ଲକ୍ଷ୍ନୌ: ୟୁପିରେ ବିଷାକ୍ତ ମଦ ମୃତ୍ୟୁ ଘଟଣାରେ ହେବ ଏସଆଇଟି ତଦନ୍ତ । ରବିବାର ଯୋଗୀ ସରକାର ଏହି ନିଷ୍ପତ୍ତି ନେଇଛନ୍ତି । ଏହି ମଦ ମୃତ୍ୟୁ ଘଟଣାରେ ଉଭୟ ଉତ୍ତର ପ୍ରଦେଶ ଓ ଉତ୍ତରାଖଣ୍ଡରେ 97 ଜଣଙ୍କର ମୃତ୍ୟୁ ହୋଇଥିବା ସୂଚନା ରହିଛି ।
10 ଦିନ ଭିତରେ ତଦନ୍ତ କରି ମୁଖ୍ୟମନ୍ତ୍ରୀଙ୍କୁ ରିପୋର୍ଟ ଦେବ ଏସଆଇଟି ଟିମ୍ । ଅତିରିକ୍ତ ପୋଲିସ ନିର୍ଦ୍ଦେଶକ ସଞ୍ଜୟ ସିଂଘାଲ ଏହି ଟିମର ମୁଖ୍ୟ ଅଛନ୍ତି । ମଦ ମୃତ୍ୟୁ ପଛର କାରଣ ସହିତ ଏପରି କାଣ୍ଡ ପଛରେ କାହାର ହାତ ଅଛି ବୋଲି ମଧ୍ୟ ତଦନ୍ତ କରିବ ଏସଆଇଟି ଟିମ୍ ।
ଏସଆଇଟି ଟିମର ତଦନ୍ତ ରିପୋର୍ଟ ଆଧାରରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ଆଗାମୀ ଦିନରେ ଏପରି ଘଟଣା ଯେମିତି ପୁନରାବୃତି ନହୁଏ ସେଥିପାଇଁ ପଦକ୍ଷେପ ଗ୍ରହଣ କରିବାକୁ ଏସଆଇଟି ଟିମକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ।
