ଚେନ୍ନାଇ: ଚେନ୍ନାଇର ନବନିର୍ବାଚିତ 49ତମ ମେୟର ପିନ୍ଧିଲେ ପାରମ୍ପାରିକ 820 ଗ୍ରାମର ସୁନା ଚେନ । ଗତକାଲି ଚେନ୍ନାଇର ସର୍ବକନିଷ୍ଠ ମେୟର ଭେବେ ନିର୍ବାଚିତ ହୋଇଥିବା ପ୍ରିୟା ରାଜନ ଆଜି ଶପଥ ଗ୍ରହଣ ଉତ୍ସବରେ ପାରମ୍ପାରିକ ଭାବେ ଏହି ସୁନା ଚେନକୁ ପିନ୍ଧି ଦାୟିତ୍ବ ଗ୍ରହଣ କରିଛନ୍ତି, ଯାହାର ମୂଲ୍ୟ ୪୧ ଲକ୍ଷ ଟଙ୍କା । ତାମିଲନାଡୁରେ ଏହି ପରମ୍ପରା ଦୀର୍ଘ ବର୍ଷରୁ ପ୍ରଚଳିତ ହୋଇଆସୁଛି ।
ପୂର୍ବତନ ବିଧାୟକ ଚେଙ୍ଗାଇ ସିଭାମଙ୍କ ନାତୁଣୀ ପ୍ରିୟା ରାଜନ ହେଉଛନ୍ତି ତାମିଲନାଡୁ ଇତିହାସର ପ୍ରଥମ ଦଲିତ ମହିଳା ତଥା ସର୍ବକନିଷ୍ଠ ମେୟର । କେବଳ ସେତିକି ନୁହେଂ ସେ ମଧ୍ୟ ଚେନ୍ନାଇର ସବୁଠୁ କନିଷ୍ଠ ତଥା ତୃତୀୟ ମହିଳା ମେୟର ଭାବେ ରେକର୍ଡ କରିଛନ୍ତି । 1958 ମସିହାରେ ତର ଚେରିୟାନ୍ ଏବଂ 1971ରେ କାମାକ୍ଷୀ ଜୟରାମନଙ୍କ ପରେ ପ୍ରିୟା ହେଉଛନ୍ତି ତୃତୀୟ ମହିଳା ।
ତେବେ ରାଜ୍ୟରେ ପ୍ରଚଳିତ ସୁନା ପରମ୍ପର ସମ୍ପର୍କରେ ପୂର୍ବତନ ମେୟର ଏମ ଥିରଭିୟାମଙ୍କ ସୂଚନା ଅନୁଯାୟୀ,ଏହି ପରମ୍ପରା ପ୍ରଥମେ ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଏମଜି ରାମଚନ୍ଦ୍ରନଙ୍କ କାର୍ଯ୍ୟକାଳରେ ଆରମ୍ଭ ହୋଇଥିଲା । ପ୍ରଥମେ ଏହି ଚେନକୁ ମଦୁରାଇ ସହରର ମେୟରଙ୍କୁ ପ୍ରଦାନ କରାଯାଇଥିଲା ।
ପୂର୍ବତନ ମେୟର ଆହୁରି ମଧ୍ୟ ସୂଚନା ଦେଇଛନ୍ତି ଯେ, ତେବେ ଏହି ଚେନକୁ ପରିଧାନ କରିବାର ଏକ ନିର୍ଦ୍ଦିଷ୍ଟ ବିଧି ମଧ୍ୟ ରହିଛି । ମେୟର କେବଳ ମୁଖ୍ୟମନ୍ତ୍ରୀ କିମ୍ବା ପ୍ରଧାନମନ୍ତ୍ରୀ ଅଂଶଗ୍ରହଣ କରିଥିବା ସରକାରୀ କାର୍ଯ୍ୟକ୍ରମରେ ଏହାକୁ ପିନ୍ଧି ଉପସ୍ଥିତ ହେବେ । ଅବଶିଷ୍ଟ ସମୟରେ ଏହାକୁ ବ୍ୟାଙ୍କ ଲକରରେ ରଖାଯାଇଥାଏ । ଏହା ଏକ ପରମ୍ପରା ହୋଇଥିବା ଯୋଗୁଁ ଏହାର ମୂଳ ଡିଜାଇନକୁ ମଧ୍ୟ ପରିବର୍ତ୍ତନ କରିବା ପାଇଁ କୌଣସି ବିଭାଗ ଅଧିକୃତ ନୁହେଁ । କେବଳ ରକ୍ଷଣାବେକ୍ଷଣ ଦୃଷ୍ଟିରୁ ଆବଶ୍ୟକସ୍ଥଳେ ଅନୁମତି ସହ ପଲିସି କରାଯାଇପାରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
