ନୂଆଦିଲ୍ଲୀ: ଭବିଷ୍ୟତରେ ସ୍ବାସ୍ଥ୍ୟ ପ୍ରତି ଥିବା ବିପଦକୁ ଦୃଷ୍ଟିରେ ରଖି ଉପରାଷ୍ଟ୍ରପତି ଏମ ଭେଙ୍କେୟା ନାଇଡୁ ଦେଶରେ ପରିବେଶ ଅନୁକୂଳ ସ୍ଥାପତ୍ୟ ଓ ଡିଜାଇନ୍ ଗ୍ରହଣ କରିବାକୁ ଆହ୍ବାନ କରିଛନ୍ତି। ଆଜି(ଶନିବାର) ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଆର୍କିଟେକଚର ନ୍ୟାସନାଲ କନଫରେନ୍ସର ଉଦଘାଟନୀ ସମାରୋହକୁ ସମ୍ବୋଧିତ କରି ଏକଥା କହିଛନ୍ତି ଉପରାଷ୍ଟ୍ରପତି ।
ସେ ଆର୍କିଟେକଚର୍ ଓ ଡିଜାଇନର ମାନଙ୍କୁ ସେମାନଙ୍କ ଡିଜାଇନରେ ପରିବର୍ତ୍ତନ ଆଣିବାକୁ କହିଛନ୍ତି । ମହାମାରୀ ଦ୍ବାରା ସୃଷ୍ଟି ହୋଇଥିବା ସମସ୍ୟାର ପାଇଁ ଆର୍କିଟେଚର ସ୍ତରରେ ସମାଧାନ ଖୋଜିବାକୁ ସେ ଅନୁରୋଧ କରିଛନ୍ତି । ଭବିଷ୍ୟତର ବିପଦକୁ ମୁକାବିଲା କରିବା ଉପାୟ ପାଇଁ ବର୍ତ୍ତମାନର ସଙ୍କଟର ସମାଧାନ ପାଇଁ ଡିଜାଇନ୍ ଓ ସ୍ଥାପତ୍ୟକୁ ପୁନଃସଂଗଠିତ କରିବା ଆବଶ୍ୟକ ବୋଲି ସେ କହିଛନ୍ତି।
ଉପରାଷ୍ଟ୍ରପତି ଗୁରୁତ୍ବାରୋପ କରିଛନ୍ତି ଯେ ସରଞ୍ଚନାକୁ ଏପରି ଭାବରେ ନିର୍ମାଣ କରାଯିବା ଉଚିତ ଯେ ଦେଶବାସୀଙ୍କ ପାଇଁ ପର୍ଯ୍ୟାପ୍ତ ପ୍ରାକୃତିକ ଆଲୋକ ଓ ଭେଣ୍ଟିଲେସନ୍ ଉପଲବ୍ଧ ହୋଇପାରିବ । ସେ କହିଛନ୍ତି ଯେ ଆଧୁନିକ ସରଞ୍ଚନା ଗୁଡିକର ଉଦ୍ଦେଶ୍ୟ କେବଳ ଆଶ୍ରୟ ଓ ସୁରକ୍ଷା ଯୋଗାଇବା ନୁହେଁ ବରଂ ଆରାମ ଯୋଗାଇବା ମଧ୍ୟ ହେବା ଉଚିତ୍ ।
ସ୍ମାର୍ଟ ସିଟି ପ୍ରୋଜେକ୍ଟରେ ନିର୍ମାଣ ଓ ଡିଜାଇନ୍ ସମ୍ବନ୍ଧୀୟ କାର୍ଯ୍ୟ ପାଇଁ ସେ ସ୍ଥାନୀୟ କାରିଗରମାନଙ୍କୁ ନିୟୋଜିତ କରିବାକୁ ମଧ୍ୟ କହିଥିଲେ। ସେ କହିଛନ୍ତି ଯେ ଏଭଳି ଯୋଗଦାନ କେବଳ ଆଞ୍ଚଳିକ ସଂସ୍କୃତିକୁ ବଞ୍ଚାଇ ରଖିବ ନାହିଁ ବରଂ ଦେଶର ଅନେକ ଲୋକଙ୍କୁ ନିଯୁକ୍ତି ମଧ୍ୟ ଦେବ।
