କୋଲକାତା: ଥମୁନି ପଶ୍ଚିମବଙ୍ଗରେ ରାଜନୈତିକ ହିଂସା । ମାଲଦା ଜିଲ୍ଲାରେ ଜଣେ ବିଜେପି ନେତା ପ୍ରଭାତ ଟୁଡୁଙ୍କୁ ଗୁଳିମାଡ ହୋଇଛି । ଗୁରୁତର ଅବସ୍ଥାରେ ତାଙ୍କୁ ମାଲଦା ହସପିଟାଲରେ ଭର୍ତ୍ତି କରାଯାଇଛି । ରଞ୍ଜକଲି ଅଞ୍ଚଳରେ ଦୁଇଜଣ ଅଜଣା ଯୁବକ ପ୍ରଭାତଙ୍କ ଉପରକୁ ଗୁଳି ଚଳାଇ ଘଟଣାସ୍ଥଳରୁ ଚମ୍ପଟ ମାରିଥିଲେ । ପୋଲିସ ଜଣେ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତ ଜଣକ କାଳିଆଛକ ପୋଲିସ ଷ୍ଟେସନ ଅଞ୍ଚଳର ଅଲିମ ଖାନ ବୋଲି ଜଣାପଡିଛି । ଗିରଫ ଯୁବକଙ୍କ ଠାରୁ ଏକ ପିସ୍ତଲ ଜବତ କରାଯାଇଛି । ବିଜେପି ନେତାଙ୍କ ଉପରେ ତାଙ୍କ ସାଙ୍ଗ ଗୁଳି ଚଳାଇଥିବା ସେ ପଚାରାଉଚରା ବେଳେ ସ୍ବୀକାର କରିଛନ୍ତି ।
ସୂଚନା ଅନୁସାରେ, ପ୍ରଭାତଙ୍କ ଘର ସମ୍ମୁଖରେ ଦୁଇ ଜଣ ଯୁବକ ପ୍ରଥମ ବାଇକରେ ଆସିଥିଲେ । ଏବଂ ପ୍ରଭାତଙ୍କ ଉପରକୁ ଗୁଳିମାଡ କରିଥିବା ଜଣାପଡିଛି । ସୌଭାଗ୍ୟବଶତଃ ପ୍ରଭାତ ହେଲମେଟ ପିନ୍ଧିଥିବାରୁ ଏକ ବଡ ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଥିଲେ ।
ସେପଟେ ଏହି ପ୍ରସଙ୍ଗରେ ବିଜେପିର ଜିଲ୍ଲା ସ୍ତରୀୟ ନେତା ଚମ୍ପାଇ ବେସ୍ରା କହିଛନ୍ତି ଯେ ବିଧାନସଭା ନିର୍ବାଚନ ପରେ ଏଭଳି ଅନେକ ଘଟଣା ଘଟିଛି । ଯେଉଁଥିରେ ବିଜେପି ନେତାମାନେ ରାଜନୈତିକ ହିସାଂର ସମ୍ମୁଖିନ ହେଉଛନ୍ତି । ପୋଲିସ ଏହି ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରାଯିବା ଆବଶ୍ୟକ।
ବ୍ୟୁରୋ ରିପୋର୍ଟ, ଇଟିଭି ଭାରତ
