ଲକ୍ଷ୍ନୌ: ଉତ୍ତରପ୍ରଦେଶର ବିଜନର ଅଞ୍ଚଳରେ ଅଘଟଣ । ଏକ କେମିକାଲ ଫ୍ୟାକ୍ଟ୍ରିରେ ବିସ୍ଫୋରଣ ଯୋଗୁଁ ପୁରା ଫ୍ୟାକ୍ଟ୍ରିରେ ନିଆଁ ଲାଗିଯାଇଛି । ଫଳରେ ସେଠାରେ କାର୍ଯ୍ୟରତ 5 ଜଣ ଶ୍ରମିକଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି ଏବଂ ଦୁଇରୁ ତିନି ଜଣ ଆହତ ହୋଇଛନ୍ତି ।
ମୃତକମାନଙ୍କ ମଧ୍ୟରେ ଚାରି ଜଣକ ପରିଚୟ ମିଳିପାରିଛି । ସେମାନେ ହେଲେ ପ୍ରଦୀପ କୁମାର, ଚିଣ୍ଟୁ, ସୋନୁ, ବୃଜପାଲ । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି । ସେପଟେ ପୋଲିସ 5 ଜଣ ଶ୍ରମିକଙ୍କ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ।
ବିଜନର କୋତବାଲୀ ସହରର ବକ୍ସିୱାଲା ଅଞ୍ଚଳରେ ଏହି କେମିକାଲ ଫ୍ୟାକ୍ଟ୍ରିଟି ରହିଛି । ଯେଉଁଠାରେ ବାଣ ତିଆରି କାରବାର ହୁଏ । ୟୁସୁଫ ନାମକ ଜଣେ ବ୍ୟକ୍ତି ଏହି କେମିକାଲ ଫ୍ୟାକ୍ଟ୍ରିର ମାଲିକ ହୋଇଥିବା କୁହାଯାଉଛି । ତେବେ ସୂଚନା ଅନୁଯାୟୀ, ଗୁରୁବାର ଅଚାନକ କାର୍ଯ୍ୟ ଚାଲୁଥିବା ସମୟରେ ଏକ ବଡ ବିସ୍ଫୋରଣ ହୋଇଥିଲା । ଫଳରେ ଚାହୁଁ ଚାହୁଁ ନିଆଁ ସମଗ୍ର ଫ୍ୟାକ୍ଟ୍ରିକୁ ବ୍ୟାପି ଯାଇଥିଲା । ସ୍ଥାନୀୟ ଲୋକଙ୍କଠାରୁ ସୂଚନା ପାଇ ପୋଲିସ ଅଗ୍ନିଶମ ବାହିନୀ ସହ ସେଠାରେ ପହଞ୍ଚିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
