ଲଣ୍ଡନ: ବ୍ରିଟିଶ ପ୍ରଧାନମନ୍ତ୍ରୀ ବୋରିସ ଜନସନ ନିଜ ଭାବିପତ୍ନୀ କେରି ସିମଣ୍ଡସଙ୍କୁ ବିବାହ କରିଛନ୍ତି । ଶନିବାର ସ୍ଥାନୀୟ ଗଣମାଧ୍ୟମ ସଂସ୍ଥାର ରିପୋର୍ଟ ଅନୁସାରେ ସେ ଗୁପ୍ତ ସମାରୋହରେ ବିବାହ କରିଛନ୍ତି ବୋଲି ସୂଚନା ମିଳିଛି ।
ମିଳିଥିବା ସୂଚନା ଅନୁସାରେ ବାହାଘର ୱେଷ୍ଟମିନଷ୍ଟର କ୍ୟାଥେଡ୍ରାଲଠାରେ ହୋଇଥିବା ବେଳେ ସମାରୋହରେ 30 ଜଣ ଅତିଥି ଯୋଗ ଦେଇଥିଲେ । କୋଭିଡର ସମସ୍ତ ନିୟମ ମାନି ବୋରିସଙ୍କ ବିବାହ ଉତ୍ସବ ଅନୁଷ୍ଠିତ ହୋଇଛି । 33 ବର୍ଷୀୟ ସିମଣ୍ଡସ ଓ 56 ବର୍ଷୀୟ ବୋରିସ ଗତ 2020 ମସିହାରେ ନିର୍ବନ୍ଧ କରିବା ପରେ ବିଭିନ୍ନ କାର୍ଯ୍ୟକ୍ରମରେ ଦୁହେଁ ଦୁହିଁଙ୍କୁ ଭେଟିଥିଲେ । ତେବେ ସୂଚନା ଥାଉ କି ଏହା ବୋରିସଙ୍କ ତୃତୀୟ ବିବାହ ହୋଇଥିବା ବେଳେ ସିମଣ୍ଡସ ପ୍ରଥମ ଥର ପାଇଁ ବିବାହ କରୁଛନ୍ତି ।
ବୋରିସଙ୍କ ଏହି ଗୁପ୍ତ ବିବାହ ସମ୍ପର୍କରେ ସମସ୍ତେ ଅଜ୍ଞ ଥିଲେ । ଏପରିକ ବୋରିସଙ୍କ 10 ଡାଉନିଙ୍ଗ ଷ୍ଟ୍ରିଟଠାରେ ଥିବା କାର୍ଯ୍ୟାଳୟର ବରିଷ୍ଠ କର୍ମଚାରୀଙ୍କ ନିକଟରେ ମଧ୍ୟ ଏ ସମ୍ପର୍କରେ କୌଣସି ସୂଚନା ନଥିଲା । ବୋରିସଙ୍କ ବିବାହ ସମ୍ପର୍କରେ କୌଣସି ପ୍ରତିକ୍ରିୟା ଦେବା ପାଇଁ କାର୍ଯ୍ୟାଳୟ ମନା କରିଥିବା ଜଣାପଡିଛି । ବୋରିସ 2019 ମସିହାରେ ପ୍ରଧାନମନ୍ତ୍ରୀ ହେବା ପରେ ଉଭୟ ଡାଉନିଙ୍ଗ ଷ୍ଟ୍ରିଟଠାରେ ଏକାଠି ରହୁଥିଲେ । ଗତ ବର୍ଷ ସେମାନେ ନିଜ ସମ୍ପର୍କ ସମ୍ବନ୍ଧରେ ସୂଚନା ଦେବା ସହିତ ଗର୍ଭବତୀ ଥିବା ସମ୍ପର୍କରେ ମଧ୍ୟ କହିଥିଲେ । ତେବେ ଗତବର୍ଷ ଏପ୍ରିଲ ମାସରେ ଉଭୟ ଏକ ପୁତ୍ର ସନ୍ତାନ ୱିଲଫ୍ରେଡ଼ ଲରି ନିକୋଲାସ ଜନସନ ଜନ୍ମଗ୍ରହଣ କରିଥିଲେ ।
ପୂର୍ବରୁ ବୋରିସ 2 ଜଣଙ୍କୁ ବିବାହ କରି ଛାଡପତ୍ର ଦେଇସାରିଥିବା ବେଳେ ସେ କେତୋଟି ସନ୍ତାନଙ୍କର ପିତା ସମ୍ପର୍କରେ ସୂଚନା ଦେବାକୁ ଅନିଚ୍ଛା ପ୍ରକାଶ କରିଥାନ୍ତି । ବୋରିସ ଜଣେ ଆଇନଜୀବୀ ମାରିନା ହ୍ବିଲରଙ୍କୁ ଦ୍ବିତୀୟ ବିବାହ କରିଥିବା ବେଳେ ତାଙ୍କର 4ଟି ସନ୍ତାନ ଥିଲା । କିନ୍ତୁ ପରେ 2018 ମସିହା ସେପ୍ଟେମ୍ବର ମାସରେ ସେମାନଙ୍କ ବିଚ୍ଛେଦ ହୋଇଥିଲା ।
