ରାୟପୁର: ଛତିଶଗଡ ବିଧାନସଭା ନିର୍ବାଚନ ପରେ ଶାସକରୁ ବିରୋଧୀ ଦଳର ଭୂମିକାକୁ ଆସିଥିବା କଂଗ୍ରେସ ଆଜି ବିରୋଧୀ ଦଳ ନେତା ଚୟନ ଶେଷ କରିଛି । ଚରଣ ଦାସ ମହନ୍ତ ବିରୋଧୀ ଦଳ ନେତା ଭାବେ ଚୟନ ହୋଇଛନ୍ତି । ଚଳିତ ଥର ଶକ୍ତି ବିଧାନସଭା ନିର୍ବାଚନ ମଣ୍ଡଳୀରୁ ନିର୍ବାଚନ ଲଢି ବିଜୟୀ ହୋଇଛନ୍ତି ଚରଣ ଦାସ ମହନ୍ତ । ତେବେ ବିରୋଧୀ ଦଳ ନେତା ଭାବେ ତାଙ୍କ ନାମ ଚର୍ଚ୍ଚା ହେଉଥିଲା । ସେ ଅନ୍ୟତମ ଦାବିଦାର ଦଲେଶ୍ବର ସାହୁ ଓ ଉମେସ ପଟେଲଙ୍କୁ ପଛରେ ପକାଇ ଆଜି ଗୃହରେ ଦଳର ନେତା ଭାବେ ଚୟନ ହୋଇଛନ୍ତି । ଦଳ ମଧ୍ୟ ପ୍ରଦେଶରେ ପିସିସ ସଭାପତି ପରିବର୍ତ୍ତନ କରିଥିଲେ ସୁଦ୍ଧା ଛତିଶଗଡ କ୍ଷେତ୍ରରେ ଏହା ଅପରିବର୍ତ୍ତିତ ରହିଛି । ଦୀପକ ବୈଜ ଦଳର ରାଜ୍ୟ ସଭାପତି ଭାବେ କାର୍ଯ୍ୟ ଜାରି ରଖିବେ ।
ଚରଣ ଦାସ ହମନ୍ତଙ୍କ ସମ୍ପର୍କରେ :-
ଦଳର ବରିଷ୍ଠ ନେତା ହେଉଛନ୍ତି ଚରଣ ଦାସ । ଉଭୟ ରାଜ୍ୟ ଓ ଜାତୀୟ ରାଜନୀତିରେ ତାଙ୍କର ସକ୍ରିୟତା ରହିଛି । ପୂର୍ବରୁ ସେ ସାଂସଦ ଭାବେ ନିର୍ବାଚିତ ହେବା ସହ ୟୁପିଏ ମେଣ୍ଟରେ ମନମୋହନ ସିଂ ସରକାରରେ କେନ୍ଦ୍ରମନ୍ତ୍ରୀ ଭାବେ ମଧ୍ୟ କାର୍ଯ୍ୟ କରିବାର ଅନୁଭବ ରଖିଛନ୍ତି । ସେହିପରି 2018 ବିଧାନସଭା ନିର୍ବାଚନରେ ସେ ବିଧାୟକ ଭାବେ ନିର୍ବାଚିତ ହୋଇଥିଲେ । ଚଳିତ ଥର ସେ ଶକ୍ତି ବିଧାନସଭା କ୍ଷେତ୍ରରୁ ନିର୍ବାଚନ ଲଢି ବିଜୟୀ ହୋଇଛନ୍ତି । ବିରୋଧୀ ଦଳ ନେତା ଭାବେ ତାଙ୍କ ନାମ ଚର୍ଚ୍ଚାର ଆଗରେ ଥିଲା ।
