ରାୟପୁର: ଛତିଶଗଡ ସହରାଞ୍ଚଳ ନିର୍ବାଚନ (Chhattisgarh Municipal Election 2021)ର ମତ ଗଣନା ପ୍ରକ୍ରିୟା ଜାରି ରହିଛି । ଆଉ କିଛି ସମୟରେ ଫଳାଫଳ ସ୍ପଷ୍ଟ ହେବାକୁ ଥିବାବେଳେ ପ୍ରାୟ ଅଧିକାଂଶ ଆସନରେ କଂଗ୍ରେସ ଆଗରେ ରହିଥିବା ଦେଖିବାକୁ ମିଳିଛି । ଏହି ନିର୍ବାଚନର ପ୍ରାରମ୍ଭିକ ଫଳାଫଳକୁ ଦୃଷ୍ଟିରେ ରଖି କଂଗ୍ରେସ କର୍ମୀଙ୍କ ମଧ୍ୟରେ ଉତ୍ସବର ପରିବେଶ ରହିଛି ।
ଏହି ପର୍ଯ୍ୟାୟରେ କଂଗ୍ରେସ ରାଜ୍ୟ କାର୍ଯ୍ୟାଳୟ ରାଜୀବ ଭବନରେ ଆତସବାଜି ସହ ମିଠା ବଣ୍ଟନ କରାଯାଇ ଉତ୍ସବ ପାଳନ କରାଯାଇଛି । କଂଗ୍ରେସ ରାଜ୍ୟ ସଭାପତି ମୋହନ ମାର୍କମ ମଧ୍ୟ ରାଜ୍ୟ କାର୍ଯ୍ୟାଳୟରେ କର୍ମୀଙ୍କ ସହିତ ଉପସ୍ଥିତ ଥିଲେ ।
ମାର୍କମ୍ କହିଛନ୍ତି ଯେ ରାଜ୍ୟରେ ସହରାଞ୍ଚଳ ନିର୍ବାଚନ ୧୫ ଟି ଓ୍ବାର୍ଡରେ ଅନୁଷ୍ଠିତ ହୋଇଥିବା ବେଳେ ପ୍ରାୟ ୧୧ ଟିରେ ଦଳରେ ଆଗରେ ରହିଛି । ମୁଖ୍ୟମନ୍ତ୍ରୀ ବଘେଲଙ୍କ ସ୍ବଚ୍ଛ ନୀତି ଓ ବିକାଶ ଯୋଗୁଁ ଆଜି କଂଗ୍ରେସ ଏହି ସଫଳତା ପାଇଛି ବୋଲି କହିଛନ୍ତି ଅଧ୍ଯକ୍ଷ ମୋହନ ମାର୍କମ ।
ମାର୍କମ୍ କହିଛନ୍ତି ଯେ ବିଜେପିର ବଡ ନେତା ଡ.ରମଣ ସିଂ ଏବଂ ଅଜୟ ଚନ୍ଦ୍ରକର ସେମାନଙ୍କ ନିଜ ବିଧାନସଭା ନିର୍ବାଚନ ମଣ୍ଡଳୀର ଗୋଟିଏ ବି ୱାର୍ଡରେ ଭଲ ସ୍ଥିତିରେ ନାହାନ୍ତି । ଯେଉଁଠାରେ ବଡ ବିଜେପି ନେତାଙ୍କ ପ୍ରଭାବ ଥିଲା, ସେଠାରେ କଂଗ୍ରେସ ଭଲ ପ୍ରଦର୍ଶନ କରିଥିବା କହିଛନ୍ତି ମୋହନ । ଏହି ବିଜୟ ପାଇଁ କଂଗ୍ରେସ କର୍ମୀ ଏବଂ ଜନସାଧାରଣଙ୍କ ଶ୍ରେୟ ଯିବ ବୋଲି ମଧ୍ୟ ସେ କହିଛନ୍ତି । ସେହିପରି କଂଗ୍ରେସ ପ୍ରାୟ ସମସ୍ତ ଓ୍ବାର୍ଡ ଦଖଲ କରିବାରେ ସଫଳ ହେବ ବୋଲି ମଧ୍ୟ ଦୃଢୋକ୍ତି ପ୍ରକାଶ କରିଛନ୍ତି ମୋହନ ।
ବ୍ୟୁରୋ ରିପୋର୍ଟ,ଇଟିଭି ଭାରତ
