ୍ତ ଜାରି ରହିବ । ଜୁନ 23 ରେ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ଅହ୍ବାନରେ ପାଟନାରେ ହୋଇଥିବା ମିଟିଂରେ 17 ଟି ରାଜନୈତିକ ଦଳର ମୁଖ୍ୟମାନେ ଅଂଶଗ୍ରହଣ କରି ଆଲୋଚନା କରିଥିଲେ । କଂଗ୍ରେସ ପକ୍ଷରୁ ପାର୍ଟି ହାଇକମାଣ୍ଡ ଖଡଗେ ଓ ଅନ୍ୟତମ ନେତା ରାହୁଲ ଗାନ୍ଧୀ ଯୋଗ ଦେଇଥିଲେ । ହେଲେ ଉକ୍ତ ବୈଠକରେ କୌଣସି ପ୍ରମୁଖ ନିଷ୍ପତ୍ତି ଗ୍ରହଣ କରାଯାଇ ପାରିନଥିଲା । ପରବର୍ତ୍ତୀ ସମୟରେ ସେମାନେ ଶିମଲାରେ ଏକାଠି ହେବେ ବୋଲି ମଧ୍ୟ ସହମତ ହୋଇଥିଲେ । ହେଲେ ପରେ ଏହି ପରବର୍ତ୍ତୀ ବୈଠକ ଶିମଲାରେ ହେବା ପରିବର୍ତ୍ତେ ବେଙ୍ଗାଲୁରୁରେ ହେବା ନେଇ କଂଗ୍ରେସ ପକ୍ଷରୁ କୁହାଯାଇଥିଲା ।
