ନୂଆଦିଲ୍ଲୀ : ଡ୍ରାଇଭିଂ ଲାଇସେନ୍ସ, ଗାଡି ପଞ୍ଜିକରଣ ଏବଂ ଫିଟନେସ୍ ସାର୍ଟିଫିକେଟ୍ ଭଳି ଗୁରୁତ୍ତ୍ବପୂର୍ଣ୍ଣ କାଗଜପତ୍ର ଗୁଡିକର ବୈଧତାକୁ କେନ୍ଦ୍ର ସରକାର 2021 ମାର୍ଚ୍ଚ 31 ତାରିଖ ପର୍ଯ୍ୟନ୍ତ ବୃଦ୍ଧି କରିଛନ୍ତି । ଏହି ନିଷ୍ପତ୍ତି ସେହିମାନଙ୍କ ପାଇଁ ଲାଭଦାୟକ ଯେଉଁମାନଙ୍କର ଏହି ଦଲିଲ ଗୁଡ଼ିକର ଅବଧି ଫେବୃଆରୀ 1, 2020 ରେ ସମାପ୍ତ ହୋଇଥିଲା କିନ୍ତୁ, ମହାମାରୀ ହେତୁ ସେସବୁର ନବୀକରଣ କରିପାରିନାହାଁନ୍ତି ।
କେନ୍ଦ୍ର ସଡକ ପରିବହନ ଏବଂ ରାଜପଥ ମନ୍ତ୍ରଣାଳୟ କୋରୋନା ମହାମାରୀ ହେତୁ ଚତୁର୍ଥ ଥର ପାଇଁ ଏହି ବୈଧତାରେ ବୃଦ୍ଧି କରିଛନ୍ତି । ଏହାପୂର୍ବରୁ ଅଗଷ୍ଟରେ ସରକାର 31 ଡିସେମ୍ବର 2020 ପର୍ଯ୍ୟନ୍ତ ଏହାର ବୈଧତା ବୃଦ୍ଧି କରିଥିଲେ । ରବିବାର ଦିନ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ସୁରକ୍ଷିତ ଭାବେ ଶାରୀରିକ ଦୂରତା ବଜାୟ ରଖିବା ସହିତ ପରିବହନ ସହ ଜଡିତ ସେବା ପାଇବାରେ ନାଗରିକମାନଙ୍କୁ ଏହି ନିଷ୍ପତ୍ତି ସାହାଯ୍ୟ କରିବ ।
ବାସ୍ତବରେ କୋରୋନା ମହାମାରୀ ସମୟରେ ସାଧାରଣ ଲୋକଙ୍କ ସୁରକ୍ଷା ନିମନ୍ତେ ଅଗଷ୍ଟ ମାସରେ ହେବାକୁ ଥିବା ମୋଟର ଯାନ ସହ ଜଡିତ ସମସ୍ତ ଦଲିଲର ବୈଧତା ଡିସେମ୍ବର 31, 2020 ପର୍ଯ୍ୟନ୍ତ ବୃଦ୍ଧି କରାଯାଇଥିଲା । ଏଥିରେ ଫିଟନେସ୍ ସାର୍ଟିଫିକେଟ୍, ଡ୍ରାଇଭିଂ ଲାଇସେନ୍ସ,, ଯାନ ପଞ୍ଜିକରଣ (RC) ସହିତ ପ୍ରମୁଖ ଦଲିଲ ଅନ୍ତର୍ଭୁକ୍ତ ।
ଏହି ନିୟମକୁ ତୁରନ୍ତ କାର୍ଯ୍ୟକାରୀ କରିବାକୁ କେନ୍ଦ୍ର ସରକାର ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳକୁ ନିର୍ଦ୍ଦେଶ ଦେଇଛନ୍ତି ଯାହା ଦ୍ବାରା କୌଣସି ଡ୍ରାଇଭର ହଇରାଣ ନହୁଅନ୍ତି । କେନ୍ଦ୍ର ସଡକ ପରିବହନ ଏବଂ ରାଜପଥ ମନ୍ତ୍ରଣାଳୟ କହିଛି ଯେ, 31 ମାର୍ଚ୍ଚ 2021 ପର୍ଯ୍ୟନ୍ତ ଏହି ଦଲିଲ ଗୁଡ଼ିକୁ ବୈଧ ବୋଲି ବିଚାର କରିବାକୁ ଅଧିକାରୀମାନଙ୍କୁ ପରାମର୍ଶ ଦିଆଯାଇଛି ।
ସୂତ୍ରରୁ ମିଳିଥିବା ସୂଚନା ଅନୁଯାୟୀ, ବାଣିଜ୍ୟିକ ଯାନ ମାଲିକମାନେ ସରକାରଙ୍କଠାରୁ କିଛି ରିହାତି ଦାବି କରିଥିଲେ । ସେମାନଙ୍କ କହିବା କଥା ଯେ, ବ୍ୟବହାରିକ ସମସ୍ୟା ହେତୁ ରାସ୍ତାକୁ ଓହ୍ଲାଉ ନ ଥିବା ଏଭଳି ଯାନ ପାଇଁ ସରକାର କିଛି କୋହଳ ପ୍ରଦାନ କରିବା ଉଚିତ। ଏଥିରେ ସ୍କୁଲ ବସ୍ ଅପରେଟର ମଧ୍ୟ ଅନ୍ତର୍ଭୁକ୍ତ ।
