ଚଣ୍ଡିଗଡ: ପୁଣି ଭାରତ ସୀମାରେ ଉଡିଲା ପାକିସ୍ତାନୀ ଡ୍ରୋନ । ପଞ୍ଜାବର ଅମୃତସର ଠାରେ ଏକ ପାକିସ୍ତାନୀ ଡ୍ରୋନ ଭାରତ ସୀମାରେ ପ୍ରବେଶ କରିବାକୁ ଚେଷ୍ଟା କରୁଥିବାବେଳେ ସୀମା ସୁରକ୍ଷା ବଳର ଯବାନ ତାକୁ ଗୁଳି କରି ଖସାଇଥିବା ନେଇ ସୂଚନା ମିଳିଛି । ଶନିବାର ବିଳମ୍ବିତ ରାତିରେ ଏହି ଘଟଣା ଘଟିଥିବାବେଳେ ବିଏସଏଫ ଯବାନ ପକ୍ଷରୁ ଆଜି ସୂଚନା ଦିଆଯାଇଛି ।
ସୂଚନା ଅନୁସାରେ, ଶନିବାର ବିଳମ୍ବିତ ରାତି ପ୍ରାୟ ୨.୧୫ ମିନିଟ ସମୟରେ ପଞ୍ଜାବର ଅମୃତସର ସ୍ଥିତ ଭାରତ-ପାକିସ୍ତାନ ସୀମାଠାରେ ଡ୍ରୋନ ଶବ୍ଦ ଶୁଣିବାକୁ ପାଇଥିଲେ ଯବାନ । ଏହାପରେ ଏହାପରେ ତତ୍କ୍ଷଣାତ ଯବାନ ଗୁଳି କରି ଡ୍ରୋନକୁ ତଳକୁ ଖସାଇ ଦେଇଥିଲେ । ଡ୍ରୋନକୁ ବିଏସଫ ଯବାନମାନେ ଜବତ କରିବା ସହ ସ୍ଥାନୀୟ ଅଞ୍ଚଳରେ ପୋଲିସ ଏବଂ ସୁରକ୍ଷାକର୍ମୀଙ୍କ ସର୍ଚ୍ଚ ଅପରେସନ ଜାରି ରହିଛି । ଏନେଇ ଆଜି(ରବିବାର) ବିଏସଏଫ ଜନସମ୍ପର୍କ ଅଧିକାରୀ ସୂଚନା ଦେଇଛନ୍ତି । ତେବେ ବିଏସଏଫ ଯବାନ କହିଛନ୍ତି, " ସର୍ଚ୍ଚ ଅପରେସନ ସମୟରେ ଧୁସିବୁନ୍ଧ ନିକଟସ୍ଥ ଶାହଜାଦା ଗ୍ରାମ ନିକଟରେ ଏହି ଡ୍ରୋନକୁ ଜବତ କରାଯାଇଛି । ତେବେ ଡ୍ରୋନର ରଙ୍ଗ କଳା ହୋଇଥିବା ବେଳେ ଗୁଳିରେ ସାମାନ୍ୟ ଭାଙ୍ଗିଯାଇଛି ।"
ପ୍ରକାଶଥାଉ କି, ଭାରତ ସୀମାରେ ପାକିସ୍ତାନ ଡ୍ରୋନ ଠାବ ହେବା ପ୍ରଥମ ଘଟଣା ନୁହେଁ । ଲଗାତାର ଏପରି କାର୍ଯ୍ୟ କରି ଆସୁଛି ପଡ଼ୋଶୀ ଦେଶ । ଗତ ଜାନୁଆରୀ ୨ ତାରିଖରେ ପଞ୍ଜାବ ଆକାଶରେ ପାକିସ୍ତାନ ଡ୍ରୋନ ଦେଖିବାକୁ ମିଳିଥିଲା । ପଞ୍ଜାବର ଗୁରୁଦାସପୁରରେ ପାକିସ୍ତାନୀ ଡ୍ରୋନ ଉଡୁଥିବା ବେଳେ ଗୁଳି କରି ହଟାଇଥିଲେ ସୀମା ସୁରକ୍ଷାବଳ । ଗୁରୁଦାସପୁରର କମଲପୁର ସେକ୍ଟରରେ ଡ୍ରୋନ ଉପରେ ଗୁଳି ଚଳାଇବା ପରେ ତାହା ପାକିସ୍ତାନ ପଟକୁ ଫେରିଯାଇଥିଲା । ତେବେ ଏହାପରେ ଫେବୃଆରୀ ୪ ତାରିଖ ଦିନ ରାଜସ୍ଥାନ ସୀମାରେ ପାକିସ୍ତାନୀ ଡ୍ରୋନକୁ ଗୁଳି କରି ଖସାଇଥିଲେ ବିଏସଏଫ ଯବାନ ।
ରାଜସ୍ଥାନର ଶ୍ରୀଗଙ୍ଗନଗର ସେକ୍ଟରରେ ଅନ୍ତର୍ଜାତୀୟ ସୀମା ନିକଟରେ ଏହି ସନ୍ଦିଗ୍ଧ ଡ୍ରୋନଟି ନଜର ଆସିଥିଲା । ସୂଚନା ପାଇବା ମାତ୍ରେ ସୀମା ସୁରକ୍ଷା ବଳର ଯବାନମାନେ ଏହାକୁ ଗୁଳି କରି ଖସାଇବା ସହ ଏଥିରୁ 6 କେଜି ଡ୍ରଗ୍ସ ଜବତ କରିଥିଲେ । ଏହି ଡ୍ରୋନଟି ପାକିସ୍ତାନ ପଟୁ ସୀମାପାର ନିଶାଦ୍ରବ୍ୟ କାରବାର ଉଦ୍ଦେଶ୍ୟରେ ଆସିଥିବା ନେଇ ଯବାନଙ୍କ ପକ୍ଷରୁ ସ୍ପଷ୍ଟ କରାଯାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
