ନୂଆଦିଲ୍ଲୀ: ବହୁ ଚର୍ଚ୍ଚିତ ଟ୍ରିପଲ ତଲାକ ବିଲକୁ ନେଇ ଦିନକୁ ଦିନ ବିଭିନ୍ନ ସମସ୍ୟା ଦେଖା ଦେଉଛି । ସରକାର ଏହି ବିଲକୁ ଲୋକସଭାରେ ଆଗତ କରିଦେଇଛନ୍ତି । ମାତ୍ର ରାଜ୍ୟସଭାରେ ଏହି ବିଲ ଆଗତ ହୋଇ ନ ପାରି ପଡ଼ି ରହିଛି । ତେବେ ମୁସଲିମ ଉଲମାଓଁ ସରକାରଙ୍କ ଏହି ନିଷ୍ପତ୍ତି ଉପରେ ପ୍ରଶ୍ନ ଉଠାଇଛନ୍ତି । ସେମାନେ କହିଛନ୍ତି କି ଆଜିକାଲି ସମାଜରେ ଯେଉଁଭଳି ଅତ୍ୟାଚାର ବଢି ଚାଲି ସରକାର ପ୍ରଥମେ ହିନ୍ଦୁ ନାରୀଙ୍କ ସମ୍ମାନ ରକ୍ଷା ପାଇଁ ପଦକ୍ଷେପ ନିଅନ୍ତୁ । ମୁସଲିମ ମହିଳାଙ୍କ ବିଷୟରେ ଚିନ୍ତା କରିବା ଛାଡନ୍ତୁ । ସୂଚନା ଯୋଗ୍ୟ ସଂସଦର ମନସୁନ ଅଧିବେସନରେ ତିନ ତଲାକ ବିଲକୁ ନେଇ ଜୋରଦାର ଚର୍ଚ୍ଚା ହୋଇଥିଲା । ପରେ ଏହା ଉପରେ ଭୋଟ ମଧ୍ୟ ହୋଇଥିଲା । ତେବେ ଏହି ବିଲକୁ 303 ଜଣ ସମର୍ଥନ ଜଣାଇଥିବା ବେଳେ 82 ଜଣ ଏହାକୁ ବିରୋଧ କରିଥିଲେ ।
ମୁସଲିମ ସଂଗଠନର ବୈଠକ
ହେଲ୍ଥ ୟୁନିଟ ଅର୍ଗାନାଇଜେସନ ଆନୁକୂଲ୍ୟରେ ଏକ ବୈଠକ ଅନୁଷ୍ଠିତ ହୋଇଥିଲା । ଏଥିରେ ମୌଲାନା ମହମ୍ମଦ ଇଫ୍ତିଖାର ହୁସେନ ମଦାନୀ ଅଧ୍ୟକ୍ଷତା କରିଥିଲେ । ଏହି ବୈଠକରେ ବିଲକୁ ନେଇ ବେଶ ଚର୍ଚ୍ଚାଲୋଚନା ହୋଇଥିଲା । ବୈଠକରେ ମୌଲାନା ଇଫ୍ତଖାର ମଦାନୀ. ମୌଲାନା ସମିମ ଆଦିଲ, ନାଜିମ ଜାଭେଦ, ମୁଫତି ମହମ୍ମଦ ଅଲ୍ଲୀ, ମୌଲାନା ମହମ୍ମଦ ଜମସିଦ, ମୌଲାନା ଏଜାଜ ନୌମାନୀ, ମହମ୍ମଦ ଜାଭେଦ, ମହମ୍ମଦ ତବରେଜ ସେମାନଙ୍କର ମତାମତ ରଖିଥିଲେ ।
ମୌଲାନା ଇଫ୍ତଖାର କହିଥିଲେ କି, ଏହି ବିଲ ଆଣିବା ପଛରେ ସରକାରଙ୍କ କଣ ଉଦ୍ଦେଶ୍ୟ ରହିଛି ତାହା ସ୍ପଷ୍ଟ ଜଣାପଡ଼ୁନାହିଁ । ଯଦି ଛାଡ଼ପତ୍ରକୁ ରୋକିବା ପାଇଁ ଏହା କରାଯାଉଥାଏ, ତେବେ ମୁସଲିମ ମହିଳାଙ୍କ ଅପେକ୍ଷା ହିନ୍ଦୁ ନାରୀ ଅଧିକ ମାତ୍ରାରେ ଏହାର ଶିକାର ହେଉଛନ୍ତି । ତେବେ ମୋଦିଙ୍କୁ କେବଳ ମୁସଲମାନଙ୍କ ସମସ୍ୟା ଦେଖା ଯାଉଛି ବୋଲି ସେ କହିଥିଲେ । ହେଲଥ ୟୁନିଟ ଅର୍ଗାନାଇଜେସନର ଚେୟାରମ୍ୟାନ ଏସ. କରିମ ସଭା ପରିଚାଳନା କରିଥିଲେ ।
