ଚଣ୍ଡିଗଡ: ଖେଳୁ ଖେଳୁ ଅଘଟଣ । ଛାତ ଉପରେ ଝୁଲୁଥିବା କପଡାରେ ଝୁଲି ଜଣେ 13ବର୍ଷୀୟ ନାବାଳକ ପ୍ରାଣ ହରାଇଛି (Child death while playing)। ଏପରି ଅଭାବନୀୟ ଘଟଣା ଘଟିଛି ହରିୟାଣାର ପାନିପତ ଜିଲ୍ଲାର ମତ୍ତଲୌଦା ଥାନା ଅଧୀନରେ ଥିବା ଭାଲସି ଗ୍ରାମରେ । ମୃତ ନାବଳକର ପିତାଙ୍କ ଠାରୁ ମିଳିଥିବା ସୂଚନା ଅନୁସାରେ, ପ୍ରାଣ ହରାଇଥିବା ନାବାଳକର ନାମ ନାଜିମ ରାଜା ଓ ସେ ତେର ବର୍ଷ ବୟସର । ସେମାନେ ପଶ୍ଚିମବଙ୍ଗ ଇସଲାମପୁର ଅଞ୍ଚଳର ମୂଳ ବାସିନ୍ଦା । ଗତ ପ୍ରାୟ ବର୍ଷେ ଧରି ପାନିପତରେ ରହି ଆସୁଥିବା ପରିବାର ପକ୍ଷରୁ ସୂଚନା ମିଳିଛି ।
ସୂଚନା ଅନୁସାରେ ନାଜିମ ରାଜା ନିଜ ଭାଇ ଭଉଣୀଙ୍କ ସହ ଖେଳୁଥିବା ସମୟରେ ହଠାତ ଛାତ ଉପରକୁ ଚାଲି ଯାଇଥିଲା । ସେଠାରେ ସେ ଝୁଲୁଥିବା ଅବସ୍ଥାରେ ଥିବା ଏକ କପଡା ବା ଶାଢୀରେ ମୁଣ୍ଡ ପୁରାଇ ଝୁଲିବାକୁ ଚେଷ୍ଟା କରିଥିଲା । ଏହି ସମୟରେ ତାର ମୁଣ୍ଡ ସେଥିରେ ଫସି ଯାଇଥିଲା ଓ ସେ ଫାଶି ଲଗାଇବା ମୁଦ୍ରାରେ ଝୁଲି ପଡିଥିଲା । ପରିବାର ଲୋକେ ତାକୁ କିଛି ସମୟ ଖୋଜା ଖୋଜି କରି ନପାଇବା ପରେ ଛାତ ଉପରକୁ ଯାଇଥିଲେ । ସେତେବେଳ ତାକୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା ।
ସେ ଦୀର୍ଘ ସମୟ ଧରି ଝୁଲି ରହିବା ସତ୍ତ୍ବେ ମଧ୍ୟ ସେ ନିଶ୍ବାସ ପ୍ରଶ୍ବାସ ନେଉଥିଲା । ପରେ ତାକୁ ତୁରନ୍ତ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଥିଲା । ହେଲେ ଡାକ୍ତର ତାକୁ ମୃତ ଘୋଷଣା କରିଥିଲେ । ଘଟଣା ସମ୍ପର୍କରେ ଖବର ପାଇ ପୋଲିସ ହସ୍ପିଟାଲରେ ପହଞ୍ଚି ମୃତଦେହ ଜବତ କରିଛି । ଏକ ଅପମୃତ୍ୟୁ ମାମଲା ରୁଜୁ କରାଯାଇ ଘଟଣାର ତଦନ୍ତ ଆରମ୍ଭ କରାଯାଇଥିବା ସ୍ଥାନୀୟ ପୋଲିସ କହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
