ପାଟନା: ବିହାର ବିଧାନସଭା ନିର୍ବାଚନର ମତଗଣନା ଜାରି ରହିଥିବା ବେଳେ କ୍ରମାଗତ ପଛରେ ଚାଲିଛି ମହାମେଣ୍ଟ । ଟ୍ରେଣ୍ଡ୍ରେ ବିଜେପିର ବାଜି ପଲଟିବା ଦେଖି ଏବେ ଇଭିଏମ ଉପରେ ଆଙ୍ଗୁଳି ଉଠାଇଛନ୍ତି ବିପକ୍ଷ । କଂଗ୍ରେସ ନେତା ଉଦିତ ରାଜ ଟ୍ବିଟ କରି ଇଭିଏମ ଉପରେ ସମସ୍ତ ଦୋଷ ଲଦିଦେଇଛନ୍ତି ।
ଉଦିତ ରାଜ ଟ୍ବିଟ କରି କହିଛନ୍ତି ଯେ ଯଦି ଆମେରିକାରେ ଇଭିଏମ ଜରିଆରେ ନିର୍ବାଚନ ହୋଇଥାନ୍ତା ତେବେ ଟ୍ରମ୍ପ ହାରିଥାନ୍ତେ କି? ଇଭିଏମଗୁଡିକ ହ୍ୟାକ ହୋଇଥିବା ଅଭିଯୋଗ କରିଛନ୍ତି ଉଦିତ । ତେବେ କଂଗ୍ରେସ ନେତାଙ୍କ ପୂର୍ବରୁ ଦଳର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ବିହାରରେ ଏକ ନିର୍ବାଚନ ରାଲିରେ ଇଭିଏମକୁ ଏମଭିଏମ ଅର୍ଥାତ ମୋଦି ଭୋଟିଂ ମେସିନ ସହ ତୁଳନା କରିଥିଲେ ।
କଂଗ୍ରେସର ବରିଷ୍ଠ ନେତା ଦିଗବିଜୟ ସିଂହ ମଧ୍ୟ କହିଛନ୍ତି, ଇଭିଏମଗୁଡିକ ଟ୍ୟାମ୍ପର-ପ୍ରୁଫ ନୁହେଁ । ଏହାକୁ ହ୍ୟାକ କରାଯାଇପାରେ | ଏପରି ଆସନ ଅଛି ଯେଉଁଥିରେ ଆମେ କୌଣସି ପରିସ୍ଥିତିରେ ହାରିବା ସମ୍ଭବ ନୁହେଁ | ବୁଧବାର ଏକ ବୈଠକ କରି ଫଳାଫଳର ସମୀକ୍ଷା କରିବୁ ବୋଲି କହିଛନ୍ତି ଦିଗବିଜୟ ।
କେବଳ କଂଗ୍ରେସ ନୁହେଁ ବିହାର ଜନ ଅଧିକାର ପାର୍ଟି ଅଧ୍ୟକ୍ଷ ପପୁ ଯାଦବ ମଧ୍ୟ ଇଭିଏମର ବିଶ୍ବସନୀୟତା ଉପରେ ପ୍ରଶ୍ନ ଉଠାଇଛନ୍ତି । ନିଜ ପରାଜୟ ନେଇ ଇଭିଏମକୁ ଦାୟୀ କରିଛନ୍ତି ପପୁ । ସେ କହିଛନ୍ତି ଯେ ଇଭିଏମ ଜରିଆରେ ନିର୍ବାଚନ ହେବା ଉଚିତ ନୁହେଁ ।
ବିହାର ନିର୍ବାଚନ ମତଗଣନାର ପ୍ରାଥମିକ ଟ୍ରେଣ୍ଡିଂରେ ପଛରେ ଥିବା ଏନଡିଏ ଏବେ ବହୁମତର ମେଜିକ ମାର୍କ ପାର କରିସାରିଛି । 243 ଆସନ ବିଶିଷ୍ଟ ବିଧାନସଭା ନିର୍ବାଚନରେ ଏନଡିଏ 129ଟି ଆସନରେ ଆଗୁଆ ଥିବା ବେଳେ 103 ଆସନରେ ଲିଡ କରୁଛି ମହାମେଣ୍ଟ ।
