ପାଟନା: ନୂପୁର ଶର୍ମାଙ୍କ ପ୍ରୋଫାଇଲ ଦେଖିବା ସମୟରେ ବିହାରରେ ଜଣେ ଯୁବକଙ୍କୁ ହତ୍ୟା ଉଦ୍ୟମ ହୋଇଛି । ଯୁବକଙ୍କ ଦେହରେ ଛୁରୀ ଭୁସିଛନ୍ତି ଦୁର୍ବୃତ୍ତ । ଗୁରୁତର ଅବସ୍ଥାରେ ତାଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ନୂପୁର ଶର୍ମାଙ୍କ ପ୍ରଫେଟ ମହମ୍ମଦ ବିରୋଧି ମନ୍ତବ୍ୟକୁ ସମର୍ଥନ କରି ବିଗତ ଦିନରେ ଦେଶରେ ହତ୍ୟାକାଣ୍ଡମାନ ଘଟିଛି । ଉଦୟପୁରରେ ଦରଜୀଙ୍କୁ ଗଳାକାଟି ନିର୍ମମ ହତ୍ୟା ଏବଂ ମହାରାଷ୍ଟ୍ରରେ ମେଡିକାଲ ଦୋକାନୀ ହତ୍ୟା ଘଟଣା ଚାରିଆଡେ ଆଲୋଡନ ସୃଷ୍ଟି କରିଥିବାବେଳେ, ଏବେ ବିହାରର ଯୁବକଙ୍କ ଉପରେ ଏପରି ମରଣାନ୍ତକ ଆକ୍ରମଣ ସମସ୍ତଙ୍କୁ ଆଶ୍ଚର୍ଯ୍ୟାନ୍ବିତ କରିଛି ।
ଆହତ ଯୁବକ ହେଉଛନ୍ତି ବିହାରର ଅଙ୍କିତ ଝା । ତାଙ୍କ ଅଭିଯୋଗ ଅନୁଯାୟୀ, "ସେ ରାସ୍ତାକଡ ଏକ ଠେଲା ଦୋକାନରେ ବସି ମୋବାଇଲରେ ନୂପୁର ଶର୍ମାଙ୍କ ଷ୍ଟାଟସ୍ ଦେଖୁଥିଲେ । ଏହି ସମୟରେ କିଛି ଲୋକେ ସେ ନୂପୁର ଶର୍ମାଙ୍କ ସମର୍ଥକ ବୋଲି ତାଙ୍କୁ ପଚାରିଥିଲେ । ଏନେଇ ଯୁବକ କହିଥିଲେ ଯେ, ସେ ହିନ୍ଦୁ ଅଟନ୍ତି ଏବଂ ନୂପୁର ଶର୍ମାଙ୍କୁ ସମର୍ଥନ କରୁଛନ୍ତି । ଏହାପରେ ସେହି ଲୋକମାନେ ହଠାତ୍ ଏକ ଛୁରୀରେ ତାଙ୍କୁ ମରଣାନ୍ତକ ଆକ୍ରମଣ କରିଥିଲେ ।''
ସ୍ଥାନୀୟ ଲୋକେ ଅଙ୍କିତଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲେ । ଏହି ଘଟଣା ସମ୍ପର୍କରେ ଯୁବକଙ୍କ ପରିବାର ପକ୍ଷରୁ ଥାନାରେ ଅଭିଯୋଗ ହୋଇଛି । ପୀଡିତଙ୍କ ବାପା ପୁଅ ଏବଂ ନିଜ ପରିବାରକୁ ପୋଲିସ ସୁରକ୍ଷା ଯୋଗାଇବାକୁ ଦାବି କରିଛନ୍ତି ।
